ރާއްޖޭގެ ޔޫތް ސިސްޓަމް ތެރޭގައި ހުނަރު އެބައޮތް, އެހީތެރިވެދީ - ކޯޗު ފަރީދު

 ރާއްޖޭގެ ޔޫތް ސިސްޓަމް ތެރޭގައި ހުނަރު އެބައޮތް ކަމަށާއި, އެ ހުނަރުގެ ފައިދާ ހޯދަން އެހީތެރިވެދޭން ސަސް އެކަޑަމީގެ ކޯޗު ފަރީދު މުހައްމަދު އެދިއްޖެ އެވެ.

ދާދިފަހުން މެލޭޝިޔާގައި އޮތް ލަލީގާ އިންޓަރނޭޝަނަލް ޔޫތް މުބާރާތުގެ ތިންވަނަ ސަސް އެކަޑަމީ އަށް ހޯދައިދިން ކޯޗު ބުނީ އެމުބާރާތުން ވެސް ރާއްޖޭގައި ހުނަރު އޮތްކަން ސާބިތުވާ ކަމަށެވެ. ސަރަހައްދީ އެހެން ގައުމުތަކާ ރާއްޖެއާ މާބޮޑު ތަފާތެއް ނެތް ކަމަށާއި, ފުރުޞަތު ހޯދައިދެވިއްޖެ ނަމަ ރާއްޖޭގެ ފުޓްބޯޅައިގެ ކުރިމަގު އަދިވެސް އެބައޮތްކަން ފަރީދު ފާހަގަކުރިއެވެ. އޭނާ ބުނީ ލަލީގާ އިންޓަރނޭޝަނަލް ޔޫތް މުބާރާތަކީ ތައްޔާރުވެގެން ނަތީޖާއެއް ހޯދަން, އަދި ނަތީޖާއެއް ހޯދިދާނެކަން ސާބިތުކޮށްދޭން ދިޔަ މުބާރާތެއް ކަމަށެވެ. ހަތަރުމަހެއްހާ ދުވަހު މުބާރާތަށް ޕްރެކްޓިސް ކުރި ކަމަށް އޭނާ ބުންޏެވެ. ނަމަވެސް ކުޅުންތެރިންގެ ކިޔެވުމާ ސްކޫލް ހަރަކާތްތަކާއި, ދަނޑުގެ ޝެޑިއުލްއާއެކު މުޅި ޓީމް އެކުގައި ޕްރެކްޓިސް ކުރަން ލިބުނު ވަގުތު މަދުކަންވެސް ފަރީދު ފާހަގަކުރިއެވެ.

ސަސް އެކަޑަމީން މުބާރާތަށް ދިޔައީ ސެމީފައިނަލަށް ދިއުމަށް އަމާޒުކޮށްގެންނެވެ. ޓީމް އެނބުރި އައީ ލޯ މެޑެއްޔާ އެކުއެވެ. ފަރީދު ބުނީ މިހިސާބުންވެސް ކުރިއަށް ދާން ބޭނުންނަމަ ދަނޑުތައް އަޅާ ފެސިލިޓީޒް ގާއިމް ކުރަން ޖެހޭ ކަމަށެވެ. އަދި ގަވައިދުން ލީގު ބާއްވަން ޖެހޭކަން ފާހަގަ ކުރިއެވެ. ސަރުކާރާއި އެފްއޭގެ އެހީތެރިކަން މިހާރަށްވުރެ ބޮޑަށް ލިބިގެން ނޫނީ ކުރިއަށް ނުދެވޭނެކަން ކުރީގެ ކުޅުންތެރިޔާ ފާހަގަކުރިއެވެ.