ކުރިއަށް އޮތް ސީޒަނަށް ބޮރޫޝިއާ ޑޯޓްމުންޑަށް ކުޅެމުން އަންނަ ނޯވޭގެ ޒުވާން ތަރި އާލިން ބްރައުޓް ހާލަންޑާއެކު ބާސެލޯނާގެ ކެޕްޓަން ލިއޮނެލް މެސީ ގެންނަންވެސް މެންޗެސްޓާ ސިޓީން ބޭނުންވާ ކަމަށް ރިޕޯޓުތައް ބުނެފިއެވެ.

މިދިޔަ އަހަރުގެ ހޫނު މޫސުމުގެ ޓްރާންސްފާ ބާޒާރުގައި ބާސާ ދޫކޮށްލަން މެސީ ނިންމުމާއެކު، އެ ފަހަރު ސިޓީން ވަނީ މެސީ ހޯދަން މަސައްކަތް ފަށާފައެވެ. އެކަމަކު މެސީގެ އެއްބަސްވުމަށް ލުއި ދިނުމަށް ބާސާގެ މެނޭޖުމަންޓުން އެ ފަހަރު އެއްބަސްނުވުމާ ގުޅިގެން، މެސީ ވަނީ އޭނާގެ ނިންމުން ބަދަލުކޮށް މި ސީޒަނުގައި ބާސާގައި މަޑުކޮށްފައެވެ. އެކަމަކު މި ސީޒަން ނިމުމުން ހިލޭ ޓްރާންސްފާއެއްގެ ދަށުން ކުލަބު ބަދަލުކުރުމުގެ ފުރުޞަތު މެސީއަށް ލިބެއެވެ.

ސިޓީން ހާލަންޑް ހޯދުމުގެ މަސައްކަތް އިތުރަށް ފުޅާކޮށްފައިވަނީ މި ސީޒަނަށްފަހު މެންޗެސްޓާ ސިޓީ ދޫކޮށްލަން އާޖެންޓީނާގެ ތަޖުރިބާކާރު ފޯވާޑް ސާޖިއޯ އަގުއޭރޯ ނިންމުމުންނެވެ. ރިޕޯޓުތައް ބުނާ ގޮތުން އަންނަ ސީޒަނަށް ބޮޑު ޚަރަދެއް ކުރަން ސިޓީން ތައްޔާރުވަމުން އަންނައިރު، ހާލަންޑާއެކު މެސީ ހޯދަން ސިޓީން މިހާރު އަންނަނީ ތައްޔާރުވަމުންނެވެ. އެކަމަކު އަގުބޮޑު ދެ ކުޅުންތެރިއަކު ހޯދައިފިނަމަ، ފައިނޭންޝިއަލް ފެއާޕްލޭ (އެފްއެފްޕީ) ގަވާއިދާ ސިޓީ ޚިލާފުވާނެ ކަމަށް ރިޕޯޓުތައް ބުނެއެވެ.

ހިލޭ ޓްރާންސްފާއެއްގެ ދަށުން މެސީއަށް ސިޓީއާ ގުޅުމުގެ ފުރުޞަތު އޮތް ނަމަވެސް، ކުރިއަށް އޮތް ހޫނު މޫސުމުގެ ޓްރާންސްފާގައި ޑޯޓްމުންޑުން ހާލަންޑް ވިއްކާނީ 180 މިލިޔަން ޔޫރޯއަށް ކަމަށް ރިޕޯޓުތައް ވަނީ ބުނެފައެވެ.

މެސީ ހޯދަން ސިޓީން އަދިވެސް މަސައްކަތް ކުރަމުން އަންނައިރު، ރިޕޯޓުތައް ބުނާ ގޮތުން މެސީގެ ވިސްނުން މިހާރު ހުރީ 2023 ވަނަ އަހަރުގެ ނިޔަލަށް ބާސާގައި މަޑުކުރުމަށްފަހު، އޭގެ ފަހުން އެމެރިކާގެ މޭޖާ ލީގު ސޮކާ (އެމްއެލްއެސް) އަށް ބަދަލުވުމަށެވެ. އަދި އަގުއޭރޯ ހޯދުމަށް ބާސާއިން މަސައްކަތް ކުރަމުން އަންނައިރު، އަންނަ ސީޒަނުގައި ގާތް ދެ އެކުވެރިން ކަމަށްވާ އަގުއޭރޯ އާއި މެސީ، އެއް ކުލަބަކުން ފެނިގެންދިޔުން ގާތް ކަމަށް ރިޕޯޓުތައް ބުނެއެވެ.