ބޮޑީބިލްޑިންގގެ ކާމިޔާބީގެ ސިއްރަކީ ކުޅިވަރު ސިޔާސަތަށް ގެނައި ބަދަލު- ހަސީބު

ބޮޑީބިލިންޑިންގއިން މިހާރު ހޯދަމުންދާ ކާމިޔާބީތަކުގެ އެންމެ ބޮޑު ސަބަބަކީ ކުޅިވަރު ސިޔާސަތަށް ގެނައި ބަދަލުކަމަށް ކޯޗު އަބްދުލްހަސީބު ބުނެފިއެވެ.

ސައުތު އޭޝިޔަން ބޮޑީބިލްޑިންގ ޗެމްޕިއަންޝިޕްގައި ހޯދި ކާމިޔާބީތަކާ ގުޅޭގޮތުން ރާއްޖެ ޓީވީގެ ކުޅިވަރު ފައިލް ޕްރޮގްރާމްގައި ވާހަކަދައްކަމުން ހަސީބު ބުނީ ކާމިޔާބީ ތަކުރާރުކުރެވެމުންދާ ސަބަބަކީ ސަރުކާރުގެ ހުރިހާ ކުޅިވަރެއް ހަމަހަމަކުރުމުގެ ސިޔާސަތު ކަމަށެވެ. އެއާއެކު ކުޅިވަރާބެހޭ ވުޒާރާއިން ބާއްވާ ގާތްކަމަކީވެސް ކާމިޔާބީތަކުގެ ސަބަބެއްކަން ފާހަގަކުރިއެވެ.

ހަސީބު ބުނީ މިނިސްޓްރީން ބާއްވާ ގާތްކަމާއި, އެހީތެރިކަމުގެ ސަބަބުން އިތުރު ހިތްވަރަކާއެކު، އެސޯސިއޭޝަނާއި ބޮޑީބިލްޑަރުން ތިބީ އަދިވެސް އިތުރަށް މަސައްކަތްކުރަން ކަމަށެވެ. އޭނާ ބުނީ ކޮންމެ މުބާރާތެއްގައި މިހާރު ކާމިޔާބު ލިބެނީ ކުޅިވަރުތަކަށް އެހީވުމުގައި ފަރަގުކުރުމެއް ނެތުމުން ކަމަށެވެ.

އެންމެފަހުން ރާއްޖޭގައި ބޭއްވި ސައުތު އޭޝިޔަން ބޮޑީބިލްޑިންގ ޗެމްޕިއަންޝިޕްގައި އެކަނިވެސް ރާއްޖެއިން ހަތަރު ރަން މެޑަލް ހޯދިއެވެ. މީގެއިތުރުން ތިން ރިހި މެޑަލާއި ލޯ މެޑަލެއް ހޯދިއެވެ. ކުރިއަށް އޭޝިޔަން މުބާރާތާއި, ވަރލްޑް ޗެމްޕިއަންޝިޕް މިއަހަރު އެބައޮތެވެ. އެ ދެ މުބާރާތުގައިވެސް އެސޯސިއޭޝަން އަދި ކޯޗިންގ ޓީމުގެވެސް އަމާޒުހުރީ ރަން މެޑަލް ހޯދުމަށެވެ.