ރައީސް ޔާމީން ގެކޮޅަށް ބަދަލުކޮށްދެއްވުމަށް އެދި މަޝްވަރާއަށް އެދިއްޖެ
ގެކޮޅަށް ބަދަލުކޮށްދިނުމަށް އެދި ހުށަހަޅާފައިވަނީ ރައީސް ޔާމީންގެ ފަރާތްޕުޅުން
ކުރީގެ ރައީސް އަބްދުﷲ ޔާމީން
ކުރީގެ ރައީސް އަބްދުﷲ ޔާމީން ގެކޮޅަށް ބަދަލުކޮށްދިނުމަށް އެދި މަޝްވަރާއަށް އެމަނިކުފާނުގެ ފަރާތްޕުޅުން އެދިއްޖެއެވެ.
ރާއްޖެއެމްވީއަށް މައުލޫމާތު ލިބިފައިވާ ގޮތުގައި މަޝްވަރާއަށް އެދިފައިވަނީ ރައީސް ޔާމީންގެ ފަރާތްޕުޅުންނެވެ. އަދި މަޝްވަރާއަށް އެދި ހޯމް މިނިސްޓްރީއަށް ވަނީ ލިޔުމެއް ފޮނުވާފައެވެ. މިކަމާ ގުޅޭ ގޮތުން ހޯމް މިނިސްޓްރީން ބުނީ ރައީސް ޔާމީން ގެކޮޅަށް ބަދަލުކުރުމަށް އެދި ލިޔުމެއް ހޯމް މިނިސްޓްރީއަށް ލިބިފައިވާކަމަށެވެ.
ހޯމް މިނިސްޓްރީން ބުނީ ރައީސް ޔާމީން ގެކޮޅަށް ބަދަލުކޮށްދިނުމަށް އެދި ރިކުއެސްޓް ލިބިފައިވީ ނަމަވެސް އެކަމަށް ގޮތެއް ނިންމާފައި ނުވާ ކަމަށެވެ.
ރައީސް އޮފީހުން ބުނީ ރައީސް ޔާމީން ގެކޮޅަށް ބަދަލުކުރުމާ ގުޅޭ ގޮތުން މަޝްވަރާއަށް އެދިފައިވާ ކަމަށާއި، އެކަމާ ގުޅޭގޮތުން އަދި ވަކި ގޮތެއް ސަރުކާރުން ނިންމާފައި ނުވާ ކަމަށެވެ.
އެމްއެމްޕީއާރުސީގެ ހިޔާނާތުގައި ހިމެނޭ، ރިސޯޓެއްގެ ގޮތުގައި ތަރައްގީކުރުމަށް ކުއްޔަށް ދޫކުރި ގއ. ވޮޑުމުލާގެ އިކުއިޒިޝަން ކޮސްޓްގެ ގޮތުގައި ދައުލަތަށް ލިބެންޖެހޭ ފައިސާގެ ތެރެއިން އެއް މިލިއަން ޑޮލަރު އަމިއްލަފުޅު އެކައުންޓަށް ޖަމާކޮށް، އެފައިސާއިން މަނީ ލޯންޑަރ ކުރުމުގެ ކުށް، ރައީސް ޔާމީންގެ މައްޗަށް ސާބިތުވެ، އެމަނިކުފާނު ފަސް އަހަރަށް ޖަލަށްލުމާއެކު ފަސް މިލިއަން ޑޮލަރުން ޖޫރިމަނާކޮށް، އެފައިސާ ހަ މަސްދުވަހުގެ ތެރޭގައި މީރާއަށް ދެއްކުމަށް ކްރިމިނަލް ކޯޓުން ހުކުމްކުރީ 28 ނޮވެމްބަރު، 2019 ގައެވެ.
މީގެ އިތުރުން ވެސް އެމްއެމްޕީއާރުސީގެ މައްސަލައިގައި ރައީސް ޔާމީންގެ މައްޗަށް އިތުރު ދައުވާތަކެއް ވަނީ އުފުލާފައެވެ.
