ލެވަންޑޯސްކީގެ ދެ ލަނޑާއެކު ބާސެލޯނާ މޮޅުވެއްޖެ

ސްޕެނިޝް ލީގުގައި ޑިޕޯޓީވޯ އަލަވޭސްއާ ދެކޮޅަށް ކުޅުނު މެޗުން އެންމެ ފަހުގެ ޗެމްޕިއަން ބާސެލޯނާ މޮޅުވެއްޖެ އެވެ.

ލީގުގައި އާދީއްތަ ދުވަހުގެ ރޭ ބާސެލޯނާގެ ދަނޑުގައި ކުޅުނު މެޗު އެ ޓީމުން ކާމިޔާބު ކުރީ 2-1 އިންނެވެ. މެޗުގައި ފުރަތަމަ ލަނޑު ޖަހައި ކުރި ހޯދީ އަލަވޭސް އިންނެވެ. މެޗު ފަށައިގެން 16 ވަނަ ސިކުންތުގައި އެ ޓީމުން ވަނީ ލަނޑު ޖަހައިފަ އެވެ. ހަވީ ލޮޕޭޒް ތަނަވަސްކޮށްދިން ފުރުސަތެއްގައި އެ ޓީމަށް ލީޑު ނަގައިދިނީ ސަމުއެލް އޮމޮރޮޑިއޯން އެވެ. ބާސެލޯނާ އިން އެ ޓީމުގެ ދެ ލަނޑު ވެސް ޖެހީ ދެ ވަނަ ހާފުގަ އެވެ. ދެ ވަނަ ހާފު ފަށައިގެން އަށް ވަނަ މިނެޓުގައި، އެ ޓީމަށް ނަތީޖާ ހަމަހަމަ ކޮށްދިނީ ޕޮލެންޑުގެ ކެޕްޓަން ރޮބާޓް ލެވަންޑޯސްކީ އެވެ. އޭނާ އެ ލަނޑު ޖަހަން ފުރުސަތު ތަަނަވަސްކޮށްދިނީ ޖޫލްސް ކޫންޑޭ އެވެ. މެޗުން ބާސެލޯނާ މޮޅުކޮށްދިން ލަނޑު ޖެހީ ވެސް ލެވަންޑޯސްކީ އެވެ. އެއީ ލިބުނު ޕެނަލްޓީއެއް ކާމިޔާބުކޮށް، 78 ވަނަ މިނެޓުގައި އޭނާ ޖެހި ލަނޑެވެ.

މޮޅާއެކު ވެސް ބާސެލޯނާ އޮތީ ލީގު ތާވަލްގެ ތިން ވަނައިގަ އެވެ. އެއީ މިހާތަނަށް ކުޅުނު 13 މެޗުން 30 ޕޮއިންޓާއެކު އެވެ. ހަމަ އެ އަދަދަށް މެޗު ކުޅެގެން ދެ ވަނައިގައި ރެއާލް މެޑްރިޑަށް ލިބެނީ 32 ޕޮއިންޓެވެ. އެއް ވަނައިގައި ޖިރޯނާ އޮތީ 34 ޕޮއިންޓާއެކު އެވެ.