ފާއިތުވި ހަފުތާގައި ކޮވިޑް-19 ވެކްސިންގެ ދެވަނަ ޑޯޒް 96 މީހުން ޖަހާފައިވާކަމަށް ހެލްތު ޕްރޮޓެކްޝަން އެޖެންސީ (އެޗްޕީއޭ)ގެ ތަފާސްހިސާބުތަކުން ދައްކައިފިއެވެ.
އެޗްޕީއޭއިން ހާމަކޮށްފައިވާ ތަފާސްހިސާބުތަކަށް ބަލާއިރު ޖުލައި 30 ވަނަ ދުވަހާ ހަމައަށް 922 މީހުން ވަނީ ބޫސްޓަރ ދެވަނަ ޑޯޒް ޖަހާފައެވެ. ކޮވިޑް-19ން ރައްކާތެރިވުމަށް ވެކްސިންގެ ތިން ޑޯޒް ފުރިހަމަކޮށްފައިވާ މީހުންގެ ތެރެއިން 65 އަހަރުން މަތީގެ މީހުންނާއި, ބަލިޖެހުމުން ނުރައްކާ ބޮޑުވެދާނެކަމަށް ބެލެވޭ މީހުންނަށް ހަތަރުވަނަ ޑޯޒެއް ޖެހުމަށް ނިންމައި އެކަން އެޗްޕީއޭއިން ހާމަކޮށްފައިވަނީ މިދިޔަ ޖޫން މަހުގެ 22 ވަނަ ދުވަހުއެވެ.
މިހާތަނަށް ބޫސްޓަރ ފުރަތަމަ ޑޯޒް ޖަހާފައިވަނީ 165،860 މީހުންނެވެ. މިދިޔަ ހަފުތާގައި 177 މީހުން ވަނީ ބޫސްޓަރ ޑޯޒް ޖަހާފައެވެ.
މީގެއިތުރުން ވެކްސިންގެ ދެވަނަ ޑޯޒް 384،747 މީހުން ޖަހާފައިވާއިރު ކޮވިޑް ވެކްސިންގެ ފުރަތަމަ ޑޯޒް 398،995 މީހުން ވަނީ ޖަހާފައެވެ.
