ޕޮޒިޓިވްވި މީހުންގެ އަދަދު އަނެއްކާވެސް މައްޗަށްގޮސް 132 މީހުން ޕޮޒިޓިވްވެއްޖެ
4 އެޕްރީލު 2021 | އާދީއްތަ 18:24ޖެހިޖެހިގެން ދެ ދުވަހު ކޭސް ފެންނަ މިންވަރު ވަނީ ދަށަށްގޮސްފައި
ޕޮޒިޓިވް ކޭސް
ރާއްޖެގައި ކޮވިޑްގެ ކޭސްތައް ދުވަހަކަށްވުރެ ދުވަހެއް މަދުވަމުންދަނިކޮށް، އަނެއްކާވެސް ކޮވިޑްއަށް ޕޮޒިޓިވްވާ މީހުންގެ އަދަދު މައްޗަށް ހިނގައްޖެއެވެ.
ހެލްތު ޕްރޮޓެކްޝަން އެޖެންސީން އާންމުކޮށްފައިވާ ތަފާސްހިސާބުތަކަށް ބަލާއިރު ފާއިތުވި 24 ގަޑިއިރު ރާއްޖެއިން ކޮވިޑަށް ޕޮޒިޓިވްވެފައިވަނީ 132 މީހުންނެވެ. އޭގެކުރީ 24 ގަޑިއިރު ކޮވިޑަށް ޕޮޒިޓިވްވީ 103 މީހުންނެވެ. ބުރާސްފަތި ދުވަހު ޕޮޒިޓިވްވެފައިވަނީ 169 މީހުންނެވެ. މިއާއެކު ނަންބަރުތައް މައްޗަށް ގޮސްފައިމިވަނީ ނަންބަރުތައް ޖެހިޖެހިގެން ދެ ދުވަހު ދަށަށްގޮސްފައި އޮތުމައްފަހުއެވެ. ރާއްޖޭގައި އޭޕްރީލް 1 ވަނަ ދުވަހު ވަނީ ރިކޯޑް މިންވަރަކަށް ކޭސްތައް ރިޕޯޓް ކޮށްފައެވެ. އޭޕްރީލް މަހުގެ 1 ވަނަ ދުވަހު ޕޮޒިޓިވްވެފައިވަނީ 300 މީހުންނެވެ.
އެޗްޕީއޭއިން އެންމެ ފަހުން އާންމުކޮށްފައިވާ ތަފާސްހިސާބަށް ބަލާއިރު ހުކުރު ދުވަހުގެ ހަވީރު 06:00ން ފެށިގެން ހޮނިހިރު ހަވީރު 06:00 އާއި ހަމައަށް ރާއްޖެއިން ކޮވިޑަށް 3049 މީހުންގެ ޓެސްޓު ކޮށްފައިވެއެވެ. އޭގެތެރެއިން 132 މީހުން ކޮވިޑަށް ޕޮޒިޓިވްވިއިރު މީގެތެރެއިން މާލެ ސަރަހައްދުން ޕޮޒިޓިވްވެފައިވަނީ 6 މީހުންނެވެ. އަތޮޅުތަކުން 45 މީހުން ޕޮޒިޓިވްވިއިރު ހިނގަމުންދާ ރިސޯޓްތަކުން 19 މީހަކު ވަނީ ޕޮޒިޓިވްވެފައެވެ.
ރާއްޖޭގައި މިވަގުތު 3061 މީހަކަށް މިބަލީގައި ފަރުވާ ދެމުން އަންނައިރު ހޮސްޕިޓަލްގައި އެޑްމިޓްކޮށްގެން ފަރުވާދެމުން އަންނަނީ 83 މީހުންނަށެވެ.
ރާއްޖޭގައި މުޅި ޖުމްލަ 24،783 މީހުންނަށް ވަނީ މިހާތަނަށް ކޮވިޑް ޖެހިފައެވެ. އަދި 67 މީހަކު ވަނީ މިބަލީގައި ނިޔާވެފައެވެ.
