ވޮލީބޯޅަ އެސޯސިއޭޝަން އޮފް މޯލްޑިވްސް (ވީއޭއެމް)އާ ގުޅޭ ގޮތުން ދޮގު ފަތުރާ ނަމަ، ދެ އަހަރު ދުވަހުގެ މުއްދަތަކަށް ސަސްޕެންޑު ކުރަން ނިންމައިފި އެވެ.
ވީއޭއެމް އިން އެހެން ނިންމީ ހޯމަ ދުވަހުގެ ރޭ ބޭއްވި އެ އެސޯސިއޭޝަންގެ ޚާއްސަ ގޮތުން ބާއްވާ އަހަރީ އާންމު ޖަލްސާގަ އެވެ. އެ ޖަލްސާގައި އެ ހުށަހެޅުމަށް ތާއީދު ކޮށްފައި ވަނީ އެސްޕިރޭޝަން ފޯ އޯލް އިނީޝިއޭޓިވްސް ސްޕޯޓްސް ކްލަބުންނެވެ. އެ ނިންމުން ފާސްކޮށްފައި ވަނީ އެ ޖަލްސާގައި ބައިވެރިވި ވީއޭއެމްގެ ހުރިހާ މެމްބަރު ކްލަބުތަކުގެ އިއްތިފާގުންނެވެ.
އެ ނިންމުމުގައި ބުނެފައި ވަނީ ވީއޭއެމްގެ ހިންގާ ކޮމެޓީގައި ތިއްބެވި މެމްބަރުންނަށް އަމާޒުކޮށްގެން ހަޤީގަތާ ޚިލާފު، ބޭއަދަބީ، އަދި މުޖުތަމައު ބަލައި ނުގަންނަ ބަހުރުވަ ބޭނުންކޮށްގެން ތަފާތު ވާހަކަތައް ދައްކައި، އެކި އެކި އިލްޒާމުތައް އަޅުވަމުން ގެންދާ ކަމަށެވެ. އަދި އެ ފަރާތްތަކުގެ ފޮޓޯތައް ސޯޝަލް މީޑިއާގެ އެކި އެކި މަންސަތަކުގައި ދައުރުކުރާ ފަރާތްތަކަށް ރާއްޖޭގައި ރާވާ ހިންގާ ވޮލީގެ އެއްވެސް ޙަރަކާތެއްގައި މަދުވެގެން ދެ އަހަރު ދުވަހަށް ބައިވެރި ނުވެވޭ ގޮތަށް، ސަސްޕެންޑު ކުރުމަށް ވަނީ ނިންމައިފަ އެވެ.
ވީއޭއެމްގެ މި ދައުރުގެ އިންތިޚާބީ ރައީސް މުޙައްމަދު ރަނޭޝް (ރަނޭ) އިސްތިއުފާ ދެއްވުމާ ގުޅިގެން އެ ދައުރުގެ ބާކީ އޮތް މުއްދަތަށް ވަނީ ރައީސްގެ މަޤާމަށް މުޙައްމަދު ލަޠީފް އިންތިޚާބު ކޮށްފަ އެވެ. ވީއޭއެމްގެ ރައީސަކަށް ލަތީފް އިންތިޚާބު ކުރި ފަހުން، ލަޠީފް އާއި އޭނާގެ ހިންގާ ކޮމެޓީގައި ހިމެނޭ މެމްބަރުންނަށް ވޮލީގައި ޙަރަކާތްތެރިވަމުން އަންނަ އެކި ފަރާތްތަކުން އަންނަނީ ފާޑު ކިޔަމުންނެވެ. ޚާއްސަކޮށް ވީއޭއެމްގެ ތެރޭގައި މިހާރު ވެސް ޤަވާއިދާއި، އުސޫލުން ކަންކަން ކުރަމުން އަންނަ ކަމުގެ ތުހުމަތު ވެސް އެ ފަރާތްތަކުން އަންނަނީ ކުރަމުންނެވެ.
