ކ. މާލެ
|
24 މާރޗް 2021 | ބުދަ 23:06
ވޯލްޑް ކަޕް ފެށުމަށް ހަމަޖެހިފައިވާ މެޗު ކުޅޭ ދޯހާގެ އަލް ބައިތު ސްޓޭޑިއަމް އިންފަންޓީނޯ ބައްލަވާލައްވަނީ
ވޯލްޑް ކަޕް ފެށުމަށް ހަމަޖެހިފައިވާ މެޗު ކުޅޭ ދޯހާގެ އަލް ބައިތު ސްޓޭޑިއަމް އިންފަންޓީނޯ ބައްލަވާލައްވަނީ
ގެޓީ އިމޭޖަސް
ގަތަރު ވޯލްޑް ކަޕް 2022
ގަތަރު ވޯލްޑް ކަޕް ފުރިހަމަވާނެ: އިންފަންޓީނޯ
 
ވޯލްޑް ކަޕުގެ މެޗުތައް ކުޅެވެގެންދާނީ 100 އިންސައްތަ ސަޕޯޓަރުންނާއެކު
 
ގަތަރުގައި ވޯލްޑް ކަޕް އޮންނާނީ ނޮވެމްބަރު މަހާއި ޑިސެމްބަރު މަހު

ގަތަރުގައި 2022 ވަނަ އަހަރު ބާއްވާ ފީފާ ވޯލްޑް ކަޕް ވެގެންދާނީ މިހާތަނަށް ބާއްވާ އެންމެ ފުރިހަމަ ވޯލްޑް ކަޕަށް ކަމަށް ފީފާގެ ރައީސް ޖިއާނީ އިންފަންޓީނޯ ވިދާޅުވެއްޖެއެވެ.

އާންމު ގޮތެއްގައި ވޯލްޑް ކަޕް ހޫނު މޫސުމުގައި ބާއްވަ ނަމަވެސް، ގަތަރުގައި ބާއްވާ ވޯލްޑް ކަޕް ކުރިއަށްދާނީ 2022 ވަނަ އަހަރުގެ ނޮވެމްބަރު މަހުގެ 21 ވަނަ ދުވަހުން ފެށިގެން ޑިސެމްބަރު މަހުގެ 18 ވަނަ ދުވަހުގެ ނިޔަލަށެވެ. އަދި ކޮވިޑް-19 ގެ ހާލަތުގައިވެސް ގަތަރުން އަންނަނީ ވޯލްޑް ކަޕަށް ވަރަށް ފުރިހަމައަށް ތައްޔާރުވަމުންނެވެ.

ގަތަރަށް ވޯލްޑް ކަޕް ބޭއްވުމުގެ ފުރުޞަތު ދިނުމުން ވަރަށް ބޮޑެތި ފާޑުކިއުންތަކެއް އަމާޒުވި ނަމަވެސް، ދާދި ފަހުން ދިން އިންޓަވިއުއެއްގައި އިންފަންޓީނޯ ވިދާޅުވީ ގަތަރުގައި ބާއްވާ ވޯލްޑް ކަޕް ވެގެންދާނީ މިހާތަނަށް ބާއްވާ އެންމެ ފުރިހަމަ ވޯލްޑް ކަޕަށް ކަމަށެވެ. އެގޮތުން މި ފަހަރުގެ ވޯލްޑް ކަޕަކީ ހަނދާން ނައްތާނުލެވޭނެ އިވެންޓަކަށް ވާނެ ކަމަށާއި، އަންނަ އަހަރުގެ މުބާރާތް ވެގެންދާނީ ވޯލްޑް ކަޕަކަށް މަރުހަބާ ކިޔޭނެ ހުރިހާ ވަސީލަތްތަކާއި ކަންކަމެއް ހުރި ގައުމަކުން ބާއްވާ ވޯލްޑް ކަޕަކަށް ކަމަށެވެ. އަދި ކޮވިޑުގެ މި ދަނޑިވަޅުގައިވެސް ވޯލްޑް ކަޕަށް ގަތަރުން ވަމުންދާ ތައްޔާރީތަކަށް ތާރީފު ޙައްޤު ކަމަށާއި، އަދި މި ހާލަތުގައިވެސް ވޯލްޑް ކަޕް މެޗުތައް ކުޅެވެގެންދާނީ 100 އިންސައްތަ ސަޕޯޓަރުންނާއެކުގައި ކަމަށްވެސް އިންފަންޓީނޯ ވިދާޅުވިއެވެ.

ވޯލްޑް ކަޕް މެޗުތައް ބަލަން 100 އިންސައްތަ ސަޕޯޓަރުން ވައްދަން ނިންމާފައިވާއިރު، މި އަހަރުގެ ފެބްރުއަރީ މަހު ގަތަރުގައި ކުރިއަށްދިޔަ ފީފާ ކުލަބު ވޯލްޑް ކަޕް ބަލަން 30 އިންސައްތަ ސަޕޯޓަރުން ވަނީ ވައްދާފައެވެ. އަދި ފުރިހަމަ ތައްޔާރީތަކާއެކު ވޯލްޑް ކަޕުގައި ދަނޑުތައް ފުރާލާނެ ކަމަށް ގަތަރުން މީގެ ކުރިންވެސް ވަނީ ބުނެފައެވެ.

ގަތަރުގައި ބާއްވާ ވޯލްޑް ކަޕުގެ ގްރޫޕް ސްޓޭޖުގައި ކޮންމެ ދުވަހަކު ހަތަރު މެޗު ކުޅޭ ގޮތަށް ވަނީ ހަމަޖައްސާފައެވެ. އެހެންކަމުން ސަޕޯޓަރުންނާއި މީޑިއާއަށް އެއްފަހަރާ ބެލޭނީ ކޮންމެ ދުވަހަކުވެސް ދެ މެޗެވެ.

ވޯލްޑް ކަޕް ފެށުމަށް ހަމަޖެހިފައިވާ މެޗު ކުޅޭނީ ގަތަރުގެ ދޯހާގެ އަލް ބައިތު ސްޓޭޑިއަމުގައެވެ. އެ ދަނޑަކީ 60،000 މީހުންގެ ޖާގައިގެ ދަނޑެކެވެ. އަދި މުބާރާތުގެ ފައިނަލް މެޗު ޑިސެމްބަރު މަހުގެ 18 ވަނަ ދުވަހު ކުޅުމަށް ހަމަޖެހިފައިވާއިރު، އެ މެޗު ކުޅޭނީ 80،000 މީހުންގެ ޖާގައިގެ ލުސައިލް ސްޓޭޑިއަމުގައެވެ.

ގަތަރުގައި އަންނަ އަހަރު ބާއްވާ ވޯލްޑް ކަޕް ފަސް ސިޓީއެއްގެ އަށް ދަނޑެއްގައި ކުޅޭއިރު، މުބާރާތުގައި ޖުމްލަ 32 ޓީމު ވާދަކުރާނެއެވެ. މި މުބާރާތް ހޯސްޓް ކުރުމުގެ ފުރުސަތު ގަތަރަށް ލިބުނީ އެމެރިކާ އާއި، ސައުތު ކޮރެއާ އާއި، ޖަޕާން އަދި އޮސްޓްރޭލިއާއާ ވާދަކޮށްގެންނެވެ.

އެންމެ ފަހުން އަޕްޑޭޓް ކުރީ: 3 ހަފްތާ ކުރިން
ރިވިއު ކުރީ: ހުސައިން ފަރިޔާޒް
33%
67%
0%
0%
0%
0%
ކޮމެންޓް