މިނިސްޓަރ ނަހުލާ ގަތަރުގެ ޓްރާންސްޕޯޓް މިނިސްޓަރާ ބައްދަލުކުރައްވައިފި
17 މާރިޗު 2021 | ބުދަ 12:51ވެހިކަލް ރަޖިސްޓްރޭޝަން ޑިޖިޓައިޒްކޮށް، އެކަން ބަލަހައްޓާ އުސޫލު އިތުރަށް ތަރައްގީ ކުރުމާ ގުޅޭ މަޝްވަރާ ކުރެއްވި
ޓްރާންސްޕޯޓް މިނިސްޓަރ ނަހުލާ ޤަތަރުގެ ޓްރާންސްޕޯޓު މިނިސްޓަރާ ބައްދަލު ކުރެއްވުން
ޓްރާންސްޕޯޓް މިނިސްޓަރ އައިޝަތު ނަހުލާ ގަތަރުގެ ޓްރާންސްޕޯޓް އެންޑް ކޮމިއުނިކޭޝަން މިނިސްޓަރ ގާސިމް ބިން ސައިފް އަލް ސުލައިސީ އާ ބައްދަލުކުރައްވައިފިއެވެ.
ރައީސުލްޖުމްހުރިއްޔާ އިބްރާހިމް މުހައްމަދު ސޯލިހު މި މަހު 14ގައި ރަސްމި ދަތުރުފުޅެއްގައި ގަތަރަށް ވަޑައިގެންނެވިއިރު މިނިސްޓަރ ނަހުލާ ހިމެނިވަޑައިގަންނަވަނީ ރައީސް އާ އެކު އެގައުމަށް ވަޑައިގެންނެވި ވަފުދުގައެވެ.
ޓްރާންސްޕޯޓް މިނިސްޓްރީން ބުނީ އެ ބައްދަލުވުމުގައި ރާއްޖޭގެ ޓްރާންސްޕޯޓް ދާއިރާ ކުރިއެރުވުމާ ގުޅޭ ގިނަ މަޝްވަރާތަކެއް ކޮށްފައިވާ ކަމަށެވެ. އެގޮތުން ވެހިކަލް ރަޖިސްޓްރޭޝަން ޑިޖިޓައިޒްކޮށް، އެކަން ބަލަހައްޓާ އުސޫލު އިތުރަށް ތަރައްގީކުރުމާއި، ސިވިލް އޭވިއޭޝަން ދާއިރާގައި ކެޕޭސިޓީ އިތުރުކުރުމުގެ އިތުރަށް އެ ދާއިރާއިން މީހުން ތަމްރީން ކުރުމާ ގުޅޭ މަޝްވަރާތައް ކުރިއަށް ގެންދިޔަ ކަމަށް ވެސް މިނިސްޓްރީން ބުނެއެވެ.
މީގެ އިތުރަށް ޕަލްބްލިކް ޓްރާސްޕޯޓް އިންފްރާސްޓްރަކްޗާއެއް ގާއިމްކޮށް، އެކަން ތަންފީޒުކުރުމާއި އެއްގަމާއި ކަނޑުގެ ސަރަހައްދުގެ ރެގިއުލޭޓަރީ އެކްސްޕަރޓީޒްއާ ގުޅޭ މަޝްވަރާތައް ކޮށްފައިވާ ކަމަށް ވެސް އެ މިނިސްޓްރީން ހާމަކުރެއެވެ.
އެ ބައްދަލުވުމުގައި ދެ ގައުމުން ވެސް ޓްރާންސްޕޯޓް ދާއިރާއިން ގުޅިގެން ކުރާނެ މަސައްކަތްތަކާ ގުޅޭ އެމްއޯޔޫއެއްގައި ސޮއިކުރުމަށް އެއްބަސްވިކަމަށް ވެސް އެ މިނިސްޓްރީން ބުނެއެވެ. އޭގެ ސަބަބުން ދެ ގައުމުގެ ގުޅުން އިތުރަށް ވަރުގަދަވެގެންދާނެ ކަމަށް ވެސް ބުނެފައިވެއެވެ.
ރައީސް ސާލިހު ގަރަތަށް ކުރެއްވި ރަސްމީ ދަތުރުފުޅަށް ފަހު މިހާރު ބަންގްލަދޭޝް އަށް ވަޑައިގެންފައިވާއިރު، އެމަނިކުފާނާއެކު ވަޑައިގެންނެވި ވަފުދުގެ ބައެއް ބޭފުޅުން އަދިވެސް ގަތަރުގެ އިސްވެރިންނާ ބައްދަލުކުރައްވައި ދެގައުމުގެ ގުޅުން ރަނގަޅުކުރުމާ ގުޅޭގޮތުން ގެންދަވަނީ މަޝްވަރާ ކުރައްވަމުންނެވެ.
