ޓްރަމްޕް އަށް ނޯބެލް އިނާމު ލިބޭނީ ޣައްޒާ ހަނގުރާމަ ހުއްޓިއްޖެ ނަމަ: މެކްރޮން

އެމެެރިކާގެ ރައީސް ޑޮނަލްޑް ޓްރަމްޕް އަށް ނޯބެލް ސުލްޙައިގެ އިނާމު ލިބޭނީ، އިސްރާއީލް އިން ޣައްްޒާގައި ހިންގަމުން އަންނަ ހަނގުރާމަ ހުއްޓިއްޖެ ނަމަ ކަމަށް، ފްރާންސްގެ ރައީސް އިމަނުއެލް މެކްރޮން ވިދާޅުވެއްޖެ އެވެ.

އެމެރިކާގެ ނިއު ޔޯކުގައި ކުރިއަށް ދިޔަ އދ ގެ ޖެނަރަލް އެސެމްބްލީގެ ތެރެއިން ބީއެފްއެމް ޓީވީ އަށް ދެއްވި އިންޓަވިޔުގައި މެކްރޮން ވިދާޅުވީ، މިހާރު އޮތް ޙާލަތުގައި އެންމެ އެކަށީގެންވާ ފިޔަވަޅެއް އެޅޭނެ ފަރާތަކީ އެމެރިކާގެ ރައީސް ކަމަށެވެ.

މެކްރޮން ވިދާޅުވީ، އެމެރިކާގެ ރައީސް ޓްރަމްޕް އެކަމުގައި ވަރަށް ގިނަ މަސައްކަތް ކުރައްވާ މަންޒަރު ފެންނަ ކަމަށެވެ. އަދި އދ ގެ ޖެނަރަލް އެސެމްބްލީގައި ވާހަކަ ދައްކަވަމުން ސުލްޙަވެރިކަން ބޭނުންވާ ކަމަށާއި، ހަނގުރާމަ ނިންމާނެ ކަމަށް ޓްރަމްޕް ވިދާޅުވެފައިވާ ކަމަށް މެކްރޮން ފާހަގަ ކުރެއްވި އެވެ.

އެކަން ފާހަގަ ކުރައްވައި މެކްރޮން ވިދާޅުވީ، ޓްރަމްޕް ބޭނުންފުޅު ވަނީ ނޯބެލް ސުލްޙައިގެ އިނާމު ޙާސިލު ކުރަން ކަމަށެވެ. އެހެންކަމުން، ޓްރަމްޕް އަށް ނޯބެލް ސުލްޙައިގެ އިނާމު ލިބެން އޮތީ ޣައްޒާ ހަނގުރާމަ ހުއްޓުމަކަށް ގެނެސްގެން ކަމުގައި މެކްރޮން ވަނީ ވިދާޅުވެފަ އެވެ.

މީގެ އިތުރުން މެކްރޮން ވިދާޅުވީ، ފަލަސްޠީނުގެ މިނިވަން ދައުލަތް ބަލައި ގަތުމަށް ފްރާންސް އިން ނިންމި ނިންމުމާ މެދު، އެމެރިކާ އާއި އިސްރާއީލް އިން ދެކޮޅު ހަދާފައިވާ ކަމަށެވެ. ނަމަވެސް، އިސްރާއީލް އަށް އެންމެ ބޮޑު ނުފޫޒެއް، ނުވަތަ ޕްރެޝަރެއް ދެވޭނީ ވެސް އެމެރިކާ އަށް ކަމަށް މެކްރޮން ވިދާޅުވި އެވެ.

އެކަމުގެ ސަބަބެއްގެ ގޮތުގައި މެކްރޮން ވިދާޅުވެފައި ވަނީ، ޣައްޒާ ހަނގުރާމަ ކުރިއަށް ގެންދަން އެމެރިކާ އިން އިސްރާއީލް އަށް ހަތިޔާރު ދިނުމެވެ. މެކްރޮން ވިދާޅުވީ، ފްރާންސް އިން އިސްރާއީލް އަށް އެއްވެސް ހަތިޔާރެއް ދީފައި ނުވާނެ ކަަމަށާއި، ޣައްޒާ ހަނގުރާމަ ކުރިއަށް ގެންދަން ހަތިޔާރު ނުދޭ ކަމަށެވެ.

ފަލަސްޠީނުގެ ދައުލަތާ ގުޅޭ ގޮތުން ވާހަކަ ދައްކަވަމުން މެކްރޮން ވިދާޅުވީ، ފަލަސްޠީނުގެ މިނިވަން ދައުލަތެއް ހަގީގަތުގައި އުފެދޭނީ އިސްރާއީލް އިން އެކަން ބަަލައި ގަންނަ ދުވަހަކުން ކަމަށެވެ. ފަލަސްޠީނުގެ މިނިވަން ދައުލަތް ބަަލައި ގަންނަން ފްރާންސް އިން ނިންމުމާ އެކު، އިސްރާއީލް އިން ވަނީ މެކްރޮން އަށް ވަރަށް ބޮޑަށް ފާޑު ވިދާޅުވެފަ އެވެ.

އުމުރުފުޅުން 79 އަހަރުގެ ޓްރަމްޕް ވިދާޅުވަމުން ގެންދަވަނީ ނޯބެލް ސުލްޙައި އިނާމު ލިބެން ވާނީ އޭނާ އަށް ކަމަށެވެ. މިހާރު އެމެރިކާގެ ރައީސް ކަމުގެ ދެ ވަނަ ދައުރު ފުރިހަމަ ކުރަމުން ގެންދަވާ ޓްރަމްޕް ވިދާޅުވީ، މިހާތަނަށް އައިއިރު ހަ ހަނގުރާމަ ނިންމުމަށް ގެނައުމުގައި އޭނާގެ ދައުރު އޮންނާނެ ކަމަށެވެ.

މިއަހަރުގެ ނޯބެލް ސުލްޙައިގެ އިނާމަށް ޓްރަމްޕްގެ ނަން ހުށަހަޅާފައިވާ ކަމަށް ބައެއް ޤައުމު ތަކުން ވަނީ ހާމަކޮށްފަ އެވެ. އޭގެ ތެރޭގައި އިސްރާއީލް ހިމެނޭއިރު، އިސްރާއީލްގެ ބޮޑު ވަޒީރު ބެންޖަމިން ނަތަންޔާހޫ ވަނީ ނޯބެލް އިނާމު ކޮމެޓީ އަށް ފޮނުވި ސިޓީ ވެސް ޓްރަމްޕް އަށް ރައްދު ކޮށްފަ އެވެ.

އިސްރާއީލްގެ އިތުރުން އަޒަރުބައިޖާން ފަދަ ޤައުމު ތަކުން ވެސް ވަނީ ނޯބެލް އިނާމަށް ޓްރަމްޕްގެ ނަމަށް ތާއީދު ކުރާ ކަމަށް ހާމަކޮށްފަ އެވެ.