ލެވަންޑޯސްކީގެ ދެ ލަނޑާ އެކު ރެއާލް ބަލިކޮށް، ބާސެލޯނާ އިން ލީޑު ފުޅާ ކޮށްފި

ސްޕެނިޝް ލީގުގައި އެންމެ ފަހުގެ ޗެމްޕިއަން ރެއާލް މެޑްރިޑާ ދެކޮޅަށް ކުޅުނު މެޗުން މޮޅުވެ، ބާސެލޯނާ އިން އެއް ވަނައިގައި ލީޑު ފުޅާ ކޮށްފި އެވެ.

ރެއާލްގެ އަމިއްލަ ދަނޑުގައި ހޮނިހިރު ދުވަހުގެ ރޭ ކުޅުނު މެޗު ބާސެލޯނާ އިން ކާމިޔާބު ކުރީ 4-0 އިންނެވެ. މެޗުގައި ބާސެލޯނާ އިން އެ ޓީމުގެ ހަތަރު ލަނޑު ވެސް ޖެހީ މެޗުގެ ފަހު ހާފުގަ އެވެ. ބާސެލޯނާއާ ދެކޮޅަށް ކުޅުނު މެޗުން ބަލި ނުވެ ފަރުޖައްސާލައިގެން، ރެއާލަށް ރެކޯޑެއް ޤާއިމު ކުރުމުގެ ފުރުސަތު ވެސް އޮތެވެ. އެއީ ލީގުގައި ބަލި ނުވެ ބާސެލޯނާ އިން ހަމަކޮށްފައިވާ 43 މެޗުގެ ރެކޯޑެވެ. ބާސެލޯނާއާ ދެކޮޅަށް ކުޅުނު މެޗަކީ ލީގުގައި ބަލި ނުވެ ރެއާލް ކުޅުނު 43 ވަނަ މެޗެވެ. ނަމަވެސް އެ މެޗުން ރެއާލް ވަނީ ބަލިވެފަ އެވެ.

މެޗުގެ ފުރަތަމަ ހާފުގެ 30 ވަނަ މިނެޓުގައި ރެއާލް އިން ވަނީ ލަނޑު ޖަހައި ލީޑު ނަގައިފަ އެވެ. ފްރާންސްގެ ކެޕްޓަން ކީލިއަން އެމްބާޕޭ ލަނޑު ޖަހައި ރެއާލަށް ކުރި ހޯދައިދިން ނަމަވެސް، ވީޑިއޯ އެސިސްޓެންޓު ރެފްރީ (ވީއޭއާރު) އިން ވަނީ އެ ލަނޑު ބަަަލައި ނުގަންނަން ނިންމައިފަ އެވެ. އެއީ ލަނޑު ޖެހުމުގެ ކުރިން އެމްބާޕޭ އޮފްސައިޑުގައި ހުރުމުންނެވެ.

މެޗުގެ ދެ ވަނަ ހާފު ފަށައިގެން ނުވަ ވަނަ މިނެޓުގައި ބާސެލޯނާ އަށް ލީޑު ނަގައިދިނީ ޕޮލެންޑުގެ ފޯވާޑު ރޮބާޓް ލެވަންޑޯސްކީ އެވެ. އޭގެ ދެ މިނެޓު ފަހުން ލެވަންޑޯސްކީ ވަނީ ދެ ވަނަ ލަނޑެެއް ޖަހައި ބާސެލޯނާ އަށް ލީޑު ފުޅާ ކޮށްދީފަ އެވެ. މެޗުގައި ބާސެލޯނާގެ ތިން ވަނަ ލަނޑު 77 ވަނަ މިނެޓުގައި ޖެހީ ޔަމީން ޔަމާލް އެވެ. ބާސެލޯނާގެ ހަތަރު ވަނަ ލަނޑު 84 ވަނަ މިނެޓުގައި ޖެހީ ބްރެޒިލްގެ ރަފީނިއާ އެވެ.

މޮޅާ އެކު ބާސެލޯނާ އިން ވަނީ އެއް ވަނައިގައި ހަ ޕޮއިންޓުގެ ލީޑެއް ނަގައިފަ އެވެ. އެއީ މިހާތަނަށް ކުޅުނު 11 މެޗުން 30 ޕޮއިންޓު ހޯދައިގެންނެވެ. ހަމަ އެ އަދަދަށް މެޗު ކުޅެގެން ދެ ވަނައިގައި އޮތް އެންމެ ފަހުގެ ޗެމްޕިއަން ރެއާލަށް ލިބެނީ 24 ޕޮއިންޓެވެ. ބާސެލޯނާ އަތުން ވީ ބައްޔަކީ މި ސީޒަންގެ ސްޕެނިޝް ލީގުގައި ރެއާލްގެ ފުރަތަމަ ބައްޔެވެ.