އިންފަންޓީނޯ ދެއްވީ ރާއްޖޭގެ ފުޓުބޯޅަ ކުރިއަރުވަން އެއްބާރުލުން ދޭނެ ކަމުގެ ޔަޤީންކަން

ރާއްޖޭގެ ފުޓުބޯޅަ ކުރިއެރުވުމަށް، ދުނިޔޭގެ ފުޓުބޯޅައިގެ މައި އިދާރާ (ފީފާ) އިން އެއްބާރުލުން ދޭނެ ކަމުގެ ޔަޤީންކަން، ފީފާގެ ރައީސް ޖިއާނީ އިންފަންޓީނޯ ދެއްވައިފި އެވެ.

އިންފަންޓީނޯ މިހެން ވިދާޅުވެފައި ވަނީ، ރާއްޖެ އަށް ކުރެއްވި ރަސްމީ ދަތުރުފުޅުގައި ރައީސުލްޖުމްހޫރިއްޔާ ޑޮކްޓަރު މުޙައްމަދު މުޢިއްޒުއާ ބައްދަލު ކުރައްވަ އެވެ. އެ ބައްދަލުވުމުގައި ފުޓުބޯޅަ އެސޯސިއޭޝަން އޮފް މޯލްޑިވްސް (އެފްއޭއެމް)ގެ ރައީސް އަޙުމަދު ޠާރިޤު (ޓޮމް) ވެސް ވަނީ ބައިވެރިވެ ވަޑައިގެންފަ އެވެ.

އެ ބައްދަލުވުމުގައި އިންފަންޓީނޯ ވިދާޅުވެފައި ވަނީ ފާއިތުވި ދުވަސް ތަކުގައި ރާއްޖޭގެ ފުޓުބޯޅަ އަށް ގިނަ ގޮންޖެހުން ތަކެއް ކުރިމަތިވެފައިވާ ކަމަށް ޤަބޫލު ކުރައްވާ ކަމަށެވެ. އިންފަންޓީނޯ އެ އިޝާރާތް ކުރެއްވީ އެފްއޭއެމްގެ ހިންގުން ބޮއްސުންލައި، ފީފާ އިން ރާއްޖެ ނޯމަލައިޒް ކުރި ކުރުމަށެވެ. އޭރު ރާއްޖެ އަށް ފީފާގެ ސަސްޕެންޝަނެއް ކުރިމަތި ވެދާނެ ކަމުގެ ބިރު ވެސް އޮތީ ބޮޑުވެފަ އެވެ.

ނަމަވެސް، އެފްއޭއެމްގެ އައު އިންތިޚާބެއް ބާއްވައި އައު ހިންގާ ކޮމެޓީއެއް ވަނީ އިންތިޚާބު ކޮށްފަ އެވެ. އިންފަންޓީނޯ ވިދާޅުވީ، މިހާރު ރާއްޖޭގެ ފުޓުބޯޅަ އަށް އަންނަމުންދާ ކުރިއެރުންތަކާ މެދު ހިތްހަމަ ޖެހިވަޑައިގަންނަވަ ކަމަށެވެ. ޚާއްސަކޮށް އެފްއޭއެމްގެ މިހާރުގެ ވެރިން ކުރަމުން އަންނަ މަސައްކަތަށް އިންފަންޓީނޯ ވަނީ ތައުރީފު ކުރައްވައިފަ އެވެ.

އިންފަންޓީނޯ ވިދާޅުވީ ފީފާ އިން ރާއްޖެ އަށް ދެމުން އަންނަ އެއްބާރުލުން އަބަދު ވެސް ދެމުން އަންނާނެ ކަަމަށެވެ. އަދި ހަމަ އެހެންމެ، ރާއްޖޭގެ ޒުވާނުންގެ ފުޓުބޯޅައިގެ ހުނަރު ތަރައްޤީ ކުރުމަކީ މުހިންމު ކަމެއް ކަމަށާއި، ރާއްޖެ އަށް ލިބިފައިވާ ޤުދުރަކީ ރީތި ކަމާ އެއްވަރަށް މުޅި ދުނިޔެ އަށް ފުޓުބޯޅައިގެ ކާމިޔާބީ އިން ވެސް ވިދާލާނެ ކަމަށް އިންފަންޓީނޯ ވަނީ ވިދާޅުވެފަ އެވެ.

މިއީ ފީފާގެ ރައީސްގެ ހައިސިއްޔަތުން ރަސްމީ ދަތުރުފުޅެއްގައި އިންފަންޓީނޯ ރާއްޖެ ވަޑައިގެންނެވި ފުރަތަމަ ފަހަރެވެ. މީގެ ކުރިން އިންފަންޓީނޯ ވަނީ ނުރަސްމީ ދަތުރުފުޅެއްގައި ޗުއްޓީ ހޭދަ ކުރެއްވުމަށް ރާއްޖެ ވަޑައިގެންފަ އެވެ. އެގޮތުން 2022 ވަނަ އަހަރު ޤަތަރުގައި ކުރިއަށް ދިޔަ ވާރލްޑް ކަޕަށް ފަހު އިންފަންޓީނޯ ވަނީ ރާއްޖެ ވަޑައިގެންފަ އެވެ.

ރަސްމީ ދަތުރުފުޅެއްްގައި ހުކުރު ދުވަހު އިންފަންޓީނޯ ރާއްޖެ ވަޑައިގެންނެވިއިރު، ހުކުރު ދުވަހުގެ ހަވީރު ވަނީ ޚާއްސަ ޙަރަކާތްތަކެއް ވެސް ކުރިއަށް ގެންގޮސްފަ އެވެ. ގަލޮޅު ރަސްމީ ދަނޑުގައި އޮތް އެ ޙަރަކާތުގައި އިންފަންޓީނޯ އާއި ރައީސް މުޢިއްޒު ބައިވެރިވެ ވަޑައިގެންނެވި ފުޓުބޯޅަ މެޗެއް ވެސް އޮތެވެ.

އިންފަންޓީނޯ ރާއްޖެ ވަޑައިގެންނެވިއިރު، މިދިޔަ ސެޕްޓެމްބަރު މަހުގެ ތެރޭގައި ޓޮމް ވަނީ އިންފަންޓީނޯއާ ބައްދަލު ކުރައްވައިފަ އެވެ. އެ ބައްދަލުވުމާ ގުޅޭ ގޮތުން އޭރު އިންފަންޓީނޯ ވިދާޅުވެފައި ވަނީ، ޓޮމް އާއި އޭނާގެ ލީޑަރޝިޕް އިން ވަރަށް ރަނގަޅު މަސައްކަތް ތަކެއް ކުރަމުން އަންނަ ކަމަށެވެ. އަދި ފީފާ އާއި އެފްއޭއެމް ގުޅިގެން ރާއްޖޭގެ ފުޓުބޯޅަ ކުރިއެރުވުމަށް ގިނަ މަސައްކަތް ތަކެއް ކުރުމަށް މަޝްވަރާ ކުރެވުނު ކަމަށް ވެސް ވިދާޅުވެފައިވެ އެވެ.

މީގެ ކުރިން ފީފާގެ ރައީސް އަކު ރާއްޖެ ވަޑައިގެންފައި ވަނީ 2006 ވަނަ އަހަރު އެވެ. އެއީ 2004 ގެ ސުނާމީ ހާދިސާގައި ގެއްލުން ލިބުނު ޤައުމު ތަކަށް ކުރެއްވި ދަތުރުފުޅެއްގައި، ފީފާގެ އޭރުގެ ރައީސް ސެޕް ބްލެޓާ އެވެ. އެ ދަތުރުފުޅުގައި ބްލެޓާ ވަނީ، ރާއްޖޭގެ އޭރުގެ ރައީސުލްޖުމްހޫރިއްޔާ އަލްއުސްތާޛް މައުމޫން ޢަބްދުލް ޤައްޔޫމްއާ ވެސް ބައްދަލު ކުރައްވައިފަ އެވެ.