ވޯލްޑް ބޮޑީބިލްޑިން ޗެމްޕިއަންޝިޕުން އަޒްނީނަށް ރަން މެޑަލް
އަޒްނީން ރަން މެޑަލް ހޯދީ މެން ސްޕޯޓްސް ފިޒީކް އަޕް 170 ސެންޓިމީޓަރުގެ ކެޓަގަރީން
ެރަން މެޑަލް ހޯދި އަޒްނީން
ވޯލްޑް ބޮޑީބިލްޑިން ޗެމްޕިއަންޝިޕުގައި ވާދަކޮށް ރާއްޖޭގެ އަޒްނީން ރަޝާދު ރަން މެޑަލް ހޯދައިފިއެވެ.
ތައިލެންޑުގެ ބެންގްކޮކްގައި ކުރިއަށްދާ ބޮޑީބިލްޑިން ޗެމްޕިއަންޝިޕުން އަޒްނީން ރަން މެޑަލް ހޯދީ މެން ސްޕޯޓްސް ފިޒީކް އަޕް 170 ސެންޓިމީޓާރުގެ ކެޓަގަރީންނެވެ. މިއީ ވޯލްޑް ޗެމްޕިއަންޝިޕުގައި ވާދަކޮށް ދިވެހި އެތުލީޓަކު ރަން މެޑަލް ހޯދި ފުރަތަމަ ފަހަރެވެ.
މިއީ މިއަހަރުގެ ވޯލްޑް ބޮޑީބިލްޑިން ޗެމްޕިއަންޝިޕްގައި ރާއްޖެ އަށް ލިބުނު ދެ ވަނަ މެޑަލްއެވެ. މި ޗެމްޕިއަންޝިޕްގައި މުހައްމަދު މޫސާ (މޯޑު) ވަނީ ރިހި މެޑަލް ހޯދާފައެވެ. މޯޑު ރިހި މެޑަލް ހޯދީ 55 ކިލޯގެ ކެޓަގަރީންނެވެ.
މިއަހަރު ރާއްޖޭގައި ބޭއްވި އޭޝިއަން ބޮޑީބިލްޑިން ޗެމްޕިއަންޝިޕްގައި ވާދަކޮށް ވެސް އަޒްނީން ވަނީ ރަން މެޑަލް ހޯދާފައެވެ. އަޒްނީން އަކީ ރާއްޖޭގައި ބޭއްވި އޭޝިއާ ބައްރުގެ މުބާރާތެއްގައި ވާދަކޮށް ރަން މެޑަލް ހޯދި ފުރަތަމަ ދިވެހި އެތުލީޓެވެ.
ތައިލެންޑުގައި ކުރިއަށްދާ ވޯލްޑް ބޮޑީބިލްޑިން ޗެމްޕިއަންޝިޕްގައި ރާއްޖެއިން ވާދަކުރަނީ އަޒްނީންނާއި މޯޑުގެ އިތުރުން މުހައްމަދު ޔާމީން (ޔާމްބެ)، ހުސައިން ހިމްޔާން، ފަތުހުﷲ މުހައްމަދު، މުހައްމަދު އިމްރާހް އަދި އަބްދުﷲ އަހުސަންއެވެ.
