އަންނަ މަހު ރާއްޖޭގައި ބާއްވަން ތާވަލު ކޮށްފައިވާ ވޯލްޑް ބޮޑީބިލްޑިން އެންޑް ފިޒީކް ސްޕޯޓްސް ޗެމްޕިއަންޝިޕް ރަސްމީކޮށް ލޯންޗު ކޮށްފި އެވެ.

ވޯލްޑް ބޮޑީބިލްޑިން އެންޑް ފިޒީކް ސްޕޯޓްސް ފެޑެރޭޝަން (ޑަބްލިއުބީޕީއެފް) އިން ބާއްވަމުން އަންނަ މި މުބާރާތް ރަސްމީކޮށް ލޯންޗުކޮށްދެއްވާފައި ވަނީ ކުޅިވަރާއި ހަށިހެޔޮ ކަމާ ބެހޭ ވަޒީރު ޢަބްދުﷲ ރާފިޢު (ރާއްޕެ) އެވެ. އެ ރަސްމިއްޔާތުގައި ބޮޑީބިލްޑިން އެސޯސިއޭޝަން އޮފް މޯލްޑިވްސް (ބީބީއޭއެމް)ގެ ރައީސް އިބްރާހީމް ޙަމީދު (އިއްބެ)ގެ އިތުރުން، ކޮމިޝަނަރ އޮފް ސްޕޯޓްސް މުޙައްމަދު ޠަލާލް އަދި ބީބީއޭއެމްގެ އިސްވެރިން ވެސް ވަނީ ބައިވެރިވެފަ އެވެ.

ރާއްޖޭގައި ވޯލްޑް ބޮޑީބިލްޑިން މުބާރާތް ބޭއްވުމަށް ތާވަލު ކޮށްފައި ވަނީ އަންނަ ނޮވެމްބަރު މަހުގެ ފަސް ވަނަ ދުވަހުން ފެށިގެން 11 ވަނަ ދުވަހުގެ ނިޔަލަށެވެ. އެ މުބާރާތް ގެންދިޔުމަށް ހަމަޖެހިފައި ވަނީ އައްޑޫ ސިޓީގެ ކެނަރީފް ރިސޯޓް މޯލްޑިވްސްގަ އެވެ. މިއަހަރުގެ މުބާރާތުގައި 55 ޤައުމަކުން ވާދަކުރާނެ އެވެ. މުބާރާތުގައި ވާދަކުރާ އެތުލީޓުންގެ އިތުރުން، އެތުލީޓުންގެ ކޯޗު އަދި ޤައުމުތަކުގެ އޮފިޝަލުންނާ އެކު ޖުމުލަ 500 އަށް ވުރެ ފަރާތްތައް ރާއްޖެ އަންނާނެ ކަމަށް ބީބީއޭއެމް އިން ވަނީ މައުލޫމާތު ދީފަ އެވެ.

ރާއްޖެ އިން ވަނީ މީގެ ކުރިން ވެސް ބޮޑީބިލްޑިންގެ ބައިނަލްއަޤުވާމީ މުބާރާތްތަކެއް ބާއްވައިފަ އެވެ. 2022 ވަނަ އަހަރު ރާއްޖޭގައި ވަނީ އޭޝިއާގެ މުބާރާތް ވެސް ބާއްވައިފަ އެވެ. އެ މުބާރާތް ކުރިއަށް ގެންދިޔައީ މާލެ އަތޮޅު މާފުށީގަ އެވެ. އޭގެ ފަހުން 2023 ވަނަ އަހަރާއި، 2024 ވަނަ އަހަރުގެ ދެކުނު އޭޝިއާގެ މުބާރާތް ވެސް ބާއްވާފައި ވަނީ ރާއްޖޭގަ އެވެ.

މީގެ ކުރިން 2022 ވަނަ އަހަރު ތަައިލެންޑުގެ ބެންކޮކުގައި ކުރިއަށް ދިޔަ ވޯލްޑް ބޮޑީބިލްޑިން އެންޑް ފިޒީކް ސްޕޯޓްސް ޗެމްޕިއަންޝިޕްގައި ރާއްޖޭގެ އެތުލީޓުން ވަނީ ރަނގަޅު ކާމިޔާބީތަކެއް ވެސް ހޯދައިފަ އެވެ. އެ މުބާރާތުގައި ވާދަކޮށް ރާއްޖޭގެ އެތުލީޓުން ވަނީ ހަ މެޑަލް ހޯދާފައެވެ. އެއީ އެއް ރަން މެޑައްޔާއި، އެއް ރިހި މެޑަލްގެ އިތުރުން ހަތަރު ލޯ މެޑަލްއެވެ.