މާލެއަށްވުރެ އަތޮޅުތެރޭގެ ކޭސްތައް އިތުރު، މިއަދު އެކަނި ވެސް 241 މީހުން ޕޮޒިޓިވް!
ބުދަ ދުވަހު އެންމެ ގިނަ އަދަދަކަށް މީހުން ޕޮޒިޓިވްވެފައިވަނީ ސިނާއީ ރަށްތަކުން
މަގުމަތީގައި މީހުން ގިނަވެފައިވާ ދަނޑިވަޅު
ފާއިތުވެދިޔަ 24 ގަޑިއިރުގެ ތެރޭގައި ރާއްޖެއިން 241 މީހަކު ކޮވިޑް-19ށް ޕޮޒިޓިވްވެފައިވާ ކަމަށް ހެލްތު ޕްރޮޓެކްޝަން އެޖެންސީ (އެޗްޕީއޭ)ން ބުނެފިއެވެ.
އެޗްޕީއޭއިން އެންމެ ފަހުން ނެރުނު ތަފާސް ހިސާބުތައް ދައްކާ ގޮތުން އަންގާރަ ދުވަހުގެ ހަވީރު 06:00ން ފެށިގެން ބުދަ ދުވަހުގެ ހަވީރު 06:00 އާއި ހަމައަށް ރާއްޖެއިން 3،850 މީހުން ކޮވިޑަށް ޓެސްޓު ކޮށްފައިވާއިރު އޭގެ ތެރެއިން 241 މީހަކު ކޮވިޑަށް ޕޮޒިޓިވްވެފައިވާ ކަމަށެވެ.
ރާއްޖެއިން ޕޮޒިޓިވްވި 241 މީހުންގެ ތެރެއިން 73 މީހުން ޕޮޒިޓިވްވެފައިވަނީ މާލޭ ސިޓީންނެވެ. އަތޮޅު ތެރެއިން 74 މީހަކު ޕޮޒިޓިވްވެފައިވާއިރު، ރިސޯޓުތަކުން 15 މީހަކު ވަނީ ޕޮޒިޓިވްވެފައެވެ. އަދި ސިނާއީ ރަށްތަކުން 79 މީހަކު ކޮވިޑަށް ޕޮޒިޓިވްވެފައިވާ ކަމަށް އެޗްޕީއޭގެ ތަފާސް ހިސާބުތައް ދައްކައެވެ. މިއީ އަތޮޅު ތެރެއިން އެއްދުވަހާ އެންމެ ގިނަ މީހުން ޕޮޒިޓިވްވި ދުވަހެވެ. އަތޮޅު ތެރޭގެ ގިނަ ކޭސްތައް ފެނިފައިވަނީ ޅ. ނައިފަރުންނާއި ކ. ހުރާއިންނެވެ.
އިތުރު 241 މީހަކު ކޮވިޑަށް ޕޮޒިޓިވްވުމާއިއެކު ރާއްޖެއިން ޕޮޒިޓިވްވި މީހުންގެ އަދަދު 24،079ށް ވަނީ އަރާފައެވެ. އަދި އެކްޓިވް ކޭސްތަކުގެ އަދަދު 2،849ށް އިތުރުވެފައިވާއިރު ހޮސްޕިޓަލުގައި އެޑްމިޓް ކޮށްގެން 99 މީހަކަށް އަންނަނީ ފަރުވާ ދެމުންނެވެ. ރާއްޖެއިން މި ބަލީގައި 67 މީހަކު ނިޔާވެފައިވާއިރު، 21،155 މީހުން ވަނީ ބަލިން ފަސޭހަވެފައެވެ.
ރާއްޖެއަށް ކޮވިޑްގެ ތިންވަނަ ރާޅު ބިންދާލާފައިވާ ކަމަށް ސިއްހީ މާހިރުން ބުނަމުން އަންނައިރު، މިއަހަރުގެ ތެރޭގައި 200ން މަތިން ކޮވިޑަށް އެއް ދުވަސްތެރޭގައި ޕޮޒިޓިވްވި މިއީ ދެވަނަ ފަހަރެވެ.
މާލެ ސަރަހައްދުގެ ކޮވިޑް ކޭސްތައް ކޮންޓްރޯލްވެފައި ނުވާއިރު، އަތޮޅުތެރެއިން ފެންނަ ކޭސްތައް ދަނީ އިތުރުވަމުންނެވެ. ޕޮޒިޓިވް ކޭސްތައް ފެނި އަތޮޅު ތެރޭގެ ރަށްތައް ދަނީ މޮނިޓަރިންގެ ހާލަތަށް ލަމުންނެވެ. މިހާތަނަށް 54 ރަށަކުން އެކްޓިވް ކޭސް ފެނިފައިވާ އިރު، 647 އެކްޓިވް ކޭސް ހިމެނެއެވެ.
