ރާއްޖޭގައި މިހާރު ކުރިއަށްދާ ސައުތު އޭޝިއަން ބޮޑީބިލްޑިން ޗެމްޕިއަންޝިޕްގައި ޖެހި ޖެހިގެން ތިން ވަނަ ފަހަރަށް ރަން މެޑަލް ހޯދައި، ރާއްޖޭގެ އަޒްނީން ރަޝާދު އަށް ޚާއްސަ ޝަރަފެއް ލިބިއްޖެ އެވެ.
އަަޒްމީން ރަން މެޑަލް ހޯދާފައި ވަނީ ފިރިހެނުންގެ 170 ސެންޓިމީޓަރު ސްޕޯޓްސް ފިޒީކް ކެޓަގަރީންނެވެ. މީގެ ކުރިން އަޒްމީން ވަނީ 2022 ވަނަ އަހަރު ނޭޕާލުގައި ކުރިއަށް ދިޔަ ސައުތު އޭޝިއާ މުބާރާތުގެ އިތުރުން، މިދިޔަ އަހަރު ރާއްޖޭގައި ކުރިއަށް ދިޔަ މުބާރާތުން ވެސް ރަން މެޑަލް ހޯދައިފަ އެވެ. އަޒްނީން އަކީ ސަރަހައްދީ މުބާރާތަކުން ޖެހި ޖެހިގެން ތިން ވަނަ ފަހަރަށް ރަން މެޑަލް ހޯދި ފުރަތަމަ ދިވެހި އެތުލީޓެވެ.
މީގެ އިތުރުން އަޒްނީން ވަނީ ވޯލްޑް ޗެމްޕިއަންޝިޕްގައި ވާދަކޮށް، އެންމެ ފަހުން ދެ ފަހަރު ވެސް ރަން މެޑަލް ހޯދައިފަ އެވެ. މިދިޔަ އަހަރު އޮތް މޯލްޑިވްސް ސްޕޯޓްސް އެވޯޑްސްގައި ހޮވި، އަހަރުގެ އެންމެ މޮޅު އެތުލީޓަކީ ވެސް އަޒްނީން އެވެ.
ހޮނިހިރު ދުވަހު ރާއްޖޭގައި ފެށި ސައުތު އޭޝިއަން ބޮޑީބިލްޑިން ޗެމްޕިއަންޝިޕްގައި އަޒްނީންގެ އިތުރުން، ރާއްޖޭގެ ހަތް އެތުލީޓަކު ވަނީ މެޑަލް ހޯދައިފަ އެވެ.
