މި އަހަރުގެ މިސްޓަރ މޯލްޑިވްސް ހޮވުން މާދަމާ

ބޮޑީބިލްޑިންގ އެސޯސިއޭޝަން އޮފް މޯލްޑިވްސް (ބީބީއޭއެމް) އިން ބާއްވާ 19 ވަނަ ޤައުމީ ބޮޑީބިލްޑިން އެންޑް ފިޒީކްސް ސްޕޯޓްސް ޗެމްޕިއަންޝިޕް (މިސްޓަރ މޯލްޑިވްސް) ހުކުރު ދުވަހު ބާއްވަން ތައްޔާރުވެއްޖެއެވެ.

މި އަހަރުގެ މިސްޓަރ މޯލްޑިވްސް ހޮވުން އޮންނާނީ ހުކުރު ދުވަހުގެރޭ 08:45 ގައި އޮލިމްޕަސް ސިނަމާގައެވެ. އަދި މިސްޓަރ މޯލްޑިވްސް ބޭއްވުމުގެ ހުއްދަ ހެލްތު ޕްރޮޓެކްޝަން އޭޖެންސީ (އެޗްޕީއޭ) އިން މިހާރު ވަނީ ދީފައެވެ.

"ރާއްޖެ.އެމްވީ" އަށް ދިން އިންޓަވިއުއެއްގައި ބީބީއޭއެމުގެ ނައިބު ރައީސް އަޙްމަދު އައިމަން ވިދާޅުވީ މިސްޓަރ މޯލްޑިވްސް ބޭއްވުމުގެ ހުއްދަ އެޗްޕީއޭއިން ދިނީ ވަރަށް ހަރުކަށި ފިޔަވަޅުތަކެއް އެޅުމަށް އެންގުމަށްފަހު ކަމަށާއި، އެގޮތުން ހާއްސަ އުސޫލުތަކެއް މި އިވެންޓަށް އެކުލަވާލައިފައިވާ ކަމަށެވެ. އެގޮތުން މި އަހަރުގެ މިސްޓަރ މޯލްޑިވްސް އިވެންޓް ކުރިއަށްދާނީ އެއްވެސް ބެލުންތެރިއަކު ނުވައްދައި ކަމަށާއި، އިވެންޓުގެ ބެކް ސްޓޭޖުން ފެށިގެން އިވެންޓުގެ ހުރިހާ ކަމެއްވެސް ކުރިއަށްގެންދިޔުމަށް ރާވައިފައިވަނީ ހަރުކަށި ފިޔަވަޅުތަކެއްގެ މަތިން ކަމަށްވެސް އައިމަން ވިދާޅުވިއެވެ.

މި މަހުގެ 20 ވަނަ ދުވަހުގެ ނިޔަލަށް މިސްޓަރ މޯލްޑިވްސްގައި ބައިވެރިވާން ހުޅުވާލިއިރު، މި މުބާރާތުގައި 30 ށްވުރެ ގިނަ ބޮޑީބިލްޑަރުން ވަނީ ބައިވެރިވެފައެވެ. އައިމަން ވިދާޅުވީ ހީކުރި ވަރަށްވުރެ ގިނައިން މި ފަހަރުގެ މިސްޓަރ މޯލްޑިވްސްގައި ބޮޑީބިލްޑަރުން ބައިވެރިވެފައިވާ ކަމަށާއި، އެގޮތުން އެންމެ ފަހުން 2019 ވަނަ އަހަރު ބޭއްވި މިސްޓަރ މޯލްޑިވްސްގައި ވާދަކޮށްފައިވަނީ 18 އެތުލީޓުން ކަމަށެވެ. އެހެންކަމުން މިއީ ވަރަށް ބޮޑު ކުރިއެރުމެއް ކަމަށާއި، އެއާއެކު މި އަހަރުގެ އިވެންޓް ވަރަށް ފުރިހަމަވެގެންދާނެ ކަމަށްވެސް ވަނީ ވިދާޅުވެފައެވެ.

ހުކުރު ދުވަހުގެރޭ މިސްޓަރ މޯލްޑިވްސް ބާއްވާއިރު، މި އިވެންޓުގެ ޝަރަފުވެރި މެހުމާނަކީ ރައްޔިތުންގެ މަޖިލީހުގެ ރައީސް، ރައީސް މުޙައްމަދު ނަޝީދެވެ. އަދި މި އިވެންޓް ރާއްޖެޓީވީން ލައިވްކުރުމަށް ވަނީ ހަމަޖެހިފައެވެ. މި އިވެންޓް ރާއްޖެޓީވީން ލައިވްކޮށް ދައްކާއިރު، ފެބްރުއަރީ މަހުގެ އެއްވަނަ ދުވަހު ބީބީއެމުން ވަނީ މިސްޓަރ މޯލްޑިވްސްގެ އެކްސްކުލޫސިވް ރައިޓްސް ކުރިއަށް އޮތް ތިން އަހަރަށް ރާއްޖެޓީވީއަށް ދީފައެވެ.

މި އަހަރުގެ މިސްޓަރ މޯލްޑިވްސް ބޭއްވުމުގެ އެންމެ ފަހުގެ ތައްޔާރީތައް ވަމުންދާއިރު، ކޮވިޑް-19 އާ ގުޅިގެން މިދިޔަ އަހަރުގެ މުބާރާތް ބާއްވާފައެއް ނުވެއެވެ.