މިދިޔަ އަހަރުގެ ޑިސެމްބަރު މަހު އެތުލެޓިކޯ މެޑްރިޑުގެ އެއްބަސްވުން އުވާލި ސްޕެއިނުގެ ފޯވާޑް ޑިއޭގޯ ކޮސްޓާއާއެކު ބެންފީކާއިން އެއްބަސްވުމަކަށް އައިސްފައިވާ ކަމަށް ރިޕޯޓުތައް ބުނެފިއެވެ.
އެތުލެޓިކޯއާއެކު ކޮސްޓާ ހަދާފައި އޮތް އެއްބަސްވުން މި އަހަރުގެ ހޫނު މޫސުމުގައި ހަމަވަން އޮތް ނަމަވެސް، ކޮސްޓާ ވަނީ އަމިއްލައަށް އެއްބަސްވުން އުވާލުމަށް އެ ކުލަބުގައި އެދިފައެވެ. އެއާއެކު މިދިޔަ ޑިސެމްބަރު މަހުގެ 29 ވަނަ ދުވަހުގެ އެތުލެޓިކޯއިން ވަނީ ކޮސްޓާގެ އެދުމުގެ މަތިން އޭނާގެ އެއްބަސްވުން އުވާލާފައިވާކަން ހާމަކޮށްފައެވެ. ރިޕޯޓުތައް ބުނާ ގޮތުން އުމުރުން 32 އަހަރުގެ ކޮސްޓާ އާއި އެތުލެޓިކޯގެ ކޯޗިން ސްޓާފަކާ މައްސަލަޖެހި، އޭނާ އެ ޓީމު ދޫކޮށްލަން ނިންމީ އެ ޓީމާއެކު ހަދާފައިވާ އެއްބަސްވުމުގައި ބާކީ އޮތް ހަ މަސް ދުވަހަށް އެއްވެސް ބަދަލެއް ހޯދުމެއް ނެތިއެވެ.
އެތުލެޓިކޯ އެއްބަސްވުން އުވާލި ނަމަވެސް، މިދިޔަ ފިނި މޫސުމުގެ ޓްރާންސްފާގައި ކޮސްޓާ އެއްވެސް ޓީމަކާ ގުޅިފައެއް ނުވެއެވެ. ރިޕޯޓުތައް ބުނާ ގޮތުން ކޮސްޓާ މިހާރު ވަނީ ކުރިއަށް އޮތް ހޫނު މޫސުމުގައި ބެންފީކާއާ ގުޅެން އެއްބަސްވެފައެވެ.
ކޮސްޓާ ބެންފީކާއާ ގުޅެން ނިންމާފައިވާ ކަމަށް ރިޕޯޓުތައް ބުނިއިރު، ދެކުނު އެމެރިކާ ޗެމްޕިއަން ޓީމު ކަމަށްވާ ބްރެޒިލުގެ ޕަލްމެއިރަސްއާ ގުޅެން ކޮސްޓާ އެއްބަސްވި ކަމަށްވެސް ދާދި ފަހުން މީޑިއާތަކުން ވަނީ ރިޕޯޓުކޮށްފައެވެ. އަދި އޭނާ ހޯދުމަށް ތުރުކީ، ގަތަރު އަދި ސައުދީ އަރަބިއްޔާގެ ކުލަބުތަކުންވެސް މަޝްވަރާކުރަމުން އަންނަ ކަމަށް ބައެއް މީޑިއާތަކުން ވަނީ ރިޕޯޓުކޮށްފައެވެ.
