އަތޮޅު ތެރޭގައި ކޮވިޑުގެ 10 ކްލަސްޓަރ، އެކްޓިވް ކޭސްވެސް 207!

އަތޮޅު ތެރޭގައި ކޮވިޑް-19 ގެ 10 ކްލަސްޓަރ މިވަގުތު ފާހަގަވެފައިވާކަމަށް ހެލްތް އިމަރޖެންސީ އޮޕަރޭޝަންސް ސެންޓަރ (އެޗްއީއޯސީން) ބުނެފިއެވެ.

އާދިއްތަ ދުވަހުގެރޭ އެޗްއީއޯސީގައި ބޭއްވި ނޫސްވެރިންގެ ބައްދަލުވުމުގައި އަތޮޅު ތެރޭގެ ކޮވިޑް ކްލަސްޓަރތަކާއި ގުޅޭ މައުލޫމާތު ހިއްސާ ކުރައްވަމުން އަބްދުﷲ މައުރޫފް ވިދާޅުވީ، އަތޮޅު ތެރެއިންވެސް މޭޖަރ ކްލަސްޓަރތަކެއް ފެނިފައިވާ ކަމަށެވެ. އެގޮތުން ހއ ބާރަށުން މިހާތަނަށް ޖުމުލަ 36 މީހަކު ޕޮޒިޓިވްވެފައިވާ ކަމަށާއި، އެ ކޭސްތަކާއި ގުޅިގެން 217 ކޮންޓެކްޓެއް ފާހަގަވެފައިވާ ކަމަށެވެ. އަދި މި ކޭސްތަކާއި ގުޅިގެން ފާއިތުވި ދުވަސްތަކުގައި 240 ސާމްޕަލްއެއް ނެގިފައިވާކަމަށް މައުރޫފް ވިދާޅުވިއެވެ.

އޭގެ އިތުރުން، ނ ޅޮހިން 23 މީހަކު ޕޮޒިޓިވްވެފައިވާކަން ފާހަގަ ކުރައްވައި މައުރޫފް ވިދާޅުވީ، މި ކޭސްތަކާއި ގުޅިގެން 190 ކޮންޓެކްޓެއް ފާހަގަވެ، 323 ސާމްޕަލްއެއް މިހާތަނަށް ނެގިފައިވާ ކަމަށެވެ. ހަމަ އެގޮތަށް ހއ ދިއްދޫއިން 15 މީހަކު ޕޮޒިޓިވްވެފައިވާއިރު، މި ކޭސްތަކުގެ ޑައިރެކްޓް ކޮންޓެކްޓުންގެ ގޮތުގަައި 26 މީހަކު ފާހަގަވެފައިވާކަމަށް މައުރޫފް ވިދާޅުވިއެވެ. އަދި ދ ކުޑަހުވަދޫންވެސް 22 މީހަކު ޕޮޒިޓިވްވެފައިވާއިރު، 155 ކޮންޓެކްޓެއް ވަނީ ފާހަގަ ކުރެވިފައެވެ. އަދި މި ކޭސްތަކާއި ގުޅިގެން މިހާތަނަށް 427 ސާމްޕަލްއެއް ނަގާފައިވާކަމަށް އޭނާ ވިދާޅުވިއެވެ.

މި ރަށްތަކުގެ އިތުރުންވެސް، އދ ފެންފުށި، އއ ތޮއްޑޫ، ރ އުނގޫފާރު، ކުޅުދުއްފުށީގެ އިތުރުން، ފ ނިލަންދޫ އަދި ދ މީދޫއިންވެސް ޕޮޒިޓިވް ކޭސްތަކެއް ފެނި، ކޮންޓެކްޓުންގެ ސާމްޕަލް ނަގާފައިވާކަމަށް މައުރޫފް ވިދާޅުވިއެވެ. މައުރޫފް ވިދާޅުވީ، އަތޮޅު ތެރޭގައި މިވަގުތުވެސް ޖުމުލަ 207 އެކްޓިވް ކޭސް ފާހަގަވެފައިވާ ކަމަށެވެ. އަދި މިވަގުތުވެސް 7 ރަށެއް މޮނިޓަރިންގ ގައި ވާއިރު، ކޮންމެ ރަށަކަށް ދަތުރުކޮށްފައިވާ ފަރާތްތަކުގެ ކޮންޓެކްޓް ޓްރޭސިންގވެސް ހަދަމުންދާކަމަށް އޭނާ ވިދާޅުވިއެވެ.