ލުކަކޫގެ ހެޓްރިކުން ބެލްޖިއަމްގެ އާ ކޯޗަށް އުފާވެރި ފެށުމެއް ހޯދައިދީފިއެވެ.

ޔޫރޯ ކޮލިފައިންގ ގްރޫޕް އެފްގައި ސްވިޑުން ބަލިކުރި މެޗުގައި ބެލްޖިއަމްގެ ތިން ލަނޑުވެސް ޖެހީ ފަހަކަށް އައިސް ފޯމް ދަށްވެފައިވާ އިންޓަރ މިލާންގެ ފޯވާޑް ލުކަކޫއެވެ. ފުރަތަމަ ހާފްގައި ފުރަތަމަ ލަނޑު ޖެހީ ބޮލުންނެވެ. ދެވަނަ ހާފްގައި ލުކަކޫ ދެ ގޯލްވެސް ޖެހީ ވާތުފައިންނެވެ. ލުކަކޫގެ ތިން ގޯލާއެކު އާ ކޯޗު ޑޮމެނިކޯ ޓެޑެސްކޯއަށް ވަނީ އުފާވެރި ފެށުމެއް ލިބިފައެވެ. މިއީ ވަރލްޑްކަޕްގެ ނާކާމިޔާބީއަށްފަހު ކޯޗު ރޮބާޓޯ މާޓީނޭޒް ޓީމް ދޫކޮށްލި ފަހުން އާކޯޗާއެކު ކުޅުނު ފުރަތަމަ މެޗެވެ. ބެލްޖިއަމް ދޫކޮށް ޕޯޗްގަލްއާ ހަވާލުވެ ރޮބާޓޯ މާޓިނޭޒްވެސް ފެށީ މޮޅަކުންނެވެ.

މެޗުގައި ޖެހި ތިން ގޯލާއެކު ލުކަކޫ ވަނީ ޤައުމީ ޓީމަށް ކުޅުނު 105 މެޗުން 71 ގޯލް ޖަހާފައެވެ. ލުކަކޫގެ އިތުރުން މެޗު ޚާއްޞަވީ ސްވިޑުންގެ ފޯވާޑް އިބްރަހޮމްވިޗަށެވެ. 41 އަހަރުގެ ފޯވާޑް ކުޅެން ނިކުތީ 2-0 ން ޓީމް ފަހަތުގައި ވަނިކޮށް 73 ވަނަ މިނިޓްގައެވެ. މިއާއެކު އިބްރަހޮމްވިޗް ވެފައިވަނީ ޔޫރަޕިއަން ކޮލިފިކޭޝަންގައި ކުޅުނު އުމުރުން އެންމެ ދޮށީ ކުޅުންތެރިޔާއަށެވެ. އިބްރަހޮމްވިޗަކީ ލުކަކޫ ކުޅެމުން އަންނަ އިންޓަރ މިލާނާ ވާދަވެރި އޭސީ މިލާންގެ ފޯވާޑެވެ.

ގްރޫޕް އެފްގައި އޮސްޓްރިއާ ވަނީ 4-1 ން އަޒަރުބައިޖާން ބަލިކޮށްފައެވެ.