މޯލްޑިވްސް އިސްލާމިކް ބޭންކް (އެމްއައިބީ)ގެ 'އުޖާލާ ދިރިއުޅުން' މެދުވެރިކޮށް މިހާރު 4،00،000 ރުފިޔާއާއި ހަމައަށް މުދާ ނެގޭނެ ކަމަށް އެ ބޭންކުން ބުނެފިއެވެ.

އެމްއައިބީގެ ކްރެޑިޓް ފެސިލިޓީއެއް ކަމަށްވާ 'އުޖާލާ ދިރިއުޅުން' ފެސިލިޓީއަށް އެދެވޭނީ އުމުރުން 18 އަހަރު ވެފައިވުން އަދި ފައިސާ ދައްކާ ނިމޭއިރު 65 އަހަރު ނުވާ ދިވެހި ރައްޔިތަކަށް ވުމާއިއެކު ރާއްޖޭގައި ދިރިއުޅޭ އަދި ވަޒީފާ އަދާކުރާ މީހަކަށް ވުން ކުލި ލިބޭފަރާތަކަށްވުމާއި މެދު ނުކެނޑި ވަޒީފާ އަދާކުރާތާ 6 މަސްދުވަސްވެފައި ވުން އަދި މިވަގުތު ވަޒީފާއަދާކުރާ ތަނުގައި އުޅޭތާ 3 މަސްވެފައިވެފައިވާ މީހުންނަނެވެ. އަދި މުސާރައިގެ ގޮތުގައި 4,000 ރުފިޔާއަށްވުރެ ދަށް ނޫން އަދަދެއްގެ އާމްދަނީއެއް ލިބޭ ފަރާތަކަށްވުމާއި ކުލީގެ ގޮތުގައި 10،000 ރުފިޔާއަށްވުރެ ދަށް ނޫން އަދަދެއް އާމްދަނީގެ ގޮތުގައި ލިބޭ ފަރާތަކަށް ވާންޖެހޭ ކަމަށް އެ ބޭންކުން ބުނެއެވެ.

މި ފެސިލިޓީއަކީ އާންމުދިރިއުޅުމުގައި ބޭނުންކުރާ މުދާ ހެޔޮއަގުގައި މަހުން މަހަށް ބަހާލައިގެން ފައިސާދައްކާ ގޮތަށް އިސްލާމީ ޝަރީޢަތުގެ ހަމަތަކުގެމަތިން ދެވޭ ފެސިލިޓީއެކެވެ. މިފެސިލިޓީގެ ދަށުން އެކިބާވަތްތަކުގެ މުދާ ނެގޭނެއެވެ. މީގެ ތެރޭގައި ފަރުނީޗަރު، އިލެކްޓްރޯނިކްސް، ފޯނު، ހިފާގެންގުޅޭ ތަކެތި، އައުޓްބޯޑު އިންޖީން، އިމާރާތް ކުރުމަށް ބޭނުންކުރާ ތަކެތި، ސޯލާޕެނަލް، މޮޓޯސައިކަލް ގެ އިތުރުން ވެސް އެހިނެހެން މުދާ ނެގޭނެއެވެ.

އެމްއައިބީން ބުނީ މި ފެސިލިޓީގެ ލިމިޓް ހަމަޖެހުމަށް ފަހު މުދާ ގަތުމަށް ހަމަސް ދުވަހުގެ މުއްދަތެއް ލިބޭނެ ކަމަށެވެ. އަދި މި ލިމިޓް ބޭނުން ކުރުމުގައި އެމްއައިބީއިން ގަބޫލުކުރާ ފިހާރައަކުން ކޯޓޭޝަންއާއިއެކު މުދާ ގަންނަން ބޭނުންވާ ލިޔުންތައް ގެނައުމުން ކަސްޓަމަރަށް މުދާ ވިއްކާނެ ކަމަށެވެ. މީގެ އިތުރުން އެމްއައިބީން މުދާ ވިއްކަނީ ބެންކަށް މުދާ ގަންނަން ލިބޭ އަގުގެ ތެރެއަށް ފައިދާއެއް ލުމަށް ފަހުގައެވެ. އަދި ދައްކަން ޖެހޭނީ ލިމިޓުގެ ތެރެއިން ގަތް މުދަލުގެ އަގަށްވާ ފައިސާ އެކަނި ކަމަށް އެމްއައިބީން ބުނެއެވެ.