ބޮޑީބިލްޑިން އެސޯސިއޭޝަން އޮފް މޯލްޑިވްސް (ބީބީއޭއެމް) ގެ ރައީސްކަމުގެ ތިން ވަނަ ދައުރަކަށް އިބްރާހީމް ހަމީދު (އިއްބެ) އިންތިޚާބު ވެއްޖެ އެވެ.
މިހާރު ވެސް ބޮޑީބިލްޑިން އެސޯސިއޭޝަންގެ ރައީސްކަމުގައި ހުންނެވީ ވެސް އިއްބެ އެވެ. ކުރިއަށް އޮތް ފަސް އަހަރަށް އިއްބެ ރައީސްކަމަށް އިންތިޚާބުވީއިރު، އައު ދައުރު ހަމަވާނީ 2027 ވަނަ އަހަރު އެވެ. ކުރިއަށް އޮތް ދައުރަށް އިއްބެ އާއެކު އެކްސްކޯ އަށް އިންތިޚާބުވި މެމްބަރުންނަކީ، އަޙުމަދު އައިމަން، އަޙުމަދު ލިޒާމް، މުޙައްމަދު ނާޝިދު އަދި މުޙައްމަދު ނަޒީހު އެވެ. އިއްބެގެ ލީޑާޝިޕްގެ ދަށުން ފާއިތުވި އަހަރުތަކުގައި ރާއްޖެ އިން ވަނީ ބައިނަލްްއަޤުވާމީ މުބާރާތްތަކުގައި ވާދަކޮށް، ގިނަ ކާމިޔާބީތަކެއް ވެސް ހޯދައިފަ އެވެ.
އިއްބެ އަކީ ދުނިޔޭގެ ބޮޑީބިލްޑިން އެންޑް ފިޒީކް ސްޕޯޓްސް ފެޑެރޭޝަންގެ ނައިބު ރައީސްކަން ވެސް ކުރައްވަމުން އަންނަ ފަރާތެކެވެ. އެ މަގާމަށް އިއްބެ އިންތިޚާބުވެފައި ވަނީ މިދިޔަ އަހަރުގެ ޑިސެމްބަރު މަހުގެ ތެރޭގަ އެވެ. އޭގެ ކުރިން އިއްބެ ވަނީ އޭޝިއާގެ ބޮޑީބިލްޑިން ފެޑަރޭޝަންގެ އިސް މަގާމެއް ވެސް އަދާކުރައްވާފަ އެވެ. އިއްބެ އަންނަނީ މޯލްޑިވްސް އޮލިމްޕިކް ކޮމެޓީ (އެމްއޯސީ) ގެ ހިންގާ ކޮމެޓީގެ މެމްބަރުކަން ވެސް ކުރައްވަމުންނެވެ.
