ސަސްއަށް ބިދޭސީ އައު ދެ ކުޅުންތެރިން ގެނެސްފި

ސުޕަ ޔުނައިޓެޑް ސްޕޯޓްސް (ސަސް) އިން ސްވިޑެންގެ ފޯވާޑް ޝްކޮޑްރަން މަހޯލީ އާއި މޮރޮކޯގެ މިޑްފީލްޑަރު މުޙައްމަދު އަޖްނާނީގެ ސޮއި ހޯދައިފިއެވެ.

މިދިޔަ ހޯމަ ދުވަހު ރާއްޖޭގެ ޓްރާންސްފާ ބާޒާރު ވަނީ ބަންދުވެފައެވެ. އޭގެ ކުރިން ސަސްއިން ބިދޭސީ އައު ދެ ކުޅުންތެރިއަކު ގެނައިރު، މި ސީޒަން އެ ޓީމުން ފަށާފައިވަނީ ބިދޭސީ ހަތަރު ކުޅުންތެރިންނާއެކުއެވެ. އެއީ އުޒްބެކިސްތާން ލީގުގެ ޓީމުތަކަށް ކުޅެފައިވާ ގޯލްކީޕަރު މިރްޒޮހިދު މަމަކްތޯނޯފާއި، ލާއޯސް އާއި އާރްމީނިއާގެ އިތުރުން ރާއްޖޭގެ ޖޭޖޭ ސްޕޯޓްސްއަށް ކުޅެފައިވާ ޖަޕާނުގެ މިޑްފީލްޑަރު އެއިސޫކޭ މޯރީ އާއި، އިންޑިއާގެ އައި ލީގާއި ޖަޕާނާއި މެލޭޝިއާ ލީގާއި އިންޑޮނީޝިއާ ސުޕަ ލީގު އަދި ބަންގްލަދޭޝް ޕްރިމިއާ ލީގުގައި ކުޅެފައިވާ ޖަޕާނުގެ ފޯވާޑް އަޓްސުޝީ ޔޮނެޒޭވާ އަދި ސްޕެއިނުގެ އެކި ޓީމުތަކަށް ކުޅެފައިވާ ފޯވާޑް ވިކްޓޯ ރޮޑްރިގޭޒެވެ. އޭގެ ތެރެއިން މިޑްފީލްޑަރު އަޓްސުޝީ ޔޮނެޒާވާ އާއި ފޯވާޑް ވިކްޓަ ރޮޑްރިގޭޒް ސަސްއިން މިހާރު ވަނީ ދޫކޮށްލާފައެވެ.

މި ފަހަރު ސަސްއާ ގުޅުނު އުމުރުން 27 އަހަރުގެ ފޯވާޑް މަހޯލީ މީގެ ކުރިން ވަނީ ސްވިޑެންގެ 19 އަހަރުން ދަށުގެ ޤައުމީ ފުޓްބޯޅަ ޓީމަށް ކުޅެފައެވެ. އަދި ކުލަބު ކެރިއަރުގައި އޭނާ ވަނީ ސްވިޑެންގެ ފުރަތަމަ ޑިވިޝަނުގެ ހަލްމްސްޓަޑާއި ހޭކަން އާއި ސިރީއާސްގެ އިތުރުން އެ ޤައުމުގެ ދެވަނަ ޑިވިޝަނުގެ ކުލަބުތަކަށް ކުޅެފައެވެ. އަދި އެންމެ ފަހުން މިދިޔަ އަހަރު އޭނާ ކުޅެފައިވަނީ ޑެންމާކުގެ ދެވަނަ ޑިވިޝަނުގެ ކުލަބެއް ކަމަށްވާ ސިލްކެބޯގަށެވެ. ދެން ސަސްއާ ގުޅުނު މޮރޮކޯގެ މިޑްފީލްޑަރު އަޖްނާނީ މީގެ ކުރިން ވަނީ މޮރޮކޯގެ 20 އަހަރުން ދަށުގެ ޤައުމީ ފުޓްބޯޅަ ޓީމަށް ކުޅެފައެވެ. އަދި ކުލަބު ކެރިއަރުގައި އޭނާ ވަނީ ނެދަލެންޑްސްގެ ދެވަނަ ޑިވިޝަނުގެ ޓީމުތަކަށް ކުޅެފައެވެ.

މި ނިމުނު ޓްރާންސްފާގައި ސަސްއިން ބިދޭސީ އައު ދެ ކުޅުންތެރިއަކު ހޯދިއިރު، އެ ޓީމުން މީގެ ކުރިން ވަނީ ލޯނު އެއްބަސްވުމެއްގެ ދަށުން މާޒިޔާ ސްޕޯޓްސް އެންޑް ރެކްރިއޭޝަނުގެ ޑިފެންޑަރު މުޖުތާޒް މުޙައްމަދު (މުޖޭ) އާއި މިޑްފީލްޑަރު އަބްދުﷲ ޖުނައިދު (ޖެންނޭ) ގެ ސޮއި ހޯދާފައެވެ. މީގެ އިތުރުން ޓީސީ ސްޕޯޓްސް ކުލަބުގެ ނަޝާހު އަޙްމަދު (ނައްޓު) އާއި އަޙްމަދު އިނާންވެސް ވަނީ މި ޓްރާންސްފާގައި ސަސްއަށް ބަދަލުވެފައެވެ.

ސަސްއިން އެ ޓީމުގެ ސްކޮޑު ވަރުގަދަކުރިއިރު، މި ސީޒަނުގައި މުޅިން އަލަށް ފުރަތަމަ ޑިވިޝަނުގައި ވާދަކުރަމުން އަންނަ ސަސްއިން މިހާތަނަށް ވަނީ ރަނގަޅު ނަތީޖާތަކެއް ނެރެފައެވެ. އެގޮތުން މި ސީޒަނަށް އަޙްމަދު ނާޝިދު (ނާދު) ގެ އިރުޝާދުގެ ދަށުން ސަސް ކުރިމަތިލިއިރު، ނާދުގެ ކޯޗުކަމުގައި ސަސްއިން ވަނީ މޮޅު ކުޅުމެއް ދައްކާފައެވެ. އެކަމަކު މި އަހަރުގެ ޖެނުއަރީ މަހު ސަސްއިން ވަނީ ނާދުގެ އެއްބަސްވުން ދެ ފަރާތް އެއްބަސްވެގެން އުވާލައި، އެ ޓީމުގެ ކޯޗަކަށް އީގަލްސްގެ ކުރީގެ ކޯޗު މުޙައްމަދު ޝިޔާޒް (މޯހަން) ހަމަޖައްސާފައެވެ.

ކޮވިޑް-19 ގެ ކޭސްތައް މާލެ ސިޓީގައި އިތުރުވުމާއެކު ހެލްތު ޕްރޮޓެކްޝަން އޭޖެންސީ (އެޗްޕީއޭ) އިން ނެރުނު އައު އުސޫލުތަކާ ގުޅިގެން މިދިޔަ ފެބްރުއަރީ މަހުގެ ތިންވަނަ ދުވަހު ދިރާގު ދިވެހި ޕްރިމިއާ ލީގުގެ ކުޅުން މެދުކަނޑާލާފައިވާއިރު، ފުޓްބޯލް އެސޯސިއޭޝަން އޮފް މޯލްޑިވްސް (އެފްއޭއެމް) އިން އަންނަނީ ލީގު އަލުން ފެށުމަށް މަސައްކަތްކުރަމުންނެވެ. ދެވަނަ ބުރުގެ މެދުތެރެއިން ލީގު މެދުކަނޑާލިއިރު ސަސް އޮތީ ތާވަލުގެ ހަވަނައިގައި ކުޅުނު އަށް މެޗުން ލިބުނު އަށް ޕޮއިންޓާއެކުއެވެ.