ދ ކުޑަހުވަދޫން ޕޮޒިޓިވް ކޭސްތަކެއް ފެނި، ކޮންޓެކްޓްވި މީހުން ހޯދަނީ

ދ ކުޑަހުވަދޫން ޕޮޒިޓިވް ކޭސްތަކެއް ފެނިގެން ކޮންޓެކްޓްވި މީހުން ހޯދުމުގެ މަސައްކަތް ހެލްތް ޕްރޮޓެކްޝަން އޭޖެންސީ (އެޗްޕީއޭ) އިން ފަށައިފިއެވެ.

އެޗްޕީއޭއިން ބުނީ، ދ. ކުޑަހުވަދޫން ކޯވިޑް-19ގެ ޕޮޒިޓިވް ކޭސްތަކެއް ފެނިފައިވާތީ، 26 ފެބްރުއަރީ 2021 ގެ ފަހުން އެރަށުގައި އުޅެފައިވާ އަދި އަތޮޅުތެރޭގެ އެނޫންވެސް ރަށަކަށް ގޮސްފައިވާ މީހެއްނަ،މަ، ވީ އެންމެ އަވަހަކަށް އެރަށެއްގެ ހޮސްޕިޓަލް/ހެލްތް ސެންޓަރަށް އެންގުން އެދޭ ކަމަށެވެ. އަދި އެ ތާރީޚުގެ ފަހުން ދ. ކުޑަހުވަދޫއަށް ގޮސްފައިވާ މީހަކުނަމަ، ކުޑަހުވަދޫން އަނބުރާ ރަށަށް އައި ދުވަހުން ފެށިގެން 14 ދުވަސް ވަންދެން ކަރަންޓީނުގައި ތިބުމަށް އެޗްޕީއޭއިން ވަނީ އެދިފައެވެ.

އެޗްޕީއޭއިން ބުނީ، އެ ރަށެއްގެ ހެލްތު ސެންޓަރުން ނުވަތަ ހޮސްޕިޓަލުން އެމީހުންގެ ސާމްޕަލް ނެގުމުގެ އިންތިޒާމު ހަމަޖައްސާނެ ކަމަށެވެ.

އޭގެ އިތުރުން، 26 ފެބްރުއަރީ 2021 ގެ ފަހުން ދ. ކުޑަހުވަދޫން މާލެއަށް އައިސްފައިވާ މީހުން މާލެހިޔާ ކައިރީގައި ހުންނަ ފްލޫ ކްލިނިކް، ހުޅުމާލޭ ފްލޫ ކްލިނިކް، އަދި ވިލިމާލޭ ފްލޫ ކްލިނިކަށް ގޮސް ސާމްޕަލް ނެގުމަށް ވެސް އެޗްޕީއޭއިން ވަނީ އެދިފައެވެ. އެޗްޕީއޭއިން ބުނީ، ނަތީޖާ ނެގެޓިވްވި ކަމުގައި ވިޔަސް ކުޑަހުވަދޫން އަނބުރާ ރަށަށް އައި ދުވަހުން ފެށިގެން 14 ދުވަސް ވަންދެން ކަރަންޓީނުގައި ތިބެންޖެހޭނެ ކަމަށެވެ.

އެޗްޕީއޭއިން ވަނީ އެ ރަށަށް ދަތުރު ކޮށްފައިވާނަމަ 1676އަށް ހިއްސާ ކުރެއްވުމަށް އެދިފައެވެ.