ޗެލްސީ އަދި އެތުލެޓިކޯ މެޑްރިޑަށް ކުޅެފައިވާ ޑިއޭގޯ ކޮސްޓާ ހިލޭ އެއްބަސްވުމެއްގެ ދަށުން ބްރެޒިލްގެ ބޮޓަފޯގޯއަށް ސޮއިކޮށްފިއެވެ.

މިދިޔަ ޖޫން މަހު ވުލްވްސް ދޫކޮށްލުމަށްފަހު، އުމުރުން 34 އަހަރުގެ ކޮސްޓާ ހުރީ ފްރީ އެޖެންޓެއްގެ ގޮތުގައެވެ. އޭނާ ބްރެޒިލްގެ ކުލަބާއެކު ސޮއިކުރީ ހަތަރު މަސް ދުވަހުގެ އެއްބަސްވުމެއްގައެވެ. އެ ޓީމުގެ ކޯޗަކީ ވުލްވްސްގެ ކުރީގެ ކޯޗު، ބްރޫނޯ ލޭޖް އެވެ.

މިދިޔަ ސީޒަނުގައި އޭނާ ވަނީ ވުލްވްސްއަށް 23 މެޗު ކުޅެދީފައެވެ. އަދި ޗެލްސީއަށް 59 މެޗު ކުޅެދީ، އެ ޓީމާއެކު ދެފަހަރު ލީގު ކާމިޔާބުކޮށްފައިވެއެވެ. މީގެއިތުރުން އޭނާ ވަނީ އެތުލެޓިކޯ މެޑްރިޑާއެކު ދެފަހަރު ސްޕެނިޝް ލީގާއި، ޔުރޮޕާ ލީގު އެއްފަހަރު ކާމިޔާބުކޮށްފައެވެ.

މި ސީޒަނުގައި ކުޅުނު 19 މެޗުގެ ތެރެއިން 15 މެޗުން މޮޅުވެ، ބޮޓަފޯގޯ އޮތީ ތާވަލުގެ އެއްވަނައިގައެވެ. ދެވަނައިގައިވާ ފްލެމިންގޯ އޮތީ އެ ޓީމަށްވުރެ 16 ޕޮއިންޓް ފަހަތުގައެވެ.