ޓީސީ މެޗަށް ނުކުންނައިރު ދެ ޓީމަށްވެސް ހަމަހަމަ: މޯހަން

ދިރާގު ދިވެހި ޕްރިމިއާ ލީގުގައި އަންގާރަ ދުވަހުގެރޭ ޓީސީ ސްޕޯޓްސް ކުލަބާ ދެކޮޅަށް ނުކުންނައިރު، ދެ ޓީމަށްވެސް ހަމަހަމަވާނެ ކަމަށް ސުޕަ ޔުނައިޓެޑް ސްޕޯޓްސް (ސަސް) ގެ ކޯޗު މުޙައްމަދު ޝިޔާޒް (މޯހަން) ބުނެފިއެވެ.

ބޮޑު މެދުކެނޑުމަކަށްފަހު ލީގުގެ ކުޅުން މިދިޔަ ހުކުރު ދުވަހު ފެށިއިރު، ސަސްއިން ވަނީ ހުކުރު ދުވަހުގެ ހަވީރު މެޗެއް ކުޅެފައެވެ. އެގޮތުން ކުލަބު އީގަލްސްއާ ސަސް ވާދަކުރިއިރު، އެ މެޗުން ސަސް ވަނީ 2-1 ގެ ނަތީޖާއަކުން ބަލިވެފައެވެ. އެކަމަކު މެދުކެނޑުމަކަށްފަހު ލީގުގައި ޓީސީން އަދި މެޗެއް ކުޅެފައެއް ނުވެއެވެ.

ލީގުގައި އަންގާރަ ދުވަހުގެރޭ ޓީސީއާ ދެކޮޅަށް ނުކުތުމުގެ ކުރިން އާދީއްތަ ދުވަހު ބޭއްވި ނޫސްވެރިންގެ ބައްދަލުވުމުގައި ވާހަކަދައްކަމުން މޯހަން ބުނީ މި މެޗަށް ނުކުންނައިރު ސަސްއަށް އޮތް ފައިދާއަކީ ލީގުގައި މެޗެއް ކުޅެ، ކުޅުންތެރިންނަށް މެޗު ފިޓްނަސް ލިބުން ކަމަށެވެ. އެކަމަކު އޭގެ ގެއްލުންވެސް ސަސްއަށް އެބައޮތް ކަމަށާއި، އެގޮތުން ގާތްގާތުގައި މެޗުތަކެއް ކުޅެން ޖެހުމުން، ކުޅުންތެރިންނަށް ވަރިބަލިވުމުގެ އަސަރުކުރާނެ ކަމަށް މޯހަން ވަނީ ބުނެފައެވެ. އެހެންކަމުން މި މެޗުގައި ދެ ޓީމަށްވެސް ހަމަހަމަވާނެ ކަމަށާއި، މި މެޗުން ނަތީޖާ ނެރުމަށް އެންމެ މުހިންމީ ކުޅުންތެރިންގެ ހިތްވަރު ކަމަށްވެސް ވަނީ ބުނެފައެވެ.

މޯހަން އިތުރަށް އެންމެ ފަހުން އީގަލްސްއާ ދެކޮޅަށް ކުޅުނު މެޗުގައި، ކުޅުންތެރިންގެ ފަރާތުން ފެނުނު ކުޅުމާ މެދު ހިތްހަމަޖެހޭ ކަމަށާއި، ނަމަވެސް ކުދިކުދި ގޯސްތަކެއް ފެނިގެންދިޔައިރު، އެކަންކަން ރަނގަޅު ކުރުމަށް ގިނަ މަސައްކަތްތަކެއް ކުރަން ޖެހޭ ކަމަށެވެ. އެގޮތުން ސަސްގެ ޒިންމާ އޭނާއާ ހަވާލުކުރީވެސް އެ ޓީމުގެ ކުޅުން ބަދަލުކޮށް، ރީތި ފުޓްބޯޅައެއް ކުޅުވަން ކަމަށާއި، އެކަމަށް މަސައްކަތްކުރަމުން އަންނަ ކަމަށްވެސް މޯހަން ވަނީ ބުނެފައެވެ. އަދި ނުކުންނަ ނަތީޖާއާ ދޭތެރޭ މި ވަގުތު މާ ބޮޑަށް ނުވިސްނި ކަމުގައިވީ ނަމަވެސް، ގަދަ ހަޔެއްގެ ޖާގައެއް ހޯދުން މުހިންމު ކަމަށްވެސް ވަނީ ބުނެފައެވެ.

ލީގުގައި އަންގާރަ ދުވަހުގެރޭ ޓީސީ އާއި ސަސް ބައްދަލުކުރާއިރު، ލީގު ތާވަލުގެ ހަވަނައިގައި ޓީސީ އޮތީ ކުޅުނު ނުވަ މެޗުން ލިބުނު ނުވަ ޕޮއިންޓާއެކުގައެވެ. އަދި ތާވަލުގެ ހަތްވަނައިގައި ސަސް އޮތްއިރު، އެ ޓީމަށް ނުވަ މެޗުން ލިބިފައިވަނީ އަށް ޕޮއިންޓެވެ.

ދިރާގު ދިވެހި ޕްރިމިއާ ލީގުގައި ޓީސީ އާއި ސަސް ބައްދަލުކުރާ މެޗު ފަށާނީ އަންގާރަ ދުވަހުގެރޭ 21:00 ގައެވެ.