ބާސެލޯނާ ދޫކޮށްލަން ލެވަންޑޯސްކީ ބޭނުމެއް ނުވޭ

ބާސެލޯނާ އަށް ކުޅެމުން އަންނަ ޕޮލެންޑުގެ ފޯވާޑް ރޮބާޓް ލެވަންޑޯސްކީ އެ ކުލަބު ދޫކޮށްލަން ބޭނުންނުވާ ކަމަށް، އޭނާގެ އެޖެންޓް ބުނެފި އެވެ.

ޖަރުމަނުގެ ބަޔާން މިއުނކް ދޫކޮށް ލެވަންޑޯސްކީ ބާސެލޯނާ އަށް ބަދަލުވީ މިދިޔަ އަހަރު އެވެ. އެ ކުލަބާއެކު އޭނާ ސޮއި ކުރީ ހަތަރު އަހަރު ދުވަހުގެ އެއްބަސްވުމެއްގަ އެވެ. އެ އެއްބަސްވުމުގެ މުއްދަތު ހަމަވާނީ 2026 ވަނަ އަހަރުގެ ޖޫން މަހުގެ ނިޔަލަށެވެ. ބާސެލޯނާ އަށް ބަދަލުވެ، މިދިޔަ ސީޒަނުގައި އޭނާ ވަނީ އެ ކުލަބުގައި މޮޅު ކުޅުމެއް ވެސް ދައްކައިފަ އެވެ.

އެގޮތުން މިދިޔަ ސީޒަންގަައި ބާސެލޯނާ އަށް ކުޅެދިން 46 މެޗުން އޭނާ ވަނީ 33 ލަނޑު ޖަހައިފަ އެވެ. މިދިޔަ ސީޒަންގެ ސްޕެނިޝް ލީގުގެ އެންމެ ގިނަ ލަނޑު ޖެހި ކުޅުންތެރިޔަކަށް ވެސް ހޮވުނީ އޭނާ އެވެ. ނަމަވެސް، މި ސީޒަންގައި ލެވަންޑޯސްކީގެ ފަރާތުން ބާސެލޯނާގައި އެންމެ އެކަށީގެންވާ ކުޅުމެއް ނުދެއްކޭތީ، އޭނާ އަށް ކުލަބުގެ ސަޕޯޓަރުންގެ ފާޑު ކިޔުން ވެސް އަމާޒުވެ އެވެ. މި ސީޒަންގައި ބާސެލޯނާ އަށް ކުޅެދިން 20 މެޗުން އޭނާ ޖަހާފަައި ވަނީ ނުވަ ލަނޑެވެ.

ދާދި ފަހުން ސްޕެއިންގެ މީޑިއާ ތަކުގައި ރިޕޯޓުކޮށްފައިވާ ގޮތުން ބާސެލޯނާ އިން އަންނަނީ ލެވަންޑޯސްކީ ވިއްކާލުމަށް ތައްޔާރުވަމުންނެވެ. ނަމަވެސް، ލެވަންޑޯސްކީގެ އެޖެންޓް ވަނީ އެ ވާހަކަތައް ދޮގު ކޮށްފަ އެވެ. އޭނާގެ އެޖެންޓް ޕިނީ ޒަހާވީ ބުނީ، ލެވަންޑޯސްކީގެ ކުރިމަގު އޮތީ ބާސެލޯނާ އާއެކު ކަމަށެވެ. އޭނާ ބުނީ، ބާސެލޯނާ ދޫކޮށްލަން ލެވަންޑޯސްކީ ބޭނުންނުވާ ކަމަށާއި، ލެވަންޑޯސްކީ ހުންނާނީ ބާސެލޯނާގައި ކަމަށެވެ. ލެވަންޑޯސްކީ އާމެދު ބާސެލޯނާ އިން ހިތްހަމަ ޖެހޭކަން ފާހަގަކޮށް އޭނާ ބުނީ، ލެވަންޑޯސްކީ ވެސް ހުރީ ބާސެލޯނާގައި ހިތްހަމަ ޖެހިގެން ކަމަށެވެ.

ބާސެލޯނާގެ ކޯޗު ޒަވީ ހެނާންޑޭޒް އެންމެ ބޮޑަށް ބަރޯސާވާ ކުޅުންތެރިންގެ ތެރޭގައި ވެސް ލެވަންޑޯސްކީ އަކީ ހިމެނޭ ކުޅުންތެރިޔެކެވެ. މިފަހުން ލެވަންޑޯސްކީގެ ކުޅުން ދަށްވާ މައްސަލައިގައި ވެސް ޒަވީ ވަނީ ލެވަންޑޯސްކީ ދިފާއު ކޮށްފަ އެވެ. ޒަވީ ބުނީ، އެއްވެސް ކުޅުންތެރިޔަކަށް އަބަދު އެއް ފެންވަރެއްގައި ކުޅުމަކީ އުނދަގޫ ކަމަކަށް ވާނެ ކަމަށާއި، ލެވަންޑޯސްކީ އާމެދު އޭނާ އަށް އިތުބާރު އޮންނަ ކަމަށެވެ.