ވޮލީ ބޯޅަ އެސޯސިއޭޝަން އޮފް މޯލްޑިވްސް (ވީއޭއެމް) އިން އިންތިޒާމު ކޮށްގެން ކުރިއަށް ގެންދިޔަ، އިންޓަ ސްކޫލް ވޮލީ ބޯޅަ މުބާރާތުގެ ފައިނަލް ރައުންޑުގެ ހުރިހާ ތައްޓެއް އަތޮޅު ތެރޭގެ ސްކޫލުތަކުން ކާމިޔާބު ކުރިއިރު، ފ.އަތޮޅުގެ ދެ ސްކޫލަކުން މުބާރާތުގެ ތިން ތައްޓެއް ކާމިޔާބު ކޮށްފި އެވެ.

މިއަހަރުގެ އިންޓަ ސްކޫލް ވޮލީ ބޯޅަ މުބާރާތް ކުރިއަށް ގެންގޮސްފައި ވަނީ މިދިޔަ ނޮވެމްބަރު މަހުގެ 23 ވަނަ ދުވަހުން ފެށިގެން، ޑިސެމްބަރު މަހުގެ ހަތް ވަނަ ދުވަހުގެ ނިޔަލަށެވެ. މިއަހަރުގެ މުބާރާތް ކުރިއަށް ގެންގޮސްފައި ވަނީ ދެ ބުރަކަށް ބަހާލައިގެންނެވެ. އެގޮތުން އަތޮޅު ތެރޭގެ ބުރަށްފަހު، ދެން ކުޅެފައި ވަނީ ފައިނަލް ރައުންޑުގެ ބުރެވެ. ފައިނަލް ރައުންޑުގައި ވާދަކޮށްފައި ވަނީ ކޮންމެ އުމުރުފުރާ އަކުން އަތޮޅު ތެރޭގެ ގަދަ ފަސް ޓީމު އަދި ކޮންމެ އުމުރުފުރާ އަކުން މާލޭގެ ސްކޫލުތަކުގެ އެންމެ ގަދަ ތިން ޓީމެވެ.

ފައިނަލް ބުރުގެ 14 އަހަރުން ދަށުގެ އަންހެން ޗެމްޕިއަންކަން ހޯދާފައި ވަނީ ފ.އަތޮޅު މަދަރުސާ އިންނެވެ. އެއީ ފައިނަލްގައި ތ.މަޑިފުށީގެ މައްޗަށް ކުރި ހޯދައިގެންނެވެ. މީގެ އިތުރުން ފ.އަތޮޅު މަދަރުސާ އިން ވަނީ 16 އަހަރުން ދަށުގެ އަންހެން ޗެމްޕިއަންކަން ވެސް ހޯދައިފަ އެވެ. އެއީ ފައިނަލްގައި މ.ވޭވަށް ބަލިކޮށްގެންނެވެ. ފ.އަތޮޅު ނިލަންދޫގައި ހުންނަ އަތޮޅު ތަޢުލީމީ މަރުކަޒުން ވަނީ މުބާރާތުގެ 19 އަހަރުން ދަށުގެ އަންހެން ޗެމްޕިއަންކަން ހޯދައިފަ އެވެ. އެއީ ފައިނަލްގައި އަހުމަދިއްޔާ އިންޓަނޭޝަނަލް ސްކޫލްގެ މައްޗަށް ކުރި ހޯދައިގެންނެވެ. އެއާއެކު މިއަހަރުގެ އިންޓަ ސްކޫލްގެ ތިން ތަށި ފ.އަތޮޅަށް ނިސްބަތްވާ ސްކޫލުތަކުން ހޯދާފައިވާއިރު، މިއަހަރުގެ މުބާރާތުގެ އެންމެ ކާމިޔާބު އަތޮޅަކީ ފ.އަތޮޅެވެ.

މީގެ އިތުރުން މުބާާރާތުގެ 14 އަހަރުން ދަށުގެ ފިރިހެން ޗެމްޕިއަންކަން ހޯދީ މަޑިފުށި ސްކޫލުންނެވެ. އެއީ ފައިނަލްގައި ރ.ކިނޮޅަސް ސްކޫލް ބަލިކޮށްގެންނެވެ. މީގެ އިތުރުން 16 އަހަރުން ދަށުގެ ފިރިހެން ޗެމްޕިއަންކަން ހޯދީ އދ.ކުނބުރުދޫ ސްކޫލް އިންނެވެ. އެއީ ފައިނަލްގައި އދ.އަތޮޅު މަދަރުސާގެ މައްޗަށް ކުރި ހޯދައިގެންނެވެ. މީގެ އިތުރުން 19 އަހަރުން ދަށުގެ ފިރިހެން ޗެމްޕިއަންކަން ހއ.އިހަވަންދޫ ސްކޫލް އިން ހޯދީ، ފައިނަލްގައި ސެންޓަ ފޯ ހަޔަރ ސެކަންޑްރީ އެޑިއުކޭޝަން (ސީއެޗްއެސްސީ) ހުޅުމާލޭގެ މައްޗަށް ކުރި ހޯދައިގެންނެވެ.

މިއަހަރުގެ މުބާރާތުގައި ވެސް ވަނީ ކޮންމެ އުމުރުފުރާ އަކުން އެންމެ މޮޅު ހަ ކުޅުންތެރިން ހޮވައިފަ އެވެ.