ފަންސަވީސް އަހަރަށް ފަހު ރޯމާއަށް ކުޅުން ހުއްޓާލި އެޓީމުގެ ކެޕްޓަން ފްރެންޗެސްކޯ ޓޮޓީގެ އަގުވަޒަންކޮށް އޭނާއަށް އޫއެފާ ޕްރެސިޑެންޓްސް އެވޯޑް ދިނުމަށް އެއިދާރާގެ ރައީސް އަލެގްޒެންޑާ ކެފެރިން ނިންމަވައިފިއެވެ. 

ޔޫރަޕްގެ ފުޓުބޯޅައިގެ މައި އިދާރާ (ޔޫއެފާގެ) ރައީސް ކެފެރިން ވިދާޅުވެފައި ވަނީ، އެއް ކްލަބެއްގައި 25 އަހަރު ވަންދެން ހުރެ އޭނާ ދައްކުވައިދީފައި ވަނީ ފުޓުބޯޅައަށް ރީތި ނަމޫނާއެއް ކަމަށެވެ. އެގޮތުން ޓޮޓީގެ ފަރާތުން ފެނިގެން ގޮސްފައި ވަނީ ޕްރޮފެޝަނަލްކަމާ އެކު އެއްކުލަބަކަށް ސާބިތުވެ ހުރިތަން ކަމަށާއި، މިއީ ވަރަށް މަދުން ނޫނީ ނުފެންނަ ކަމެއް ކަމުން، މިފަދަ ހިދުމަތްތަކުގެ އަގުވަޒަންކުރުމަކީ ޔޭއެފާގެ ޒިންމާއެއް ކަމަށް ވެސް ކެފެރިން ވަނީ ވިދާޅުވެފައެވެ.

އުމުރުން 40 އަހަރުގައި ރޯމާއިން ޓޮޓީ ވަކިވެފައި ވާއިރު، އޭނާގެ މުޅި ފުޓުބޯޅަ ހަޔާތް ވެސް  ހޭދަކޮށްފައިވަނީ ރޯމާގައެވެ. އުމުރުން އެންމެ 16 އަހަރުގައި ރޯމާއަށް ކުޅެން ފެށި ޓޮޓީ ވަނީ އެކުލަބަށް 786 މެޗު ކުޅެދީފައެވެ. އަދި އޭނާވަނީ އިޓާލިއަން ލީގުގައި 250 ލަނޑު ހަމަކުރުމުގެ އިތުރުން އެޓީމާ އެކު ލީގު ވެސް އުފުލާލާފައެވެ.

ޔޫއެފާގެ ޕްރެޒިޑެންޓްސް އެވޯޑް މީގެ ކުރިން ލިބިފައިވަނީ، ނެދަލޭންޑްސްގެ ޔޯހާން ކްރައިފް އާއި، ޖަރުމަނުގެ ފްރާންޒް ބެކެންބާގެ އިތުރުން އިންގްލޭންޑްގެ ބޮބީ ޗާލްޓަން އަށެވެ.