އެމްޑީޕީން ކައުންސިލް އިންތިހާބަށްވާ އެންމެ ބޮޑު ވައުދަކީ ކައުންސިލް ހައުސިންގ ޔުނިޓް – އަނަސް

މާލޭ ސިޓީއަށް ދިމާވެފައިވާ ބޯހިޔާވަހިކަމުގެ މައްސަލަ ހައްލުކުރެވޭނީ މޯލްޑިވިއަން ޑިމޮކްރެޓިކް ޕާޓީ (އެމްޑީޕީ) އަށް ކަމަށާއި، އެމްޑީޕީން ކައުންސިލް އިންތިހާބަށްވާ އެންމެ ބޮޑު ވައުދަކީ ކައުންސިލް ހައުސިންގ ޔުނިޓްތަކެއް ކަމަށް މާލޭ ސިޓީގެ މޭޔަރު ކަމަށް ވާދަކުރައްވާ އެމްޑީޕީގެ ކެނޑިޑޭޓު އަނަސް އަބްދުއްސައްތާރު ވިދާޅުވެއްޖެއެވެ.

ރާއްޖޭޓީވީގެ "ފަލަ ސުރުޚީ" ޕްރޮގްރާމްގައި ވާހަކަދައްކަވަމުން އަނަސް ވިދާޅުވީ އެމްޑީޕީއިން ގުޅިފަޅު ތަރައްގީ ކުރުމަށް އެތަނުން ބިން ހިއްކާ ހައުސިންގ ޔުނިޓް އެޅުމަށް ނިންމާފައިވީ ނަމަވެސް އެމްޑީޕީގެ ސަރުކާރުގެ ފަހުން އައި ސަރުކާރުން އެކަމާއި ހަވާލުވެ ހުންނެވި ވަޒީރު ވިދާޅުވީ އެއީ މީހުން ދިރިއުޅެން ކަމުނުދާ ތަނެއް ކަމަށެވެ.

Advertisement

އެހެންނަމަވެސް މިހާރު މި ފެންނަނީ ރައީސް ޔާމީން ސަރުކާރާއި ރައީސް ވަހީދު ސަރުކާރުގެ ހައުސިންގ މިނިސްޓަރ ކަމުގައި ހުންނަވާ ގުޅީ ފަޅު ގޯސް ކުރި މިނިސްޓަރަށް އެ ފަޅު ރަނގަޅުވެގެން އުޅޭތަން ކަމަށް އަނަސް ވިދާޅުވިއެވެ.

އަނަސް ވިދާޅުވީ މާލޭގެ ރައްޔިތުންނަށް ދިމާވެފައިވާ އެންމެ ބޮޑު މައްސަލައަކީ ބޯހިޔާވަހިކަމުގެ މައްސަލަ ކަމަށާއި، އެހެންނަމަވެސް އެމްޑީޕީގެ ކައުންސިލެއް ލިބިއްޖެ ނަމަ އެކަން ހައްލު ކޮށްދެއްވާނެ ކަމަށެވެ. އެގޮތުން އެމްޑީޕީން މި ކައުންސިލް އިންތިހާބަށްވާ އެންމެ ބޮޑު ވައުދަކީ ކައުންސިލް ހައުސިންގ ޔުނިޓް ކަމަށް އަނަސް ވިދާޅުވިއެވެ.

މީގެ އިތުރުން އަނަސް ވިދާޅުވީ ވަޒީފާގެ ފުރުސަތު ނެތް މާލޭ ރައްޔިތުންގެ ދަފްތަރެއް އެކުލަވާލާނެ ކަމަށާއި، އޭރުން ވަޒީފާގެ ވިއުގައި ގާއިމްކުރުމަށް ފަސޭހަވާނެ ކަމަށެވެ. އަދި މާލޭގައި ދިރިއުޅޭ ބިދޭސީންގެ ދަފްތަރެއްވެސް އެކުލަވާލާނެ ކަމަށާއި، އެއަށްފަހު ދިވެހީންނަށް ވަޒީފާއަށް އިސްކަން ދޭންވީ ގޮތްތަކެއް އެކުލަވާލާނެ ކަމަށް އަނަސް ވިދާޅުވިއެވެ.

މި ޕްރޮގްރާމްގައި ވާހަކަދައްކަވަމުން އަނަސް ވަނީ އޭނާއާ ވާދަކުރައްވާ ޕީޕީއެމްގެ ކެނޑިޑޭޓު ޑރ. މުހައްމަދު މުއިޒަށް ވަރަށް ބޮޑަށް ފާޑުވިދާޅުވެފައެވެ. އެގޮތުން އަނަސް ފާހަގަކުރެއްވީ ޕީޕީއެމްގެ ކެނޑިޑޭޓުންނަކީ ލާމަރުކަޒީ ނިޒާމަށް ފާޑުކިޔާފައިވާ ކެނޑިޑޭޓުން ކަމަށެވެ.