ނައިފަރުން އިތުރު މީހަކު ޕޮޒިޓިވްވެ ކޮންޓެކްޓުން ހޯދަނީ
24 މާރިޗު 2021 | ބުދަ 14:12ފެލިވަރުގައި މަސައްކަތް ކުރާ ނައިފަރު ރައްޔިތަކު ވަނީ ޕޮޒިޓިވްވެފައި
ޏައިފަރު - އެރަށުން އިތުރު މީހަކު ވަނީ ޕޮޒިޓިވްވެފައި
ޅ. ނައިފަރުގައި ހުރި މީހަކު ޕޮޒިޓިވްވުމާއި ގުޅިގެން އޭނާ މަސައްކަތް ކުރާ ފެލިވަރުން ނިމިދިޔަ 2 ހަފްތާގައި އެރަށަށް ދަތުރުކުރި މީހުން ހޯދަން ފަށައިފިއެވެ.
ޅ. ފެލިވަރާއި ގުޅޭގޮތުން ރާއްޖެ އެމްވީއަށް މަޢުލޫމާތުދެއްވަމުން ޅ އަތޮޅު ހޮސްޕިޓަލްގެ މެނޭޖަރ ޖައުފަރު އަބްދުﷲ ވަނީ އެ ހޮސްޕިޓަލަށް ގެންދިޔަ ދެ މީހަކު ބައްޔަށް ޕޮޒިޓިވްވެފައިވާކަމަށް ވިދާޅުވެފައެވެ. އެގޮތުން އެންމެ ފުރަތަމަ ބައްޔަށް ޕޮޒިޓިވްވެފައިވަނީ ހޮސްޕިޓަލުގެ މުއައްޒަފެއްކަމަށާއި، ދެން ޕޮޒިޓިވްވެފައި ވަނީ މިމަހުގެ 21 ވަނަ ދުވަހު ހޮސްޕިޓަލުގައި އެޑްމިޓްކުރި ނައިފަރު ރައްޔިތެއްކަމަށެވެ. މި މީހާ އެޑްމިޑްކޮށް ކޮވިޑްގެ އަލާމާތްތަކެއް ހުރުމުން ނެގި ސާމްޕަލްގެ ނަތީޖާ މިމަހުގެ 23 ވަނަ ދުވަހު ލިބުނު އިރު ޕޮޒިޓިވްކަމަށް ޖައުފަރު ވިދާޅުވިއެވެ.
މި މީހާއަކީ ވަޒީފާ އަދާކުރުމަށް އެ އަތޮޅުގެ މަސް ކާރުޚާނާ ހުންނަ ޅ. ފެލިވަރަށް ދާ މީހެއްކަމަށާއި، އެހެންކަމުން އެކަންކަން އިތުރަށް ބަލަމުން އަންނަ ކަމަަށް ހޮސްޕިޓަލުގެ މެނޭޖަރ ވިދާޅުވިއެވެ. އަދި ފެލިވަރުގެ ޙާލަތު ދެނެގަތުމަށް މަސައްކަތް ފަށާފައިވާކަމަށް ޅ. އަތޮޅު ހޮސްޕިޓަލްގެ މެނޭޖަރ ޖައުފަރު އަބްދުﷲ ވިދާޅުވިއެވެ. އެގޮތުން ނިމިދިޔަ ދެ ހަފުތާގައި ފެލިވަރަށް އެއްވެސް ބޭނުމެއްގައި ދަތުރުކޮށްފައިވާ ރައްޔިތެއްވާނަމަ އެކަން ޅ. އަތޮޅު ހޮސްޕިޓަލަށް އެންގުމަށް މިހާރު ވަނީ އެދިފައެވެ. މީގެ އިތުރުން ފެލިވަރަކީ ނ، ބ އަދި ޅ އަތޮޅުގެ ގިނަ ރައްޔިތުން ވަޒީފާއަދާކުރުމަށް ދާ ރަށެއްކަމުން މި ރަށްރަށުންވެސް 2 ހަފުތާގެ މުއްދަތުގައި ދަތުރުކޮށްފައިވާނަމަ އެކަން އެ ރަށެއްގެ ނުވަތަ އަތޮޅެއްގެ އަތޮޅު ހޮސްޕިޓަލަށް އެންގުމަށް އެދިފައިވާކަމަށް ޖައުފަރު އަބްދުﷲ ވިދާޅުވިއެވެ.
ޅ. އަތޮޅު ހޮސްޕިޓަލްގެ ޓީމެއް މިހާރު ފެލިވަރަށްގޮސް ޙާލަތު ދެނެގަތުމަށް މަސައްކަތްކުރަމުންދާކަމަށް ޖައުފަރު އަބްދުﷲ ހާމަކުރެއްވިއެވެ. މި ޓީމުން ފެލިވަރަށްގޮސް ހުމާއި ރޯގާގެ އަލާމާތްތައް ހުރި މީހުންގެ ސާމްޕަލް ނަގާ އެ ރަށުގެ ޙާލަތު ދެނެގަންނާނެކަމަށް ޖައުފަރު އަބްދުﷲ ވިދާޅުވިއެވެ. އަދި މިކަމުގައި އިތުރަށް އަޅަންޖެހޭ ފިޔަވަޅުތަކާއި ގުޅޭގޮތުން ސަރުކާރުގެ މުއައްސަސާތަކާއި ގުޅިގެން އަވަސް އަދި ހަރުދަނާ ފިޔަވަޅުތަކެއް އެޅުމަށް ދަނީ މަސައްކަތްކުރަމުންނެވެ. ޅ. އަތޮޅު ހޮސްޕިޓަލްގެ މެނޭޖަރ ވަނީ ހުމާއި ރޯގާ އަދި މިނޫނަސް ކޮވިޑްގެ އެއްވެސް އަލާމާތެއް ހުރިނަމަ އެކަހެރިވެ ރައްކާތެރިކަމުގެ ގޮތުން އަޅަންޖެހޭ ފިޔަވަޅުތައް އަޅާ ސާމްޕަލް ނެގުމަށް ގޮވާލާފައެވެ.
