މަސައްކަތް ކުރަނީ އައްޑޫ ސިޓީގެ ތަރައްޤީއަށް 'ހައި' ޖަމްޕެއް ޖެހުމަށް- ފައްޔާޟް
22 މާރިޗު 2021 | ހޯމަ 07:27އައްޑޫ ސިޓީގެ އެއަރޕޯޓްގެ މަސައްކަތް ތިންވަނަ ކުއާޓަރގައި ހަވާލު ކުރެވޭނެ
އިކޮނޮމިކް މިނިސްޓަރ ފައްޔާޒް އިސްމާއިލް
މަސައްކަތްކުރަމުން އަންނަނީ އައްޑޫ ސިޓީގެ ތަރައްޤީއަށް ހައި ޖަމްޕެއް ޖެހުމަށް ކަމަށް މިނިސްޓަރ އޮފް އިކޮނޮމިކް ޑިވެލޮޕްމަންޓް، އަލްއުސްތާޛު ފައްޔާޟް އިސްމާޢީލް ވިދާޅުވެއްޖެއެވެ. ރަށްވެހި ފަތިސް ކެމްޕެއިން ބައްދަލުވުމުގައި އައްޑޫ ސިޓީއާ ގުޅޭގޮތުން ވާހަކަ ދައްކަވަމުން ފައްޔާޟް ވިދާޅުވީ، އައްޑޫ ސިޓީއަކީ މާލެ ފިޔަވައި އިޤްތިސާދީ އެއްމެ ބޮޑު ސެންޓަރު ކަމަށެވެ. އެހެންކަމުން ތަރައްޤީގެ މަޝްރޫއުތައް ބާރު ސްޕީޑުގައި ކުރިއަށް ގެންދާ ކަމުގައެވެ.
މަގު ހެދުމާއި ބިންހިއްކުން އަދި އެއަރޕޯޓުގެ މަސައްކަތް ވެސް ހިމެނޭ ގޮތަށް މުޅި ޖުމްލަ 180 މިލިއަން ޑޮލަރުގެ މަސައްކަތް އެ ސިޓީގައި ކުރިއަށް ރޭވިފައި އޮތްކަމަށް ވިދާޅުވިއެވެ. މިނިސްޓަރ ވިދާޅުވީ، ބިންހިއްކުމުގެ މަޝްރޫއުގެ ތެރެއިން 2 ރިސޯޓެއް ހެދުމަށް ބިން ހިއްކުން ވެސް ހިމެނޭ ކަމަށެވެ.
ގަން އެއަރޕޯޓުގެ ފީސިބިލިޓީ ރިޕޯޓް ހެދުމަށް މާރިޗް މަހުގެ ފަހުކޮޅުގައި ކޮންސަލްޓެންޓް އެ ސިޓީއަށްދާނެ ކަމަށާއި ރިޕޯޓު ނިމި ތިންވަނަ ކުއާޓަރގައި ކޮންޓްރެކްޓަރާ މަސައްކަތް ހަވާލުކުރެވޭނެ ކަމަށް ވިދާޅުވިއެވެ. މިނިސްޓަރ ވިދާޅުވީ، އެއަރޕޯޓުގެ މަސައްކަތް ނިމޭއިރު މިހާރު ދިމާވަމުން އަންނަ މައްސަލައަށް ހައްލު ލިބިގެންދާނެ ކަމަށާއި އެއީ އެ ސަރަހައްދުގެ ފަތުރުވެރިކަން ވަރުގަދަ ކުރުމަށް ވަރަށް މުހިއްމު ކަމެއް ކަމަށެވެ. އެހެންކަމުން ސަރުކާރުން ރިސްކް ނަގައިގެން އެއަރޕޯޓަށް ޚަރަދު ކުރަން ނިންމެވީކަން ވެސް މިނިސްޓަރ ފާހަގަ ކުރެއްވިއެވެ.
ފަތުރުވެރިކަމަށް އެނދު އިތުރުކުރުމުގެ ގޮތުން އައްޑޫ ސިޓީގެ 'ސަވާހިލި' އާއި 'ހަންކެޑެ'، މި ދެ ރަށުގައި އިންޓަރގްރޭޓެޑް ޓުއަރިޒަމްގެ ތެރެއިން 2000 (ދެހާސް) އެނދު ތަރައްޤީކުރުމަށްޓަކައި ޕްލޭން ކުރަމުން އަންނަ ކަމުގައި ވިދާޅުވިއެވެ.
އައްޑޫ ސިޓީގެ ތަރައްޤީގެ އެކިއެކި މަޝްރޫއުތަކަށް 535 މިލިއަން ރުފިޔާ ދައުލަތުގެ ޕީއެސްއައިޕީ ބަޖެޓުން، ފާއިތުވި ދެ އަހަރުގެ ތެރޭގައި ޚަރަދުކޮށްފައިވެއެވެ.
