ދިއްދޫ އަމާންވެށިން ޕޮޒިޓިވްވި ދެ މީހެއް އިތުރު ފަރުވާއަށް ށ. ކޮވިޑް ފެސިލިޓީއަށް
26 ސާމްޕަލްގެ ތެރެއިން 16 ސާމްޕަލް ޕޮޒިޓިވް
ހއ. ދިއްދޫ
ހއ، ދިއްދޫ އަމާންވެށިން ޕޮޒިޓިވްވި ދެ މީހެއް އިތުރު ފަރުވާއަށް ށ ކޮވިޑް ފެސިލިޓީއަށް ގެންގޮސްފިއެވެ.
ރާއްޖެއެމްވީއަށް މަޢުލޫމާތުދެއްވަމުން ދިއްދޫ ހޮސްޕިޓަލްގެ މެނޭޖަރ އުސްމާން އަޝްރަފްވަނީ އެ ރަށުގައި ހުންނަ އަމާންވެށިން ޕޮޒިޓިވްވި ދެ މީހަކު އިތުރު ފަރުވާއަށް ށ އަތޮޅުގައި ހުންނަ ކޮވިޑް ފެސިލިޓީއަށް ގެންގޮސްފައިވާކަން ކަށަވަރުކޮށްދީފައެވެ. އެގޮތުން އިތުރު ފަރުވާއަށް ގެންގޮސްފައިވަނީ އަމާންވެށިން ޕޮޒިޓިވްވި ދެ ކެއަރޓޭކަރުންކަމަށް އުސްމާން އަޝްރަފް ވިދާޅުވިއެވެ.
ދިއްދޫ ހޮސްޕިޓަލުން ބުނީ އަމާންވެށީގައި ތިބި 15 ކުދިންނާއި، އެތަނުގައި މަސައްކަތްކުރާ ސްޓާފުން ހިމެނޭ ގޮތަށް ބުދަދުވަހު ނެގި 26 ސާމްޕަލްގެ ތެރެއިން 16 ސާމްޕަލް ޕޮޒިޓިވް ކަމަށެވެ. މީގެ ތެރޭގައި ހިމެނެނީ 12 ކުދިންނާއި، އެކުދިިން ބެލެހެއްޓުމުގައި އުޅޭ 4 މީހެކެވެ. މާރިޗު މަހުގެ 12 ވަނަދުވަހު ދިއްދޫ އަމާންވެށިން ކުއްޖަކު ޕޮޒިޓިވްވުމާއެކު، އެ ކުއްޖާއާއި ކޮންޓެކްޓްވިި ހުރިހާ އެންމެންގެ ސާމްޕަލްނަގައި އަމާންވެށީގެ ކުދިންވެސް، ހއ. ފެމިލީ އެންޑް ޗިލްޑްރަން ސަރވިސް ސެންޓަރުގައި ވަނީ އައިސޮލޭޓް ކުރެވިފައެވެ. ފުރަތަމަ ކޭހާއެކު އަމާންވެށި ވަނީ ކަރަންޓީނުކޮށްފައެވެ. ހއ. އަތޮޅުގައއަމާންވެށީގައި ތިބެނީ 3 އާއިލާއަކަށް ނިސްބަތްވާ 15 ކުދިންނެވެ.
