ވޮލީބޯޅަ އެސޯސިއޭޝަން އޮފް މޯލްޑިވްސް (ވީއޭއެމް)ގެ ހަތަރު އަހަރުގެ އޮޑިޓް ރިޕޯޓުތައް ފާސްކޮށްފި އެވެ.

އެ ރިޕޯޓުތައް ފާސްކޮށްފައި ވަނީ ހޯމަ ދުވަހު ރޭ ބޭއްވި ވީއޭއެމްގެ ޚާއްސަ ގޮތުން ބޭއްވި އަހަރީ އާންމު ޖަލްސާގަ އެވެ. ހެންވޭރު ބޯޅަ ގޭގައި ބޭއްވި އެ ޖަލްސާގައި ވީއޭއެމްގެ މެމްބަރު ކުލަބުތަކުގެ ތެރޭގައި ހިމެނޭ ހުރިހާ ކުލަބެއްގެ މަންދޫބުން ވެސް ވަނީ ބައިވެރިވެފަ އެވެ. އެގޮތުން ޕޮލިސް ކުލަބު، އަލްމާ ސްޕޯޓްސް ކުލަބު، އައްޑޫ ސްޕޯޓްސް ކުލަބު، ވޮލީބޯލް ޔޫތު ނިއު ޖެނެރޭޝަން، ކުލަބު ވޮލީބޯލް، ޔޫތު ނިއު ޖެނެރޭޝަން، ކުލަބު ހާފް ލައިން ލިންކޭޖު، އެސްޕިރޭޝަން ފޯ އޯލް އިނިޝިއޭޓިވްސް ސްޕޯޓްސް ކުލަބު، ދިވެހި ސިފައިންގެ ކުލަބު އަދި ގުޑީސް ސްޕޯޓްސް ކުލަބުން ވަނީ ބައިވެރިވެފަ އެވެ.

އެ ޖަލްސާގައި ވީއޭއެމްގެ ހިންގާ ކޮމެޓީގައި ހިމެނޭ 15 މެމްބަރުންގެ ތެރެއިން 13 މެމްބަރަކު ވަނީ ބައިވެރިވެފަ އެވެ. މީގެ އިތުރުން އެ ޖަލްސާގައި ކޮމިޝަނަރ އޮފް ސްޕޯޓްސްގެ އޮފީހުގެ އޮބްޒާވަރުންގެ އިތުރުން، މޯލްޑިވްސް އޮލިމްޕިކް ކޮމެޓީ (އެމްއޯސީ)ގެ އޮބްޒާވަރުން އަދި ސެންޓްރަލް އޭޝިއަން ވޮލީބޯލް އެސޯސިއޭޝަން (ކާވާ)ގެ އޮބްޒާވަރުން ވެސް ވަނީ ބައިވެރިވެފަ އެވެ.

ވީއޭއެމްގެ ރައީސް މުޙައްމަދު ލަޠީފް ރިޔާސަތު ބެލެހެއްޓެވި އެ ޖަލްސާގައި ވަނީ 2020، 2021، 2022 އަދި 2023 ވަނަ އަހަރުގެ މާލީ އަހަރުތަކުގެ އޮޑިޓް ރިޕޯޓު ފައިނަލް ކުރުމަށްފަހު، ފާސްކޮށްފަ އެވެ. ހަތަރު އަހަރު ދުވަހުގެ އޮޑިޓް ރިޕޯޓު ފާސްކޮށްފައި ވަނީ ޖަލްސާ އަށް ޙާޟިރުވި ހުރިހާ ކުލަބެެއްގެ ފުރިހަމަ ވޯޓާ އެކު އެވެ.

ވީއޭއެމްގެ އޮޑިޓް ރިޕޯޓު ފާސްކޮށްފައިވާއިރު، އެ އެސޯސިއޭޝަނުން އެކަން ކޮށްފައި ވަނީ އެކަން ކުރުމަށް މީގެ ކުރިން ދީފައިވާ ތާރީޚު ފަހަނައަޅާ ދިޔަ ފަހުންނެވެ. ވީއޭއެމްގެ މިހާރު ހިނގަމުންދާ ދައުރުގެ ބާކީ އޮތް މުއްދަތަށް، އެ އެސޯސިއޭޝަންގެ ރައީސަކަށް ލަޠީފް އިންތިޚާބު ކޮށްފައި ވަނީ މިއަހަރުގެ ކުރީ ކޮޅު އެވެ. އެއީ ކުރިން އެ މަޤާމުގައި ހުރި މުޙައްމަދު ރަނޭޝް (ރަނޭ) އިސްތިއުފާ ދިނުމާ ގުޅިގެންނެވެ.