އޭސީ މިލާނާއެކު އިބްރަހިމޮވިޗްގެ ވަދާއީ މެޗު މިރޭ
4 ޖޫން 2023 | އާދީއްތަ 03:02މިލާނުން އެއްބަސްވުން އައު ނުކުރާނެ
އިބްރަހިމޮވިޗް
ޒްލަޓާން އިބްރަހިމޮވިޗް އޭސީ މިލާނަށް މިރޭ އަލްވަދާއު ކިޔާނެއެވެ.
41 އަހަރުގެ ސްވިޑުން ފޯވާޑާއެކު މިލާނުން ހަދާފައިވާ އެއްބަސްވުން މިސީޒަންގެ ނިޔަލަށް ހަމަވުމުން, އެއްބަސްވުން އައުނުކުރަން ވަނީ ނިންމާފައެވެ. އޭގެ ބަދަލުގައި އިޓާލިއަން ސެރީއޭގައި މިރޭ މިލާން ކުޅޭ ފަހު މެޗުގައި ރާވާފައިވަނީ އިބްރަހިމޮވިޗަށް އަލްވަދާއުކިޔުމަށް ޚާއްޞަ ރަސްމިއްޔާތެކެވެ. ފަހު މެޗުގައި މިލާން ނުކުންނާނީ ވެރޯނާއާ ދެކޮޅަށެވެ. އިބްރަހިމޮވިޗްގެ އެއްބަސްވުން އައުނުކުރަނީ އަނިޔާގެ ސަބަބުން އޭނާއަށް ކުޅުން ކުރިއަށް ގެންދިއުމުގައި ހުރަސްތައް ކުރިމަތިވާތީއެވެ. މިސީޒަންގައި އޭނާ ކުޅުނީ އެންމެ ހަތަރު މެޗެވެ. އޭގެތެރެއިން ފުރަތަމަ އެގާރައިގަ ނުކުތީ އެއް މެޗުގައެވެ. ޖެހުނީ އެއް ގޯލެވެ. އެކަމަކު ދެވަނަ ފަހަރަށް މިލާނަށް ބަދަލުވެ މިދިޔަ ސީޒަންގައި ލީގު ހޯދައިދިނުމަށް މުހިއްމު ދައުރެއް އަދާކުރިއެވެ. އެކަން ކްލަބުން ވެސް ފާހަގަކުރެއެވެ.
އިބްރަހިމޮވިޗް ވަނީ ބާސެލޯނާއާއި އަޔެކްސްއާއި މެންޗެސްޓަރ ޔުނައިޓެޑާއި އިންޓަރ މިލާނާއި ޕީއެސްޖީއާ އެލްއޭ ގެލެކްސީއަށް ވެސް ކުޅެފައެވެ. މިއީ އޭސީ މިލާނަށް ކުޅޭ ދެވަނަ ފަހަރެވެ.
