އިނގިރޭސިވިލާތުގެ ބޮޑުވަޒީރު އެސްޓްރަޒެނިކާ ވެކްސިންގެ ފުރަތަމަ ޑޯޒް ޖައްސަވައިފި

އިނގިރޭސިވިލާތުގެ ބޮޑު ވަޒީރު ބޮރިސް ޖޯންސަން އެސްޓްރަޒެނިކާ ވެކްސިންގެ ފުރަތަމަ ޑޯޒް ޖައްސަވައިފިއެވެ.

ހުކުރު ދުވަހު ބޮޑުވަޒީރު ވެކްސިން ޖެއްސެވިއިރު އާންމުންނަށް ވެކްސިން ޖެހުމަށް ވަނީ ބާރު އަޅުއްވާފައެވެ. އަދި ވެކްސިން ޖެހިއިރު އެއްވެސް ކަހަލަ ތަދެއް އިހުސާސްނުވާކަމަށް ބޮރިސް ވަނީ ވިދާޅުވެފައެވެ.

އުމުރުފުޅުން 56 އަހަރުގެ ބޮރިސް ވެކްސިން މިޖެއްސެވިއިރު މީގެ އަހަރެއްހާ ދުވަސްކުރިން ބޮރިސް ވަނީ ކޮވިޑް-19ށް ޕޮޒިޓިވްވެގެން ފަރުވާ ހޯއްދަވާފައެވެ. އެގޮތުން އޮކްސިޖަން ލެވެލް ދަށްވުމުގެ ސަބަބުން ބޮރިސް ވަނީ އައިސީޔޫއިން ފަރުވާ ހޯއްދަވާފައެވެ. މިކަމާއި ގުޅޭގޮތުން ވާހަކަދައްކަވަމުން ބޮރިސް ވިދާޅުވެފައިވަނީ ކޮވިޑް ޖެހިގެން ހާލަތު ގޯސްވިވަރުން ބޮރިސް އަވަހާރަވެއްޖެނަމަ އެކަން އިއުލާންކުރާނެ ގޮތާ ހިސާބަށް ކަންކަން ރޭވިކަމަށެވެ.

ބޮރިސް ވެކްސިންގެ ފުރަތަމަ ޑޯޒް ޖެއްސެވީ ލަންޑަންގެ އެސްޓީ ތޯމަސް ހޮސްޕިޓަލްގައެވެ. ވެކްސިންގެ ތަޖުރިބާ ހިއްސާކުރައްވަމުން ބޮރިސް ވިދާޅުވީ ވެކްސިން ޖެހީ ވަރަށް އޯގާތެރި ނަރުހެއް ކަމުގައިވާ ލިލީކިޔާ ނަރުހެކެވެ. ވެކްސިން ޖެހުމުގެކުރިން ލިލީ ބޮރިސް އަރިހު ޝޮކެއް އިހުސާސްކުރައްވަން ޖެހިވަޑައިގަންނަވާނެކަމަށް ދެންނެވިކަމަށް ބޮރިސް ވިދާޅުވިއެވެ. އެހެންނަމަވެސް އެއްވެސް ކަހަލަ ތަދެއް އިހުސާސްނުވާކަމަށް ބޮރިސް ވިދާޅުވިއެވެ.

"އެއީ ވަރަށް އަވަސްކަމެއް. އެހެންވީމާ ހުރިހާ އެންމެންނަށްވެސް ވެކްސިން ޖެހުމަށް އިރުޝާދު އައުމުން އެއާ އެއްގޮތަށް އަމަލުކުރުމަށް އެދެން. ކޮވިޑުން ތިމާ އާއި ތިމާގެ އާއިލާ ރައްކާތެރިކުރުމަށް ކުރެވެން އޮތް އެންމެ ރަނގަޅު ކަމަކީ އެއީ." ބޮރިސް ވިދާޅުވިއެވެ.

ބޮރިސް އެސްޓްރަޒެނިކާ ވެކްސިންގެ ފުރަތަމަ ޑޯޒް މިޖެއްސެވީ ޔޫރަޕްގެ ބައެއް ގައުމުތަކުން އެސްޓްރަޒެނިކާ ވެކްސިން ޖެހުން މެދުކަނޑާލުމަށްފަހު އަލުން ފަށާފައިވަނިކޮށެވެ.

އަނެއްކޮޅުން އިނގިރޭސިވިލާތުން ވަނީ އެއް ދުވަހާ އެންމެ ގިނަ އަދަދެއްގެ މީހުންނަށް ވެކްސިން ދީގެން ހުކުރު ދުވަހު ރިކޯޑެއް ހަދާފައެވެ. އެގައުމުގެ ބޮޑެތި މީހުންގެ ތެރެއިން ދެ ބައިކުޅަ އެއް ބަޔަށްވުރެ ގިނަ މީހުންނަށް ވަނީ ވެކްސިންގެ ފުރަތަމަ ޑޯޒް ދީފައެވެ. އިނގިރޭސިވިލާތަކީ ދުނިޔޭގައި މިވަގުތު އެންމެ ހަލުވި މިނުގައި ވެކްސިން ދެމުން އަންނަ ގައުމެވެ.