މ. އަތޮޅުގެ ތަރައްގީއަށް މިއަހަރު ކުރާ އެންމެ މުހިންމުކަމަކީ އެއާޕޯޓާއި މަސްވެރިންނަށް ހަދައިދޭ ބަނދަރާއި ސްޓޯރޭޖްގެ މަސައްކަތް: ރައީސް

މ. އަތޮޅުގެ ތަރައްގީއަށް މިއަހަރު ކުރާ އެންމެ މުހިންމުކަމަކީ އެއާޕޯޓާއި މަސްވެރިންނަށް ހަދައިދޭ ބަނދަރާއި ސްޓޯރޭޖްގެ މަސައްކަތްކަމަށް ރައީސުލްޖުމްހޫރިއްޔާ އިބްރާހީމް މުހައްމަދު ސާލިހް ވިދާޅުވެއްޖެއެވެ.

ރަށްވެހި ފަތިސް، ކެނޑިޑޭޓުންނާއި ކެމްޕެއިން ޓީމުތަކާއެކު އަންގާރަ ދުވަހުގެ ރޭ ސިލްސިލާ ބައްދަލުވުމުގައި ރައީސް ސާލިހް ވިދާޅުވީ މި އަހަރަކީ މުލަކުގެ ތަރައްގީއަށް ވަރަށް ބޮޑު އަދި ގިނަ މަޝްރޫތައް ފަށާނެ އަހަރެއް ކަމަށެވެ. އެގޮތުން މަސް ބަނދަރާއި 50 މެޓްރިކްޓަނުގެ އައިސް ޕްލާންޓަކާއި، 500 މެޓްރިކްޓަނުގެ ކޯލްޑް ސްޓޯރޭޖެއްވެސް ގާއިމްކުރައްވާނެ ކަމަށް ރައީސް ވިދާޅުވިއެވެ. ރައީސް ވިދާޅުވީ އެ ބަނދަރު ވެގެންދާނީ މުޅި މެދުރާއްޖެތެރޭގެ މަސްވެރިންނަށް ހުރިހާ ކަމެއް ވާނެ ތަނެއް ކަމަށެވެ. މަގު ހެދުމުގެ މަސައްކަތް ރޯޑް ކޯޕަރޭޝަންއާ ހަވާލުކޮށްފައިވާ ކަމަށާއި ގިރާ ސަރަހައްދުގެ މަސައްކަތްވެސް އެމްޓީސީސީއާ ހަވާލުކޮށްގެން ކުރަން މަސައްކަތްކުރަމުން އަންނަ ކަމަށް ވިދާޅުވިއެވެ.

އަދި ސްކޫލްގެ ތިން ބުރި އިމާރާތެއް އެޅުމަށް މޭ މަހު ޓެންޑަރއަށް ހުޅުވާލާނެކަމަށްވެސް އެމަނިކުފާނު ވިދާޅުވިއެވެ. އެރަށު ފުޓްބޯޅަ ދަނޑުގެ މަސައްކަތް މި އަހަރުގެ ބަޖެޓުގައި ހިމެނިފައި ނެތަސް އެރަށަށް އިސްކަން ދޭނެ ކަމަށާއި ޒުވާނުންގެ މަރުކަޒުގެ ސްޓަރަކްޗާ މިހާރު ނިމިފައިވާ ކަމަށްވެސް ވިދާޅުވިއެވެ. އަދި ދެވަނަ ކުއަރޓަރުގައި ޓެންޑަރއަށް ހުޅުވާލާނެ ކަމަށް ވިދާޅުވިއެވެ. މީގެ އިތުރަށް ބަނދަރުގެ މަސައްކަތް 56 މިލިއަނަށް އެމްޓީސީސީއާ ހަވާލުކޮށްފައިވާކަމަށާއި ސިއްހީ މަރުކަޒުގެ އެކްސްޓެންޝަންގެ މަސައްކަތް ޓެންޑަރ ކޮށްފައިވާ ކަމަށް ވިދާޅުވިއެވެ.

މ. މުލީގައި އަޅާ އެއާޕޯޓްުގެ މަސައްކަތް 28 ފެބްރުއަރީގައި އެމްޓީސީސީއާ ހަވާލުކޮށް އެއް އަހަރު ތެރޭގައި ނިންމާނެކަމަށް ރައީސް ވިދާޅުވިއެވެ. އެއީ 221 މިލިއަން ރުފިޔާގެ ޕްރޮޖެކްޓެއް ކަމަށާއި އެކަން ނިމޭއިރު ރަށަށް ވަރަށް ބޮޑު ތަރައްގީއެއް އަންނާނެކަމަށްވެސް ވިދާޅުވިއެވެ. ނާލާފުއްޓާއި މުލި ގުޅާލުމުގެ ވިސްނުން އެބަހުރި ކަމަށާއި އެކަމުގެ ސަރވޭ ޕްލޭނިން މިނިސްޓްރީން ކުރާކަމަށް ރައީސް ވިދާޅުވިއެވެ. އަދި އެއާޕޯޓުގެ މަސައްކަތަށް ފަހު އެކަން ފައްޓާނެކަމަށްވެސް ރައީސް ވިދާޅުވިއެވެ.

ރައީސް އިތުރަށް ވިދާޅުވީ މ. އަތޮޅުގެ ކުނި މެނޭޖްކުރާނެ ވެހިކަލްތައް މުޅި އަތޮޅުގެ ހުރިހާ ރަށަކަށް ފޯރުކޮށްދޭނެ ކަމަށާއި ރޯދަމަސް ފެށެންވާއިރަށް ކަރަންޓު ކޭބަލް އަޕްގްރޭޑް ކުރުމުގެ މަސައްކަތް ފެށޭނެ ކަމަށެވެ.