ކޮވިޑު ވެކްސިން ރައްކާތެރި، ވައިރަހާ ދެކޮޅަށް މަސައްކަތް ވެސް ކުރޭ، ވެކްސިން ޖައްސަވާ: ޓްރަމްޕް
ކޮވިޑް-19 ވެކްސިނަކީ ރައްކާތެރި ވެކްސިނެއް
އެމެރިކާގެ ކުރީގެ ރައީސް ޑޮނަލްޑް ޓްރަމްޕް - ޓްރަމްޕު ވެސް ވެކްސިން ޖައްސަވާފައިވާ ކަމަށް ރިޕޯޓުތައް ބުނޭ
ކޮވިޑް-19 އިން ދިފާއުވުމަށް ވެކްސިން ޖެއްސެވުމަށް އެމެރިކާގެ ކުރީގެ ރައީސް ޑޮނަލްޑް ޓްރަމްޕް އިލްތިމާސް ކުރައްވަފައިފިއެވެ.
ޓްރަމްޕް ނިސްބަތްވެވަޑައިގަންނަވާ ރިޕަބްލިކަންގެ މެމްބަރުންނާ މުޚާތަބު ކުރައްވައި ޓީވީ ޗެނަލަކަށް ދެއްވި އިންޓަރވިއުއެއްގައި ޓްރަމްޕް ވިދާޅުވީ، ކޮވިޑް-19 ވެކްސިނަކީ ރައްކާތެރި ވެކްސިނެއް ކަމަށާއި، ވައިރަސްއާ ދެކޮޅަށް ވެކްސިން އެކަށީގެންވާ ގޮތެއްގައި މަސައްކަތްވެސް ކުރާ ކަމަށެވެ. އަންގާރަ ދުވަހު ފޮކްސް ނިއުސްއަށް ދެއްވި އިންޓަރވިއުއެއްގައި ޓްރަމްޕް ވިދާޅުވީ، ވެކްސިން ޖަހަން ބޭނުންނުވާ މީހުންނާއި، އެމަނިކުފާނަށް ވޯޓު ދެއްވި އެންމެންނަށްވެސް ދެއްވަން އޮތް އިރުޝާދަކީ އަވަހަށް ވެކްސިން ޖެއްސެވުން ކަމަށެވެ. ރިޕޯޓުތައް ބުނާގޮތުން ޓްރަމްޕްވެސް ވަނީ ވައިޓްހައުސްއިން ނުކުމެވަޑައިގަތުމުގެ ކުރިން އަނބިކަނބަލުން މެލާނިއާ ޓްރަމްޕާއެކު ސިއްރިއްޔާތުގައި ވެކްސިން ޖައްސަވާފައެވެ.
ކޮވިޑުގެ އާލަމީ ވަބާ ދުނިޔެއަށް ފެތުރެމުން ދިޔައިރު، ކޮވިޑާ ގުޅިގެން ގެންގުޅުއްވާ ސިޔާސަތުތަކާ ގުޅޭގޮތުން އެންމެ ބޮޑު ފާޑުކިޔުމެއް އަމާޒުވި އެއް ބޭފުޅަކީ ޑޮނަލްޑްޓް ޓްރަމްޕެވެ. އެގޮތުން މުޅި ދުނިޔެއިން އެންމެ ގިނަ ކޭސް ރިޕޯޓު ކުރެވިފައިވާ ޤައުމަކަށް އެމެރިކާ ވެގެން ދިއުމުގެ ފަހަތުގައި ޓްރަމްޕްގެ ދޯހަޅި ސިޔާސަތުތައް އިސް ރޯލެއް އަދާކުރާކަމަށް ގިނަ ބަޔަކު ބުނެއެވެ.
މިއީ އާދައިގެ ރޯގާއެއްގެ ގޮތުގައި ތަކުރާރުކޮށް ސިފަ ކުރެއްވުމާއި، ކިތަންމެ ގިނަ ބަޔަކު ޕޮޒިޓިވްވަމުން ދިޔަނަމަވެސް، ޤައުމު ލޮކްޑައުންކޮށް ފިޔަވަޅުތައް ހަރުކަށިކުރުމާ ފާޅުގައި ދެކޮޅު ހެއްދެވި ބޭފުޅެއްގެ ގޮތުގައި ޓްރަމްޕް ފެނިގެން ދިޔައެވެ. ނަމަވެސް އެންމެ ފަހުން އެ ޤައުމުގައި ކޮވިޑުގެ ޙާލަތު އިންތިހާއަށް ގޯސްވެ، ބައެއް ސްޓޭޓުތަކުގެ ހޮސްޕިޓަލުތައްވެސް ފުރި، ސިއްޙީ ނިޒާމަށް ނުކަތާވަރަށް ކޭސްތައް ފެންނަން ފެށިއެވެ. ބައެއް މީހުން ބުނާ ގޮތުގައި ރައީސް ޑޮނަލްޑް ޓްރަމްޕަށް ރިޔާސީ އިންތިޚާބުގައި ލިބިވަޑައިގެންނެވި ނާކާމިޔާބީގެ އެއް ސަބަބަކީވެސް ކޮވިޑާ ގުޅިގެން އެމަނިކުފާނު ދެއްކެވި ދެއުޅި އެއްނުވާ ވާހަކަފުޅުތަކެވެ.
