ލެވަންޑޯސްކީއަށް އިންގްލެންޑާ ދެކޮޅަށް ނުކުޅެވޭނެ

ކަކުލަށް ލިބުނު އަނިޔާގެ ސަބަބުން ފީފާ ވޯލްޑް ކަޕުގެ ޔޫރަޕް ކޮލިފައިންގައި އިންގްލެންޑާ ދެކޮޅަށް ޕޮލެންޑް ކުޅޭ މެޗުގައި ތަޖުރިބާކާރު ފޯވާޑް ރޮބަޓް ލެވަންޑޯސްކީއަށް ނުކުޅެވޭނެކަން ޔަގީންވެއްޖެއެވެ.

ލެވަންޑޯސްކީއަށް އަނިޔާވީ ކޮލިފައިންގައި އާދީއްތަ ދުވަހުގެރޭ އެންޑޯރާ އަތުން 3-0 ގެ ނަތީޖާއަކުން ޕޮލެންޑް މޮޅުވި މެޗުގައެވެ. އެ މެޗުގައި ލެވަންޑޯސްކީ ދެ ލަނޑު ޖެހި ނަމަވެސް، އޭގެ ފަހުން ކަކުލަށް އަނިޔާވެ އޭނާ ވަނީ ބަދަލުކޮށްފައެވެ. އެއާއެކު އެ މެޗަށްފަހު ލެވަންޑޯސްކީގެ އިތުރު ޓެސްޓުތައް ހެދިއިރު، މަދުވެގެން 10 ދުވަހަށް އޭނާ ކުޅުމާ ދުރަށްދާން ޖެހިފައިވާކަން ޕޮލިޝް އެފްއޭއިން ވަނީ ހާމަކޮށްފައެވެ.

އެހެންކަމުން ކޮލިފައިންގެ ގްރޫޕް އައިގައި ބުދަ ދުވަހުގެރޭ އިންގްލެންޑާ ދެކޮޅަށް ޕޮލެންޑް ކުޅޭ މެޗުގައި ލެވަންޑޯސްކީއަށް ނުކުޅެވޭނެއެވެ. އިންގްލެންޑާ ދެކޮޅަށް ޕޮލެންޑް ނުކުންނައިރު، ގްރޫޕް އައިގެ އެއްވަނައިގައި އިންގްލެންޑް އޮތީ ކުޅުނު ދެ މެޗުންވެސް މޮޅުވެ ހަ ޕޮއިންޓާއެކުއެވެ. އެކަމަކު ކޮލިފައިންގައި ކުޅުނު ފުރަތަމަ މެޗުން ހަންގޭރީއާ ޕޮލެންޑް އެއްވަރުވުމުން، ތާވަލުގެ ދެވަނައިގައި ޕޮލެންޑް އޮތީ ދެ މެޗުން ހަތަރު ޕޮއިންޓާއެކުއެވެ.

ލެވަންޑޯސްކީގެ ކަކުލަށް އަނިޔާވިއިރު، އަންނަ ހޮނިހިރު ދުވަހުގެރޭ ޖަރުމަން ލީގުގެ އެންމެ ފަހުގެ ޗެމްޕިއަން ބަޔާން މިއުނިކުން، ތާވަލުގެ ދެވަނައިގައި އޮތް އާރްބީ ލައިޕްޒީގާ ދެކޮޅަށް ނުކުންނާނެއެވެ. އެހެންކަމުން އެ މެޗުގައިވެސް ލެވަންޑޯސްކީއަށް ނުކުޅެވޭއިރު، އެއީ ބަޔާނަށް ލިބިގެންދާނެ ބޮޑު ގެއްލުމެކެވެ.

އެގޮތުން މި ފަހަކަށް އައިސް ބަޔާނުގައި ލެވަންޑޯސްކީ ތަފާތު މޮޅު ކުޅުމެއް ދައްކަމުން އަންނައިރު، މި ސީޒަނުގެ ލެވަންޑޯސްކީ މިހާތަނަށް ވަނީ ޖަރުމަން ލީގުގައި 35 ލަނޑު ޖަހާފައެވެ. އަދި މި ސީޒަނުގައި ބަޔާނާއެކު ހުރިހާ މުބާރާތެއްގައި ލެވަންޑޯސްކީ ވަނީ 42 ލަނޑު ކާމިޔާބުކޮށްފައެވެ.