ސަސް ފުރަތަމަ ޑިވިޝަންގައި ދެމިއޮންނާނެ، ދަ ގްރާންޑޭ ރެލިގޭޓްވެއްޖެ
ސަސްގެ އިތުރުން ބުރު ވަނީ ފުރަތަމަ ޑިވިޝަނަށް ޕްރޮމޯޓްވެފައި
ކޮލިފައިންގައި ސަސްއާއި ދަ ގްރާންޑޭ ވާދަކުރި މެޗުގެ ތެރެއިން
ސުޕަރ ޔުނައިޓެޑް ސްޕޯރޓްސް (ސަސް) ފުރަތަމަ ޑިވިޝަންގެ ޖާގަ ޔަޤީންކޮށް, ދަ ގްރާންޑޭ ދެވަނަ ޑިވިޝަނަށް ރެލިގޭޓް ވެއްޖެއެވެ.
މިދިޔަ ސީޒަންގައި ފުރަތަމަ ޑިވިޝަންގައި ވާދަކުރި ޓީމްތަކުގެ ތެރެއިން ކޮލިފިކޭޝަން ކުޅެން ޖެހުނު ދެޓީމް, ކޮލިފައިން މެޗަށް ނުކުތްއިރު ވެސް އެއްޓީމް ރެލިގޭޓްވާނެކަން އޮތީ ޔަޤީންވެފައެވެ. ދަ ގްރާންޑޭއަށް އޮތީ ދެ ލަނޑަށްވުރެ ތަފާތަކުން މޮޅުވުމެވެ. އެނޫން ކޮންމެ ނަތީޖާއަކުން ފުރަތަމަ ޑިވިޝަންގެ ޖާގަ ލިބެން އޮތީ ސަސްއަށެވެ. ސަސް ވަނީ ދަ ގްރާންޑޭ 2-0 ން ބަލިކޮށް ފުރަތަމަ ޑިވިޝަންގެ ޖާގަ ޔަޤީންކޮށްފައެވެ. މެޗުގައި ސަސްގެ ދެ ގޯލްވެސް ޖެހީ ދެވަނަ ހާފްގައެވެ. ހަތަރު މިނެޓުގެ ތެރޭގައި ސަސްގެ ދެ ގޯލް ކާމިޔާބުކޮށްދިނީ އިބްރާހީމް އަތީގު ހަސަންއާއި, އަހުމަދު އައިހަމްއެވެ.
މިމޮޅާއެކު ސަސް ޖާގަ ޔަޤީންކުރީ ހަތް ޕޮއިންޓާއެކު ކޮލިފައިން ބުރުގެ އެއްވަނަ ޓީމްގެ ގޮތުގައެވެ. ކޮލިފައިން ބުރުގެ ދެވަނަ ޓީމްގެ ގޮތުގައި ފުރަތަމަ ޑިވިޝަނަށް ޕްރޮމޯޓްވީ ދެވަނަ ޑިވިޝަންގެ ޗެމްޕިއަންކަން ވެސް ހޯދި ބުރު ސްޕޯރޓްސް ކްލަބެވެ. އެއީ ހަ ޕޮއިންޓާއެކުއެވެ.
