ޗައިނާއިން ހަދިޔާކުރި ވެކްސިނުގެ ދެ ވަނަ ބެޗް މިރޭ ރާއްޖެ ގެންނަނީ
30 މާރިޗު 2021 | އަންގާރަ 10:54ސިނޮފާރމް ވެކްސިންގެ 200،000 ޑޯޒު ރާއްޖެއަށް ހަދިޔާކުރުމަށް ވަނީ ހަމަޖެހިފައި
ޗައިނާއިން ހަދިޔާކުރި ސިނޯފަރމް ވެކްސިންއާއި ހަވާލުކުރުމަށް ބޭއްވި ރަސްމިއްޔާތުގެ ތެރެއިން
ޗައިނާއިން ހަދިޔާކުރާ ވެކްސިންގެ ދެވަނަ ޝިޕްމަންޓް މިރޭ ރާއްޖެ އައުމަށް ހަމަޖެހިފައިވާ ކަމަށް މޯލްޑިވިއަނުން ބުނެފިއެވެ.
މޯލްޑިވިއަނުން ކުރި ޓްވީޓެއްގައި ބުނީ ޗައިނާގެ ސިނޯފަރމް ވެކްސިންގެ ދެ ވަނަ ޝިޕްމަންޓް މިރޭ އައުމަށް ހަމަޖެހިފައިވާކަމަށެވެ.
ޗައިނާއިން ރާއްޖެއަށް ހަދިޔާކުރި ސިނޮފާރމް ވެކްސިންގެ ފުރަތަމަ ބެޗް ސަރުކާރާ ހަވާލުކޮށްފައިވަނީ މާރޗް މަހުގެ 25 ވަނަ ދުވަހުއެވެ. އެކަމަށްޓަކައި ބޭއްވި ރަސްމިއްޔާތުގައި ވާހަކަ ދައްކަވަމުން ހެލްތު މިނިސްޓަރ އަހްމަދު ނަސީމް ވިދާޅުވީ، ޗައިނާ ސަރުކާރުން ރާއްޖެއަށް ހަދިޔާކުރި ވެކްސިނުގެ ސަބަބުން ރާއްޖޭގެ ވެކްސިން ޕްރޮގްރާމް މެދެ ކެނޑުމެއްނެތި ކުރިއަށްދާނެ ކަމަށެވެ. ޗައިނާ ސަރުކާރުން ރާއްޖެއަށް ހަދިޔާ ކޮށްފައިވަނީ ސިނޮފާރމް ވެކްސިންގެ 200،000 ޑޯޒެވެ. އޭގެ ފުރަތަމަ 100،000 ޑޯޒް ރާއްޖެ ގެނައީ މާރޗް މަހުގެ 24 ވަނަ ދުވަހުގެ ރެއެވެ. ބާކީ 100،000 ޑޯޒް ރާއްޖެ ގެންނާނީ މި މަހުގެ 30ގައި ކަމަށް އެ ރަސްމިއްޔާތުގައި މިނިސްޓަރ ވިދާޅުވިއެވެ.
ވެކްސިނާއެކު އިތުރު މެޑިކަލް އިކުއިޕްމެންޓް ލިބިފައިވާކަން ފާހަގަ ކުރައްވަމުން، ސިއްހީ ދާއިރާއިން ރާއްޖެއަށް ޗައިނާއިން ވަމުން އަންނަ އެހީތެރިކަމަށް ޝުކުރު އަދާކުރެއްވިއެވެ.
