އޭސީ މިލާނުގެ ތަޖުރިބާކާރު ފޯވާޑް ޒްލަޓާން އިބްރަހިމޮވިޗާއި އިންޓަގެ ފޯވާޑް ރޮމެލޫ ލުކާކޫގެ ޖޫރިމަނާ ޗެރިޓީއަށް ދިނުމަށް އެ ދެ ކުލަބުން ނިންމައިފިއެވެ.

މި ދެ ކުޅުންތެރިން ޖޫރިމަނާކުރަން ނިންމީ އިޓާލިއަން ކަޕުގެ ކުއާޓާ ފައިނަލުގައި ޖެނުއަރީ މަހު މިލާން އަތުން ފަހަތުން އަރައި 2-1 ގެ ނަތީޖާއަކުން އިންޓަ މޮޅުވި މެޗުގައި ހިނގައި ދިޔަ ހަމަނުޖެހުންތަކާ ގުޅިގެންނެވެ.

އެގޮތުން އެ މެޗުގައި އިބްރަހިމޮވިޗާއި ލުކާކޫއާ ދެމެދު ދަނޑުމަތީގައި ތަކުރާރުކޮށް ބަހުގެ ހަމަލާތަކެއް ބަދަލުކުރިއިރު، ފުރަތަމަ ހާފުގައި އެ ދެ ކުޅުންތެރިންނަށް ވަނީ ރީނދޫ ކާޑު ދައްކާފައެވެ. އަދި ފަހުން އިންޓަގެ އަލެކްސަންޑަ ކޮލަރޯވަށް ކުރި ފައުލަކާ ގުޅިގެން ދެވަނަ ހާފުގައި އިބްރަހިމޮވިޗަށް ވަނީ ދެވަނަ ރީނދޫ ކާޑާއެކު ރަތް ކާޑެއް ދައްކާފައެވެ.

އެއާއެކު އެ މެޗުގައި ހިނގި ހަމަނުޖެހުންތަކުގެ މައްސަލަ އިޓާލިއަން ފުޓްބޯލް ފެޑެރޭޝަނުން ބެލިއިރު، އިބްރަހިމޮވިޗާއި ލުކާކޫ ފެއާޕްލޭ ގަވާއިދާ ޚިލާފުވެފައިވާ ކަމަށް ވަނީ ނިންމާފައެވެ. އެހެންކަމުން އެ ދެ ކުޅުންތެރިން ޖޫރިމަނާކުރަން ނިންމާފައިވީ ނަމަވެސް، ޖޫރިމަނާކުރާނެ އަދަދެއް އަދި މިހާތަނަށް ކަނޑައަޅާފައެއް ނުވެއެވެ. ނަމަވެސް މިލާނާއި އިންޓަ ގުޅިގެން ނެރުނު ނޫސް ބަޔާނެއްގައި ވަނީ އިބްރަހިމޮވިޗާއި ލުކާކޫ ދައްކާ ޖޫރިމަނާ ޗެރިޓީއަށް ދިނުމަށް ނިންމާފައިވާ ކަމަށް ބުނެފައެވެ.

މި މައްސަލައިގައި އިބްރަހިމޮވިޗާއި ލުކާކޫގެ ޖޫރިމަނާކުރާއިރު، ގަވާއިދުގެ ދަށުން މީގެ ކުރިން މި ދެ ކުޅުންތެރިންނަށް ވަނީ އެއް މެޗުގެ ސަސްޕެންޝަނެއްވެސް ކުރިމަތިވެފައެވެ. މީގެ އިތުރުން އެ މެޗުގައި ލުކާކޫއާ ނަސްލީ ގޮތުން އިބްރަހިމޮވިޗް ދިމާކުރި ކަމަށް ތުހުމަތުކުރެވުނު ނަމަވެސް، މީގެ ކުރިން ސޯޝަލް މީޑިއާގައި ހިއްސާކުރި މެސެޖެއްގައި އިބްރަހިމޮވިޗް ވަނީ ލުކާކޫއާ ނަސްލީ ގޮތުން ދިމާނުކުރާ ކަމަށް ބުނެފައެވެ.