ސައުދީ އަށް ނުގޮސް ޑި މާރިއާ ބަދަލުވާނީ ކުރީގެ ކުލަބު ބެންފީކާ އަށް

އާޖެންޓީނާގެ އެޓޭކިން މިޑްފީލްޑަރު އެންހެލް ޑި މާރިއާ އޭނާގެ ކުރީގެ ކުލަބު ބެންފީކާ އަށް ބަދަލުވާން ނިންމާފައިވާ ކަމަށް މީޑިއާ ރިޕޯޓުތައް ބުނެފި އެވެ.

އާޖެންޓީނާގެ ރޮސާރިއޯ ސެންޓްރަލް އިން ސީނިއާ ކެރިއަރު ފެށި ޑި މާރިއާގެ ކެރިއަރުގައި އޭނާ ކުޅުނު ދެ ވަނަ ކުލަބަކީ ބެންފީކާ އެވެ. އެއީ 2007 ވަނަ އަހަރުން 2010 ވަނަ އަހަރާ ހަމައަށެވެ. އެ މުއްދަތުގައި ޑި މާރިއާ ވަނީ ބެންފީކާ އިން ކުޅެދިން 124 މެޗުގައި 15 ލަނޑު ޖަހައިފަ އެވެ. އެ ކުލަބާއެކު އޭނާ ވަނީ ތިން ތައްޓެއް ކާމިޔާބުކޮށްފަ އެވެ.

ޑި މާރިއާ އެންމެ ފަހުން ކުޅުނީ އިޓާލިއަން ލީގުގެ ޔުވެންޓަސް އަށެވެ. އެކުލަބާއެކު ހަދާފައިވާ އެއްބަސްވުމުގެ މުއްދަތު މި ސީޒަނުގެ ނިޔަލަށް ހަމަވުމުން، އޭނާ ނިންމީ ކުލަބު ދޫކޮށްލުމަށެވެ. އެއާއެކު ޑި މާރިއާ ހޯދުމުގެ މަސައްކަތް ސައުދީ ޕްރޯ ލީގުގެ ކުލަބުތަކުންނާއި، އެމެރިކާ ލީގުގެ އިންޓަ މިއާމީން ވެސް ވަނީ ކޮށްފަ އެވެ. ސައުދީ ލީގުގެ ކުލަބުތަކުން ވަނީ ޑި މާރިއާ އަށް ބޮޑު މުސާރައެއް ހުށަހަޅާފައި ކަމަށް ވެސް ރިޕޯޓުތައް ބުނެފައިވެ އެވެ.

ސައުދީ ލީގު އަދި އިންޓަ މިއާމީން އޭނާ ހޯދުމުގެ ޝައުޤުވެރިކަން ގެންގުޅުނު ނަމަވެސް، ޑި މާރިއާ މިހާރު ނިންމާފައި ވަނީ ބެންފީކާ އަށް ބަދަލުވުމަށް ކަމަށް މީޑިއާތަކުން ބުނެ އެވެ. އޭނާ ބެންފީކާ އަށް ބަދަލުވުމަށް އެއްބަސްވެފައިވާ ކަމަށާއި، ދެން އޮންނާނީ އެކަމާ ގުޅޭ އެންމެ ފަހުގެ ކަންކަން ކުރިއަށް ގެންދިޔުން ކަމަށް ވެސް ބުނެފައިވެ އެވެ. ޑި މާރިއާ ބެންފީކާ އަށް ބަދަލުވާނީ އެއް އަހަރު ދުވަހުގެ އެއްބަސްވުމެއްގަ އެވެ. އެހެންކަމުން އެ ކުލަބުގައި އޭނާ ހުންނާނީ އަންނަ 2024 ވަނަ އަހަރުގެ ޖޫން މަހުގެ ނިޔަލަށެވެ.

އުމުރުން މިހާރު 35 އަހަރުވެފައިވާ ކުޅުންތެރިޔާ ވަނީ ޔޫރަޕުގެ ބޮޑެތި ކުލަބުތަކަށް ކުޅެފަ އެވެ. އޭގެ ތެރޭގައި ސްޕެއިންގެ ގަދަބާރު ރެއާލް މެޑްރިޑު، އިނގިރޭސި ޕްރިމިއާ ލީގުގެ މެންޗެސްޓަރ ޔުނައިޓެޑު އަދި ފްރާންސް ލީގުގެ ޕެރިސް ސެއިންޓް ޖާމަން (ޕީއެސްޖީ) ހިމެނެ އެވެ.