ވީއޭއެމުގެ އިންތިޚާބަށް ކުރިމަތިލާން ހުޅުވާލައިފި

ކުރިއަށް އޮތް ވޮލީބޯލް އެސޯސިއޭޝަން އޮފް މޯލްޑިވްސް (ވީއޭއެމް) ގެ އިންތިޚާބަށް ކުރިމަތިލާން ހުޅުވާލައިފިއެވެ.

ދާދި ފަހުން ދުނިޔޭގެ ވޮލީބޯޅައިގެ މައި ޖަމުޢިއްޔާ (އެފްއައިވީބީ) އާއި އޭޝިއަން ވޮލީބޯލް ކޮންފެޑެރޭޝަން (އޭވީސީ) އިސްވެ އޮވެ އުފައްދާފައިވާ "އެޑްހޮކް ކޮމިޝަން" އިން ވަނީ ވީއޭއެމުގެ މައްސަލަ ނިންމައި، އައު އިންތިޚާބަކަށް ދިޔުމަށް ގައިޑްލައިނެއް އެކުލަވާލާފައެވެ. އެގޮތުން އެފްއައިވީބީގެ ނިންމުމާއެކު ވީއޭއެމުގެ އިންތިޚާބީ ކޮންގްރެސްއަށް ތައްޔާރުވުމުގެ ގޮތުން ބާއްވާ އެކްސްޓްރާ އޯޑިނަރީ ކޮންގްރެސް ބުދަ ދުވަހު ބޭއްވިއިރު، އިންތިޚާބީ ކޮންގްރެސް އަންނަ އޭޕްރީލް މަހުގެ އެއްވަނަ ދުވަހު ބޭއްވުމަށް އެފްއައިވީބީން ވަނީ އެދިފައެވެ. އެހެންކަމުން ބުދަ ދުވަހުގެ އެކްސްޓްރާ އޯޑިނަރީ ކޮންގްރެސްގައި ކުލަބުތަކުން ވަނީ އަންނަ މަހުގެ އެއްވަނަ ދުވަހު އިންތިޚާބު ބާއްވަން ނިންމާފައެވެ.

އާދީއްތަ ދުވަހު ވީއޭއެމުން ނެރުނު ބަޔާނެއްގައި ބުނެފައިވަނީ ވީއޭއެމުގެ ކުރިއަށް އޮތް ދައުރަށް އިންތިޚާބުކުރެވޭ ހިންގާ ކޮމިޓީ މެމްބަރުންނާއި އިންތިޚާބު ކުރެވޭ ކޮމިޝަން މެންބަރުން ހޮވުމައްޓަކައި ބާއްވާ ޖެނެރަލް އިލެކްޓޯރަލް އެސެމްބްލީ އޭޕްރީލް މަހުގެ އެކެއްވާ ބުރާސްފަތި ދުވަހުގެ ހަވީރު 04:00 ގައި ބޭއްވުމަށްހަމަޖެހިފައިވާ ކަމަށެވެ. އަދި އެ އެސެމްބްލީ ބޭއްވުމަށް ހަމަޖެހިފައިވަނީ ވާޗުއަލްކޮށް ކަމަށާއި، އެހެންނަމަވެސް އެ އެސޯސިއޭޝަނުގެ އަސާސީ ގަވާއިދާ އެއްގޮތަށް ވޯޓުލުމުގެ ކަންތައްތައް ކުރިއަށް ގެންދިއުމަށްޓަކައި، އެކަން ކުރިއަށްދާނީ ޒުވާނުންގެ މަރުކަޒުގެ ސެމިނާ ރޫމުގައި، އިލެކްޓޯރިއަލް ކޮމިޓީއެއްގެ ބެލުމުގެ ދަށުން ކަމަށްވެސް ވަނީ ބުނެފައެވެ.

ވީއޭއެމުގެ އިންތިޚާބުގައި ހޮވުމަށް ހަމަޖެހިފައިވާ މަޤާމުތަކަކީ ރައީސާއި، ނައިބު ރައީސާއި،ޚަޒާންދާރާއި، ޓެކްނިކަލް އެންޑް ޑިވެލޮޕިމެންޓް ކޮމިޝަނުގެ ތިން މެންބަރުންނާއި، ރޫލްސް ކޮމިޝަނުގެ ތިން މެންބަރުންގެ އިތުރުން ބީޗްވޮލީ ކޮމިޝަނުގެ ހަ މެންބަރުންނެވެ. މި މަޤާމުތަކަށް ކުރިމަތިލުމުގެ ފުރުޞަތު ހުޅުވާލިއިރު، މި އިންތިޚާބުގައި ބައިވެރިވުމަށް ވީއޭއެމުގެ "ޖެނެރަލް އިލެކްޓޯރިއަލް އެސެމްބްލީ - ކެންޑިޑެސީ ރެޖިސްޓްރޭޝަން ފޯމް" ފުރިހަމަކުރުމަށްފަހު މި މަހުގެ 30 ވަނަ ދުވަހުގެ މެންދުރު 12:00 ގެ ކުރިން ވީއޭއެމުގް އެލެކްޓޯރަލްޚާއްޞައީމެއިލް vam.generalelectoralassemby2021@gmail.com އަށް މެއިލްކުރުމަށް އެ އެސޯސިއޭޝަނުން ވަނީ އެދިފައެވެ.

ވީއޭއެމުގެ އިންތިޚާބަށް ކުރިމަތިލާން ހުޅުވާލިއިރު، މީގެ ކުރިން އިންތިޚާބުގައި ވާދަކުރައްވާނެކަން އިއުލާންކުރައްވާފައިވަނީ އިލްޔާސް ވަހީދު (އިއްލަ) އާއި މުޙައްމަދު ރަނޭޝް (ރަނޭ) އެވެ.

ވީއޭއެމުގެ އައު އިންތިޚާބު ބޭއްވުމަށް ތައްޔާރުވަމުންދާއިރު، ކުރިއަށް އޮތް އިންތިޚާބުގައި ވާދަނުކުރައްވަން އެ އެސޯސިއޭޝަނުގެ އެންމެ ފަހުގެ އިންތިޚާބީ ރައީސް މުޙައްމަދު ލަތީފް މީގެ ކުރިން ވަނީ ނިންމަވާފައެވެ. "ރާއްޖެ.އެމްވީ" އަށް މައުލޫމާތުދެއްވަމުން ލަތީފް ވިދާޅުވީ ވީއޭއެމުގެ އިންތިޚާބު ބޭއްވުމުގެ މަސައްކަތްކުރަމުންދާއިރު، އުންމީދަކީ އޮމާންކަމާއެކު އިންތިޚާބުގެ ކަންކަން ނިމިގެންދިޔުން ކަމަށެވެ.

އަންނަ މަހުގެ އެއްވަނަ ދުވަހު ވީއޭއެމުގެ އިންތިޚާބު ބާއްވާއިރު، އިންތިޚާބުގެ ކަންތައްތައް ކުރިއަށްގެންދާނީ 2015 ވަނަ އަހަރުގެ އަސާސީ ގަވާއިދުގައިވާ ގޮތަށް ކަމަށް ކުލަބުތަކުން ވަނީ ފާސްކޮށްފައެވެ. ވީއޭއެމުގެ އިންތިޚާބު ބާއްވަން އެފްއައިވީބީން ގައިޑްލައިނެއް އެކުލަވާލިއިރު، މި އިންތިޚާބުގައި ވޯޓުލެވޭނީ ނުވަ ކުލބަކަށް ކަމަށްވެސް އެ އިދާރާއިން ވަނީ ނިންމާފައެވެ. އެ ކުލަބުތަކުގެ ތެރޭގައި ހިމެނެނީ ދިވެހި ސިފައިންގެ ކުލަބު، ޕޮލިސް ކުލަބު، އައްޑޫ ސްޕޯޓްސް ކުލަބު، ސްޕޯޓްސް ކުލަބު ހޯކްސް، ގުޑީސް ސްޕޯޓްސް ކުލަބު، މޯލްޑިވިއަން ސްޕޯޓްސް އެންޑް ރެކްރިއޭޝަން، ޔޫތު ނިއު ޖަނަރޭޝަން އަދި ކުލަބު ހާފް ލައިން ލިންކޭޖެވެ.