ދުނިޔޭގެ ފުޓުބޯޅައިގެ މައި އިދާރާ (ފީފާ)ގެ ރައީސްއާ ދެކޮޅަށް އަޑު އުފުލުމަށް ޝުއޫރު ފާޅު ކުރި މީހުން ގަލޮޅު ދަނޑުން ބޭރު ކުރުމުން އެތައް ބައެއްގެ ފާޑު ކިޔުން އަމާޒުވެއްޖެ އެވެ.

ހުކުރު ދުވަހު އިންފަންޓީނޯ ރާއްޖެ ވަޑައިގެންފައިވާއިރު، އެ ދުވަހުގެ ހަވީރު ގަލޮޅު ރަސްމީ ދަނޑުގައި ވަނީ ޚާއްސަ ޙަރަކާތްތަކެއް ކުރިއަށް ގެންގޮސްފަ އެވެ. އެގޮތުން އިންފަންޓީނޯގެ ޓީމަކާއި، ރައީސުލްޖުމްހޫރިއްޔާ ޑޮކްޓަރު މުޙައްމަދު މުޢިއްޒުގެ ޓީމަކާ ބައްދަލު ކުރި ޚާއްސަ ފުޓުބޯޅަ މެޗެއް ވެސް އޮތެވެ.

އެ ޙަރަކާތް ބެލުމަށް ގިނަ ބަޔަކި ގަލޮޅު ދަނޑަށް ވަދެފައިވާއިރު، ފަލަސްޠީނުގެ ހައްޤުގައި އަޑު އުފުލުމަށް ވެސް ބައެއް މީހުން ވަނީ ދަނޑަށް ވަދެފަ އެވެ. އެގޮތުން ފަލަސްޠީނުގެ ދިދަ އާއި ބޯޑު ތަކުގެ އިތުރުން، ދުނިޔޭގެ ފުޓުބޯޅަ އިން އިސްރާއީލް ސަސްޕެންޑު ކުރުމަށް ގޮވާލާ ބޯޑުތައް ވެސް ހިފައިގެން މީހުން ތިއްބެވެ.

އެހެން ނަމަވެސް އެ ވަގުތު ދަނޑުގައި ތިބި ފުލުހުން ވަނީ "ބޭން އިސްރާއީލް" ޖަހާފައިވާ ބޯޑުތައް ހިފައިގެން ތިބި މީހުން ދަނޑުން ނެރެފަ އެވެ. އެކަމުގެ ފޮޓޯ ތަކާއި، ވީޑިއޯތައް ސޯޝަލް މީޑިއާ ގައި ދައުރު ވަމުން އަންނައިރު، ގިނަ ބަޔަކު އަންނަނީ އެކަމަށް ފާޑު ކިޔަމުންނެވެ.

އެގޮތުން ސުލްހަވެރިކަމާ އެކު ހިމޭން އިހުތިޖާޖެއް ނުވަަަތަ ޝުއޫރު ފާޅު ކުރަން ތިބި ބަޔަކު އެގޮތަށް ދަނޑުން ނެރުމަކީ ވަރަށް ދެރަ ކަމެއްގެ ގޮތުގައި ގިނަ ބަޔަކު ވަނީ ފާހަގަ ކޮށްފަ އެވެ. މީގެ އިތުރުން އެއީ ދިވެހި ފަސްގަނޑުން ފެނުނު ވަރަށް ލަދުވެތި މަންޒަރެއް ކަމަށާއި، އެވަރުގެ ކަމެއް ދިވެހި ފުލުހުން ވެސް ކޮށްގެން ނުވާނެ ކަމަށް ގިނަ ބަޔަކު ވަނީ ބުނެފަ އެވެ.

ޚާއްސަކޮށް ފީފާގެ ރައީސް އިންފަންޓީނޯ އަކީ އިސްރާއީލް އަށް ތާއީދު ކުރާ މީހަކަށްވާއިރު، އިންފަންޓީނޯއާ ދެކޮޅަށް ޝުއޫރު ފާޅު ކުރުމަށް އެއްވެ ތިބި މީހުން އެގޮތަށް ދަނޑުން ބޭރު ކޮށްގެން ވެސް ނުވާނެ ކަމަށް ބުނެފައިވެ އެވެ. އަދި އެ މީހުން ތިބީ ހަމައެކަނި ބޯޑު ތަކެއް ހިފައިގެން ކަމަށާއި، މަސްލަޙަތު ގެއްލޭ ފަދަ ކަމެއް ކޮށްފައި ނުވާއިރު، ގަދަ ބާރުން ދަނޑުން ނެރުމަކީ ހިތާމަވެރި ކަމެއް ކަމަށް ވެސް ބައެއް މީހުން ވަނީ ފާހަގަ ކޮށްފަ އެވެ.

ސޯޝަލް މީޑިއާގައި ޝުއޫރު ފާޅު ކުރަމުން އަންނަ މީހުން ބުނެފައި ވަނީ ރަޝިޔާ އިން ޔުކްރެއިންއާ ދެކޮޅަށް ހަނގުރާމަ ފެށުމާ އެކު، ފީފާ އިން ރަޝިޔާއާ ދެކޮޅަށް ފިޔަވަޅު އެޅި ކަމަށެވެ. އެ ހަނގުރާމައާ ގުޅިގެން ފީފާ އިން ވަނީ ރަޝިޔާ އާއި ރަޝިޔާގެ ޤައުމީ ޓީމު އަދި އެންމެހާ ކުލަބުތައް ފީފާ އިން ބާއްވާ ހުރިހާ މުބާރާތަކުން ސަސްޕެންޑު ކޮށްފަ އެވެ.

ނަމަވެސް، އިސްރާއީލް އިން ޣައްޒާ ހަނގުރާމަ ކުރިއަށް ގެންދަމުން އައިއިރު ވެސް ފީފާ އިން އިސްރާއީލްއާ ދެކޮޅަށް ފިޔަވަޅެއް އަޅާފައި ނުވެ އެވެ. އެކަމާ ގުޅިގެން ފީފާ އަށް ފާޑު ކިޔުން އަމާޒުވާން ފެށުމުން، އިންފަންޓީނޯ ވިދާޅުވެފައި ވަނީ ފީފާ އަށް ޖިއޯ ޕޮލިޓިކަލް މައްސަލަ ހައްލު ނުކުރެވޭނެ ކަމަށެވެ. އެކަމާ ގުޅިގެން ވެސް ގިނަ ބައެއްގެ ފާޑު ކިޔުން ފީފާ އަދި އިންފަންޓީނޯ އަށް އަމާޒުވި އެވެ.

މީގެ އިތުރުން ގިނަ ޤައުމު ތަކަކުން ވަނީ ފުޓުބޯޅަ އިން ފީފާ ސަސްޕެންޑު ކުރުމަށް ވެސް ގޮވާލައިފަ އެވެ. އެކަމަށް އެންމެ ބޮޑަށް ވަކާލާތު ކުރެއްވި އެއް ބޭފުޅަކީ ސްޕެއިންގެ ބޮޑު ވަޒީރު ޕެޑްރޯ ސަންޗޭޒް އެވެ. އެގޮތުން 2026 ވަނަ އަހަރުގެ ފީފާ ވޯލްޑް ކަޕްގައި އިސްރާއީލް ކުޅޭ ނަމަ، ސްޕެއިން އިން އެ މުބާރާތް ބޮއިކޮޓް ކުރާނެ ކަމަށް ސްޕެއިންގެ ބޮޑު ވަޒީރު ވަނީ ވިދާޅުވެފަ އެވެ.

ނަމަވެސް، ވާރލްޑް ކަޕް ކޮލިފިކޭޝަންގައި އިޓަލީ އަތުން ބަލިވެ ވާރލްޑް ކަޕަށް ކޮލިފައިވުމުގެ ފުރުސަތު އިސްރާއީލް އަށް ވަނީ ގެއްލިފަ އެވެ. އިސްރާއީލްއާ ދެކޮޅަށް ފިޔަވަޅު އެޅުމަށް ގޮވާލައި، ސަންޗޭޒް ދެއްކެވި ވާހަކަ ތަކަށް އޭރު ގިނަ ޤައުމު ތަކުން ވެސް ވަނީ ތާއީދު ކޮށްފަ އެވެ.