ކުޑަހުވަދޫން 13 މީހަކު ކޮވިޑަށް ޕޮޒިޓިވްވެއްޖެ
14 ދުވަސް ވަންދެން ކަރަންޓީނުގައި ތިބުމަށް އެޗްޕީއޭއިން ވަނީ އެދިފައި
ދ ކުޑަހުވަދޫގައި ހުންނަ "ސަންސެޓް ބީޗް" - ކުޑަހުވަދޫއަކީ ގިނަ މީހުން ޒިޔާރަތް ކުރާ ހިތްގައިމު ރަށެއް
ދ ކުޑަހުވަދޫން 13 މީހަކު ކޮވިޑް-19އަށް ޕޮޒިޓިވްވެއްޖެއެވެ.
ކުޑަހުވަދޫން ޕޮޒިޓިވް ކޭސްތަކެއް ފެނިގެން ކޮންޓެކްޓްވި މީހުން ހޯދުމުގެ މަސައްކަތް ހެލްތް ޕްރޮޓެކްޝަން އޭޖެންސީ (އެޗްޕީއޭ) އިން ފަށާފައިވާކަން އިއުލާނު ކުރީ މިހިނގާ މާރޗު މަހުގެ 17 ވަނަ ދުވަހުއެވެ. އެގޮތުން އެޗްޕީއޭއިން ބުނީ، ދ. ކުޑަހުވަދޫން ކޯވިޑް-19ގެ ޕޮޒިޓިވް ކޭސްތަކެއް ފެނިފައިވާތީ، 26 ފެބްރުއަރީ 2021 ގެ ފަހުން އެރަށުގައި އުޅެފައިވާ އަދި އަތޮޅުތެރޭގެ އެނޫންވެސް ރަށަކަށް ގޮސްފައިވާ މީހެއްނަމަ ވީ އެންމެ އަވަހަކަށް އެރަށެއްގެ ހޮސްޕިޓަލް ނުވަތަ ހެލްތް ސެންޓަރަށް އެންގުން އެދޭ ކަމަށެވެ. އަދި އެ ތާރީޚުގެ ފަހުން ދ. ކުޑަހުވަދޫއަށް ގޮސްފައިވާ މީހަކުނަމަ، ކުޑަހުވަދޫން އަނބުރާ ރަށަށް އައި ދުވަހުން ފެށިގެން 14 ދުވަސް ވަންދެން ކަރަންޓީނުގައި ތިބުމަށް އެޗްޕީއޭއިން ވަނީ އެދިފައެވެ.
އެކަމުގެ ފަހުގެ މައުލޫމާތުތައް ހިއްސާކޮށް ހެލްތް އިމަރޖެންސީ އޮޕަރޭޝަންސް ސެންޓަރ (އެޗްއީއޯސީ) އިން ބުނީ، ކުޑަހުވަދޫން ނެގި ސާމްޕަލްތަކުގެ ތެރެއިން 13 މީހަކު ޕޮޒިޓިވްވެފައިވާ ކަމަށެވެ. އޭގެ ތެރޭގައި ހިމެނެނީ ކޮންޓެކްޓުންގެ 10 ސާމްޕަލްއަކާއި، އެކްޓިވް ސަރވައިލެންސްގެ 2 ސާމްޕަލްއެއްގެ އިތުރުން، އަލާމަތްތައް ހުރި މީހެއްގެ ސާމްޕަލްއެއް ކަމަށް އެޗްއީއޯސީން މައުލޫމާުތު ދެއެވެ.
26 ފެބްރުއަރީ 2021 ގެ ފަހުން ދ. ކުޑަހުވަދޫން މާލެއަށް އައިސްފައިވާ މީހުން މާލެހިޔާ ކައިރީގައި ހުންނަ ފްލޫ ކްލިނިކް، ހުޅުމާލޭ ފްލޫ ކްލިނިކް، އަދި ވިލިމާލޭ ފްލޫ ކްލިނިކަށް ގޮސް ސާމްޕަލް ނެގުމަށްވެސް އެޗްޕީއޭއިން ވަނީ އެދިފައެވެ. އެޗްޕީއޭއިން ބުނީ، ނަތީޖާ ނެގެޓިވްވިކަމުގައި ވިޔަސް ކުޑަހުވަދޫން އަނބުރާ ރަށަށް އައި ދުވަހުން ފެށިގެން 14 ދުވަސް ވަންދެން ކަރަންޓީނުގައި ތިބެންޖެހޭނެ ކަމަށެވެ.
