ހުކުރު ދުވަހު 145 މީހުން ޕޮޒިޓިވްވިއިރު، މާލެއިން 100ށް ވުރެ ގިނަ ކޭސް
19 މާރިޗު 2021 | ހުކުރު 17:37މިހާތަނަށް ކޮވިޑަށް ޕޮޒިޓިވްވި މީހުންގެ ޖުމުލަ އަދަދު ވަނީ 22،292ށް އަރާފައި
ކޮވިޑަށް ޓެސްޓުކުރުމުގެ މަސައްކަތް ކުރިއަށްދަނީ
ރާއްޖެއިން އިތުރު 145 މީހަކު ކޮވިޑް-19އަށް ޕޮޒިޓިވްވެއްޖެއެވެ.
ހެލްތް ޕްރޮޓެކްޝަން އޭޖެންސީ (އެޗްޕީއޭ) ގެ ފަހުގެ ތަފާސްހިސާބުތައް ދައްކާ ގޮތުން ހުކުރު ދުވަހު ރާއްޖެއިން އިތުރު 145 މީހަކު ޕޮޒިޓިވްވެފައިވާއިރު، އޭގެ ތެރޭގައި ހިމެނެނީީ މާލެ ސަރަޙައްދުން ޕޮޒިޓިވްވި 104 މީހަކާއި، އަތޮޅު ތެރެއިން ޕޮޒިޓިވްވި 21 މީހެއްގެ އިތުރުން، ރިސޯޓުތަކުން ޕޮޒިޓިވްވި 14 މީހެކެވެ. އަދި އޭގެ އިތުރުން، އުޅަނދުތަކުން ޕޮޒިޓިވްވި 5 މީހަކާއި، ހަދަމުންދާ ރަށްރަށުން ޕޮޒިޓިވްވި މީހެއްވެސް އޭގެ ތެރޭގައި ހިމެނެއެވެ. މިއީ ފާއިތުވި 24 ގަޑިއިރު ނަގާފައިވާ 4460 ސާމްޕަލްގެ ނަތީޖާއެވެ. އެއާއެކު، ރާއްޖެއިން މިހާތަނަށް ކޮވިޑަށް ޕޮޒިޓިވްވި މީހުންގެ ޖުމުލަ އަދަދު ވަނީ 22،292ށް އަރާފައެވެ.
އެޗްޕީއޭގެ ތަފާސްހިސާބުތައް ދައްކާ ގޮތުން ރާއްޖެއިން ބަލިން ރަނގަޅުވެފައިވަނީ 19،773 މީހެކެވެ. އަދި މިވަގުތުގެ އެކްޓިވް ކޭސްތަކުގެ އަދަދަކީ 2447 އެވެ. އެޗްޕީއޭއިން މައުލޫމާތު ދޭ ގޮތުގައި މިވަގުތުވެސް 120 މީހަކަށް އެޑްމިޓްކޮށްގެން ފަރުވާދެމުން ދެއެވެ.
މިހާތަނަށް ރާއްޖެއިން ކޮވިޑަށް ޓެސްޓު ކުރުމަށް ނަގާފައިވާ ސާމްޕަލްތަކުގެ އަދަދަކީ 598،676 އެވެ.
ރާއްޖެއިން ފެންނަމުންދާ ކޮވިޑް ކޭސްތަކުގެ އަދަދު އިތުރުވެފައިވާއިރު، މިހާރު ކުރިމަތިވެފައިވާ ކޮވިޑުގެ ރާޅަކީ މީގެ ކުރިން ކުރިމަތިވި ވަރަށްވުރެ ނުރައްކާތެރި ރާޅެއްކަމަށް ސިއްޙީ އޮފިޝަލުން މައުލޫމާތު ދެއެވެ. އެއާއެކު ރާއްޖޭގައިވެސް ކޮވިޑާ ގުޅިގެން އަޅާފައިވާ ފިޔަވަޅުތައް ވަނީ އިތުރަށް ވަރުގަދަ ކޮށްފައެވެ.
