ބޮޑު ތަފާތަކުން މޮޅުވެ ބެންފީކާ އަށް އެއް ވަނަ

ޔުއެފާ ޗެމްޕިއަންސް ލީގު ގްރޫޕް އެޗްގައި ބޮޑު ތަފާތަކުން މެކަބީ ހައިފާ ބަލިކޮށް ބެންފީކާ އިން ގްރޫޕްގެ އެއް ވަނަ ހޯދައިފިއެވެ.

މެކަބީ ހައިފާގެ ދަނޑުގައި ކުޅުނު މެޗު ބެންފީކާ އިން ކާމިޔާބުކުރީ 6-1 އިންނެވެ. މި ދެ ޓީމު ބެންފީކާގެ ދަނޑުގައި ބައްދަލުކުރި މެޗު ވެސް ކާމިޔާބުކުރީ އެ ޓީމުންނެވެ.

މެކަބީ ހައިފާގެ ދަނޑުގައި އެންމެ ފުރަތަމަ ލަނޑު ޖަހާ ލީޑު ނެގީ ވެސް ބެންފީކާ އިންނެވެ. މެޗުގެ 20 ވަނަ މިނެޓުގައި އޮޓަމެންޑީ ތަނަވަސްކޮށްދިން ފުރުސަތެއްގައި ބެންފީކާ އަށް ލީޑު ނަގައިދިނީ ގޮންސާލޯ ރާމޯސްއެވެ. ނަމަވެސް އޭގެ ހަ މިނެޓު ފަހުން ލިބުނު ޕެނަލްޓީއަކުން މެކަބީ ހައިފާ ވަނީ ނަތިޖާ ހަމަހަމަކޮށްފައެވެ. އެ ޓީމަށް ނަތީޖާ ހަމަހަމަކޮށްދިނީ ޝެރީއެވެ.

ބެންފީކާ އިން ބާކީ ފަސް ލަނޑު ވެސް ޖެހީ މެޗުގެ ދެ ވަނަ ހާފުގައެވެ. ދެ ވަނަ ހާފު ފަށައިގެން މެޗުގެ 59 ވަނަ މިނެޓުގައި ދެ ވަނަ ފަހަރަށް ބެންފީކާ އަށް ލީޑު ނަގައިދިނީ ޕެޓާ މުސާއެވެ. އޭގެ 10 މިނެޓު ފަހުން ބެންފީކާގެ ތިން ވަނަ ލަނޑު އެލްކްސް ގްރިމަލްޑޯ ޖެހިއިރު، 73 ވަނަ މިނެޓުގައި ހަތަރު ވަނަ ލަނޑު ޖެހީ ރަފާ ސިލްވާއެވެ. ބެންފީކާގެ ފަހު ދެ ލަނޑު ފެނުނީ މެޗުގެ ފަހު 10 މިނެޓުގައެވެ. 88 ވަނަ މިނެޓުގައި ހެންރީކޭ އަރައުހޯ ފަސް ވަނަ ލަނޑު ޖެހިއިރު، ހަ ވަނަ ލަނޑު ޖޯ މާރިއޯ ޖެހީ އިތުރު ވަގުތުގައެވެ.

ގްރޫޕް ސްތޭޖުގައި އެންމެ ވާދަވެރިކޮށް ދިޔައީ މި ގްރޫޕްއެވެ. މި ގްރޫޕުން ދެ ވަނަ ބުރަށް ދިޔައީ ޕެރިސް ސެއިންޓް ޖާމަން (ޕީއެސްޖީ) އާއި ބެންފީކާއެވެ. ކުޅުނު ހަ މެޗުން ދެ ޓީމަށް ލިބެނީ 14 ޕޮއިންޓެވެ. ފައިދާ ގޯލު ދެ ޓީމުގެ އެއްވަރުވުމުން، ދެން ބަލާނީ ހެޑް ޓު ހެޑަށެވެ. މި ދެ ޓީމު ބައްދަލުކުރި ދެ މެޗު ވެސް ވަނީ އެއްވަރުވެފައެވެ. ހެޑް ޓު ހެޑް އެއްވަރުވުމުން މި ގްރޫޕްގެ އެއް ވަނަ ކަނޑައެޅީ އަވޭ ގޯލުންނެވެ. އަވޭ ގޯލުން ބެންފީކާ އަށް އެއް ވަނަ ލިބުނުއިރު، ޕީއެސްޖީ އަށް ލިބުނީ ދެ ވަނައެވެ.