ކުޅިވަރުގައި ހަރަކާތްތެރިވާ ފަރާތްތަކަށް އެވޯޑެއް ނުލިބު މާޔޫސްވެފައި ވަނިކޮށް އެފަރާތްތަކުގެ އަގުވަޒަން ކުރުމުގެ ގޮތުން މިހާރު ނޫހުން "މިހާރު އެވޯޑްސް"ގެ ނަމުގައި އެވޯޑެއް ތައާރަފްކޮށްފިއެވެ.

މި އެވޯޑް އިފްތިތާހްކޮށްފައި ވަނީ ހޮޓެލް ޖެންގައި ބުދަ ދުވަހުގެރޭ ބޭއްވި ހަފްލާއެއްގައެވެ.

ކުޅިވަރު ކުޅުންތެރިންނާއި ކޯޗުންނާއި ރެފްރީން އަދި އެހެނިހެން ހިދުމަތްތެރިންގެ އަގު ފުޅާ ދާއިރާއެއްގައި ވަޒަންކުރުމުގެ ގޮތުން އަލަށް މި ފަށާ "މިހާރު އެވޯޑްސް"ގައި ދިވެހި ހުނަރުވެރިންނަށް 24 އެވޯޑެއް މި އަހަރު ދިނުމަށް ވަނީ ނިންމާފަ އެވެ.

މި އެވޯޑްސްގައި ހިމެނޭ ކުޅިވަރުތަކަކީ ފުޓުބޯޅަ، ވޮލީ ބޯޅަ އަދި އިންޑިވިޖުއަލް ކުޅިވަރުތައް ކަމަށްވާ އެތުލެޓިކްސް، ޓޭބަލް ޓެނިސް، ސްވިމިންގ (ފެތުން)، އަދި ބެޑްމިންޓަނެވެ. މިއީ ރާއްޖޭގައި އިންޑިވިޖުއަލް ކުޅިވަރުތަކެއް ހިމަނައިގެން އެވޯޑެއް ތައާރަފްކުރި ފުރަތަމަ ފަހަރެވެ.

މިހާރުން ދިނުމަށް ނިންމާފައިވާ އެވޯޑްސް

ފުޓްބޯޅަ: ރާއްޖޭގެ ފުޓްބޯޅަ ސީޒަންގައި އެންމެ ގިނަ ލަނޑު ޖަހާ ކުޅުންތެރިޔާ އަށް ދޭ "ރަން ބޫޓު".

އެންމެ މޮޅު ފުޓްބޯޅަ ކުޅުންތެރިޔާ: މި ބައިގައި އަހަރުގެ އެންމެ މޮޅު ފުޓްބޯޅަ ކުޅުންތެރިޔާގެ އިތުރުން އެންމެ މޮޅު ދެ ވަނަ އަދި އެންމެ މޮޅު ތިން ވަނަ ކުޅުންތެރިޔާ ހޮވުމަށް ވަނީ ނިންމާފައެވެ.

އެންމެ މޮޅު ޒުވާން ކުޅުންތެރިޔާ: (މި އެވޯޑް ލިބޭނީ މުޅި ސީޒަންގައި އެންމެ މޮޅަށް ކުޅުނު 21 އަހަރުން ދަށުގެ ކުޅުންތެރިޔާއަށް)

ވޮލީބޯލް، ފިރިހެން: މިބައިން އެވޯޑް ލިބޭނީ އަހަރުގެ އެންމެ މޮޅު ފިރިހެން ކުޅުންތެރިޔާ، އެންމެ މޮޅު ފިރިހެން ދެ ވަނަ އަދި ތިން ވަނަ ކުޅުންތެރިޔާއަށެވެ. އޭގެ އިތުރުން އަހަރުގެ އެންމެ މޮޅު ޒުވާން ފިރިހެން ކުޅުންތެރިޔާގެ އެވޯޑް ހިމެނޭނެއެވެ.

ވޮލީބޯލް، އަންހެން: މި އެވޯޑްސްތައް ލިބޭނީ އަހަރުގެ އެންމެ މޮޅު އަންހެން ކުޅުންތެރިޔާ، އެންމެ މޮޅު އަންހެން ދެވަނަ އަދި ތިން ވަނަ ކުޅުންތެރިޔާއަށެވެ. މި ބައިން ވެސް އަހަރުގެ އެންމެ މޮޅު ޒުވާން ކުޅުންތެރިޔާ ހޮވާނެއެވެ.

އިންޑިވިޖުއަލް ކުޅިވަރުތަކުގެ އެވޯޑްސް: މިބައިގެ އެވޯޑްސްތައް ދޭނީ އެތުލެޓިކްސް، ފެތުން، ޓޭބަލް ޓެނިސް އަދި ބެޑްމިންޓަން އެއްކޮށްލައިގެން. މި އެވޯޑްތައް ލިބޭނީ އަހަރުގެ އެންމެ މޮޅު އިންޑިވިޖުއަލް ފިރިހެން ކުޅުންތެރިޔާ އަދި އެންމެ މޮޅު އިންޑިވިޖުއަލް ފިރިހެން ދެ ވަނަ އަދި ތިން ވަނަ ކުޅުންތެރިޔާ އަށެވެ. އަންހެން ބައިގައި ވެސް ހޮވާނީ އަހަރުގެ އެންމެ މޮޅު އިންޑިވިޖުއަލް އަންހެން ކުޅުންތެރިޔާ އާއި އެންމެ މޮޅު އިންޑިވިޖުއަލް އަންހެން ދެ ވަނަ އަދި ތިން ވަނަ ކުޅުންތެރިޔާއެވެ.

ސްޕެޝަލް ރިކޮގްނިޝަން އެވޯޑްސް: މި އެވޯޑް ލިބޭނީ ބައިނަލްއަގްވާމީ ކުޅިވަރުގެ މައިދާނުގައި ފާހަގަކޮށްލެވޭ ކާމިޔާބީތައް ހޯދާ ދިވެހި ހުނަރުވެރިންނަށެވެ.

މުހައްމަދު ޒާހިރު ނަސީރުގެ އެވޯޑް: މިއީ ދިގު މުއްދަތެއްގައި ދިވެހި ކުޅިވަރަށް ޚިދުމަތްކޮށްދޭ ފަރާތަކަށް ދޭ ލައިފްޓައިމް އެޗީވްމަންޓް އެވޯޑެކެވެ. އެވޯޑް ޚާއްސަކުރަނީ ދިވެހި ކުޅިވަރަށް ބައި ގަރުނެއްހާ ދުވަހު ޚިދުމަތްކުރެއްވި މަރްހޫމް މުހައްމަދު ޒާހިރު ނަސީރުގެ ހަނދާނާއި ޝަރަފްގައެވެ.

އަހަރުގެ އެންމެ މޮޅު ކޯޗު: މި އެވޯޑަށް އެންމެ މޮޅު ކޯޗު ހޮވާނީ ފުޓްބޯޅަ އާއި ވޮލީބޯޅައިގެ އިތުރުން އެހެން ބައެއް ކުޅިވަރުތައް އެއްކޮށްލައިގެންނެވެ. މިއީވެސް ހުރިހާ ކުޅިވަރެއް އެއްކޮށްލައިގެން ދޭ އެވޯޑެކެވެ.

އަހަރުގެ އެންމެ މޮޅު ރެފްރީ: މިއީ ވެސް ހުރިހާ ކުޅިވަރެއް އެއްކޮށްލައިގެން، ރެފްރީންގެ އަގު ވަޒަންކުރުމަށް ދޭ އެވޯޑެކެވެ.